ଡେରିରେ ପହଞ୍ଚିଲା ଆମ୍ୱୁଲାନ୍ସ: ପଞ୍ଚାୟତ ଅଫିସରେ ପିଲା ଜନ୍ମ କଲେ ପ୍ରସୂତି

ନାରାୟଣପାଟଣା: ପୁଣି ଦେଖିବାକୁ ମିଳିଛି ସ୍ୱାସ୍ଥ୍ୟ ସେବାର ନଗ୍ନ ଚିତ୍ର। ପ୍ରସୂତି ମହିଳାଙ୍କ ପାଇଁ ସରକାର ଅନେକ ଯୋଜନା କରୁଛନ୍ତି ହେଲେ ଉପଯୁକ୍ତ ସ୍ୱାସ୍ଥ୍ୟ ସେବା ପାଇବାରୁ ବଞ୍ଚିତ ହେଉଛନ୍ତି  ମା’ ଓ ନବଜାତ ଶିଶୁ। କେଉଁଠି ପ୍ରସୂତି ମହିଳାଙ୍କୁ ଖଡ଼ିଆ କିମ୍ୱା ଝୁଡିରେ ବୁହା ହୋଇ ହସ୍ପିଟାଲ ନିଆ ଯାଉଛି ତ ଆଉ କେଉଁଠି ଆମ୍ୱୁଲାନ୍ସ ଠିକ୍ ସମୟରେ ଆସି ନ ପହଞ୍ଚିବାରୁ ବିଚ୍‌ ରାସ୍ତାରେ ପ୍ରସବ କରୁଛନ୍ତି ମହିଳା। ଏଭଳି ଏକ ଅଭିଯୋଗ ଆସିଛି ଆଦିବାସୀ ଅଧ୍ୟୁକ୍ଷିତ କୋରାପୁଟ ଜିଲ୍ଲା ନାରାୟଣପାଟଣା ବ୍ଲକ୍ ପଡ଼ାପଦର ପଞ୍ଚାୟତରୁ।

ଆମ୍ବୁଲାନ୍ସ ସଠିକ୍ ସମୟରେ ଆସି ନ ପହଞ୍ଚିବାରୁ ଶେଷରେ ପଡ଼ାପଦର ପଞ୍ଚାୟତ କାର୍ଯ୍ୟାଳୟରେ ଜଣେ ମହିଳା ପ୍ରସବ କରିଛନ୍ତି। ସେ ଏକ ଶିଶୁ କନ୍ୟାକୁ ଜନ୍ମ ଦେଇଛନ୍ତି। ମହିଳା ଜଣକ ହେଲେ ଗାଁର ୱାଡେକା ଭୀମାଙ୍କ ସ୍ତ୍ରୀ ଧାନ ୱାଡେକା।

ଧାନଙ୍କ ପ୍ରସବ ବେଦନା ହେବାରୁ ଭୋରରେ ଆସି ପଞ୍ଚାୟତ କାର୍ଯ୍ୟାଳୟ ପହଞ୍ଚିଥିଲେ। ସେଠାରୁ ସେମାନେ ୧୦୨ ଆମ୍ବୁଲାନ୍ସକୁ ଫୋନ କରିଥିଲେ। କିନ୍ତୁ ସଠିକ୍ ସମୟରେ ଆମ୍ବୁଲାନ୍ସ  ଆସିନଥିଲା। ଫଳରେ ଧାନ ପଞ୍ଚାୟତ କାର୍ଯ୍ୟାଳୟରେ ପିଲା ଜନ୍ମ କରିଥିଲେ ।

ଏହାର କିଛି ସମୟ ପରେ ଆମ୍ବୁଲାନ୍ସ ପହଞ୍ଚିବା ପରେ ଉଭୟ ମା’ ଓ ଶିଶୁକନ୍ୟାକୁ ନିକଟସ୍ଥ ଏକ ମେଡ଼ିକାଲକୁ ନିଆଯାଇଥିଲା।

ଅନ୍ୟପକ୍ଷରେ ଅଭିଯୋଗକୁ ୧୦୨ ଆମ୍ୱୁଲାନ୍ସ କର୍ତ୍ତୃପକ୍ଷ ଖଣ୍ଡନ କରିଛନ୍ତି। ୧୦୨ କର୍ତ୍ତୃପକ୍ଷ କହିଛନ୍ତି-“ଆଶା କର୍ମୀଙ୍କଠାରୁ ଫୋନ୍‌ ପାଇବା ପରେ ନାରାୟଣପାଟଣାରେ ଆମ୍ବୁଲନ୍ସ ପାଇଁ ଯୋଗାଯୋଗ କରାଯାଇଥିଲା। ଯୋଗାଯୋଗ ନ ହେବାରୁ ବନ୍ଧୁଗାଁକୁ ଫୋନ୍‌ କରାଯାଇଥିଲା। ପରେ ଆମ୍ବୁଲାନ୍ସ ୨୨ କି.ମି. ଦୂର ଅତିକ୍ରମ କରି ପୋଡ଼ପଦରରେ ପହଞ୍ଚିଥିଲା। ସେତେବେଳକୁ ଗର୍ଭବତୀଙ୍କ ପ୍ରସବ ହୋଇସାରିଥିଲା। ପରେ ଆମ୍ୱୁଲାନ୍ସ କର୍ମଚାରୀ ପ୍ରସୂତୀଙ୍କୁ ନେବା ପାଇଁ ଅନୁରୋଧ କରିଥିଲେ। ମାତ୍ର ପ୍ରସୂତୀଙ୍କ ପରିବାର ଲୋକେ ଗଣମାଧ୍ୟକୁ ଅପେକ୍ଷା କରିଥିଲେ। ୧୦ ମିନିଟ୍‌ ବିଳମ୍ୱରେ ଗଣମାଧ୍ୟମ ପ୍ରତିନିଧିମାନେ ଘଟଣାସ୍ଥଳରେ ପହଞ୍ଚି ଫଟୋ ଉଠାଇବା ପରେ ଆମ୍ୱୁଲାନ୍ସ କର୍ମକର୍ତ୍ତା ପ୍ରସୂତୀ ଓ ତାଙ୍କ ଛୁଆକୁ ଉଦ୍ଧାର କରି ନାରାୟଣପାଟଣା ଡାକ୍ତରଖାନାରେ ଭର୍ତ୍ତି କରିଥିଲେ।”