ହାତୀ ଖାଉଛନ୍ତି ଫସଲ: ରାତିରେ ମଞ୍ଚା ବାନ୍ଧି ଜଗିଛନ୍ତି ଚାଷୀ

<p>ବାଲେଶ୍ୱର/ନୀଳଗିରି (ଓଡ଼ିଶା ରିପୋର୍ଟର): ଚାଷୀଙ୍କୁ ଘାରିଛି ଫସଲ ଚିନ୍ତା। ନିଜ କଷ୍ଟ ଉପାର୍ଜିତ ଫସଲ ଜଗିବା ପାଇଁ ଗଛରେ ମଞ୍ଚା ବାନ୍ଧି ରହୁଛନ୍ତି। ରାତି ସାରି ଅନିଦ୍ରା ରହି ଟର୍ଚ୍ଚ ଲାଇଟ୍&zwnj; ପାକାଇ ହାତୀ ଘଉଡାଉଛନ୍ତି। ବନ ବିଭାଗ ପାଖରୁ ନିରାଶ ହୋଇ ଗାଁ ଲୋକେ ଏପରି ବିକଳ୍ପ ବାଛି ଛନ୍ତି। ଏମିତିକା ଚିତ୍ର ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ନୀଳଗିରି ଓ ଔପଦା ବ୍ଲକରେ।</p><p>ନୀଳଗିରି ବ୍ଲକ୍ ମାନଗଡ଼ ଗାଁଟି କୁଲଡିହା ଅଭୟାରଣ୍ୟ ପାଦ ଦେଶରେ ଅବସ୍ଥିତ। ଏହି ଗାଁର ଚାଷୀଙ୍କୁ ଏବେ ଘାରିଛି ଫସଲ ଚିନ୍ତା। ନିକଟସ୍ଥ ଜଙ୍ଗଲିରୁ ହାତୀ ପଲ ଚାଲିଆସି କ୍ଷେତରେ ପଶି ବ୍ୟାପକ ଧାନ ଚାଷ ନଷ୍ଟ କରୁଛନ୍ତି। ହାତୀ ମୁହଁରୁ ଫସଲ ବଞ୍ଚାଇବା ପାଇଁ ଚାଷୀ ରାତି ଅନିଦ୍ରା ହୋଇ ଗଛ ଉପରେ ମଞ୍ଚା ବାନ୍ଧି ଜଗି ରହୁଛି। ହାତୀ ଆସିଲା କ୍ଷଣି ସଂଘବଦ୍ଧ ହୋଇ ଘଉଡାଉଛନ୍ତି।</p><p>ଚାଷୀ ସୁକୁରା ଦେଉରି କହିଛନ୍ତି-&ldquo;ଜଙ୍ଗଲରୁ ଆସୁଥିବା ହାତୀ ଫସଲ ନଷ୍ଟ କରିଦେଉଛନ୍ତି। ଏନେଇ ଆମେ ବନ ବିଭାଗ ପାଖରେ ଅଭିଯୋଗ କାରୁଛୁ। ମାତ୍ର ଆମ କଥା କେହି ଶୁଣୁ ନାହାନ୍ତି।&rdquo;</p><p>ମାନଗଡ଼ ବାସିନ୍ଦା ସୁକାନ୍ତି ବାରିକ କହିଛନ୍ତି-&ldquo;ପରିଶ୍ରମ କରି ଚାଷ କରୁଛୁ। ମାତ୍ର ହାତୀ ଦାଉରୁ ଫସଲକୁ ରକ୍ଷା କରିପାରୁ ନାହୁଁ। ବାଧ୍ୟହୋଇ ଗଛ ଉପରେ ମଞ୍ଚା ବାନ୍ଧି ଫସଲ ଜଗୁଛୁ। ରାତିରେ ହାତୀ ଆସିଲେ ଟ୍ରଚ୍&zwnj; ମାରି ଘଉଡାଉଛୁଁ।&rdquo;</p><p>ଧାନ ଅମଳ ସମୟ ଆସିଲେ କୁଲଡିହା ଓ ନୀଳଗିରି ଅଭୟାରଣ୍ୟରୁ ହାତୀ ଚାଲି ଆସୁଛନ୍ତି। ଏହାର ମୁକାବିଲା ଲାଗି ଗତବର୍ଷ ବନ ବିଭାଗ ପକ୍ଷରୁ କିଛି ଅଞ୍ଚଳରେ ସୋଲାର ଫେନ୍ସିଂ କରାଯାଇଥିଲା। ଯାହାଦ୍ୱାରା ହାତୀଙ୍କୁ ଅଟକାଯାଇ ପାରୁଥିଲା। ହେଲେ ରକ୍ଷଣାବେକ୍ଷଣ ଅଭାବରୁ ତାର ବାଡ଼ ଆଉ ନାହିଁ। ଏଣେ ହାତୀପଲକୁ ନତଡ଼ିଲେ ଫସଲକୁ ବିପଦ ଥିବାରୁ ଲୋକେ ରାତି ଅନିଦ୍ରା ରହି ହାତୀ ଘଉଡ଼ାଇବାକୁ ବାଧ୍ୟ ହେଉଛନ୍ତି।</p><p>କୁଲଡିହା ରେଞ୍ଜ୍ ଅଫିସର ଲକ୍ଷ୍ମଣ କୁମାର ପ୍ରଧାନ କହିଛନ୍ତି-&ldquo;ଫସଲକୁ ହାତୀ କବଳରୁ ରକ୍ଷା କରିବା ପାଇଁ ଗତବର୍ଷ ସୋଲାର ଫେନ୍ସିଂ କରାଯାଇଥିଲା। ଏହାର ରକ୍ଷଣା ବେକ୍ଷଣା ପାଇଁ ଗାଁ ଲୋକଙ୍କୁ କୁହାଯାଇଥିଲା। ମାତ୍ର ଗାଁ ଲୋକେ ସେହି ତାର ବାଡ଼କୁ ଜଗିବା ପରିବର୍ତ୍ତେ କାଟି ନେଇଗଲେ। ଯେଉଁଥିପାଇଁ ଅସୁବିଧାରେ ପଡ଼ୁଛନ୍ତି। ପ୍ରତିବର୍ଷ ଏତେ ପଇସା ଖର୍ଚ୍ଚ କରି ସୋଲାର ଫେନ୍ସିଂ କରିବା ସମ୍ଭବ ନୁହେଁ।&rdquo;</p><p>[vc_video link=&quot;&quot; align=&quot;center&quot;]</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।