ବାରିପଦା (ଓଡ଼ିଶା ରିପୋର୍ଟର): ଗହଣା ଦୋକାନ ଉପର ଘରେ ରହୁଥିବା ଏକ ପରିବାରକୁ ଦୁର୍ବୃତ୍ତମାନେ ବନ୍ଧୁକ ଦେଖାଇ ବାନ୍ଧି ପକାଇଲେ। ତା’ପରେ ଗହଣା ଦୋକାନ କବାଟ ଭାଙ୍ଗି କଳାକନା ବୁଲାଇଦେଲେ। ଗତକାଲି ରାତିରେ ଏପରି ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବଡ଼ସାହି ବଜାରରେ।
ବଡସାହିରେ ମା’ ଅମ୍ୱିକା ଗହଣା ଦୋକାନର ଉପର ମହଲାରେ ଜଣେ ଫାୟାରମ୍ୟାନ୍ ସପରିବାରେ ଭଡ଼ାରେ ରହୁଛନ୍ତି। ଗତକାଲି ବିଳମ୍ୱିତ ରାତିରେ ୫ରୁ ୬ ଜଣ ଯୁବକ ଆସି ପ୍ରଥମେ କାବାଟ ବାଡେଇଥିଲେ। କବାଟ ଖୋଲିବା କ୍ଷଣି ଦୁର୍ବୃତ୍ତମାନେ ପରିବାରର ସମସ୍ତଙ୍କୁ ବାନ୍ଧି ପକାଇଥିଲେ। ପରେ ଦୁର୍ବୃତ୍ତମାନେ ଗହଣା ଦୋକାନର ପଛ ପାର୍ଶ୍ୱ କବାଟ ଭାଙ୍ଗି ଭିତରେ ପଶି ଲକ୍ଷାଧିକ ଟଙ୍କାର ଅଳଙ୍କାର ଲୁଟି ନେଇଥିଲେ। ଡକାୟତମାନେ ଓଡ଼ଆ ଓ ହିନ୍ଦୀ ଭାଷାରେ କଥା ହେଉଥିବା ଜଣାପଡ଼ିଛି। ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ବଡସାହି ଅଂଚଳରେ ଗତ କିଛି ଦିନ ହେବ ଏଭଳି ବାରମ୍ବାର ଲୁଟ୍ ହେଉଛି। ହେଲେ ପୋଲିସ ଅଭିଯୁକ୍ତଙ୍କୁ ଧରିବାରେ ବିଫଳ ହେଉଛି। ଫଳରେ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ପୋଲିସ ନିଷ୍କ୍ରିୟତା ପ୍ରତିବାଦରେ ଆଜି ବଡ଼ସାହି ବଜାରରେ ସମସ୍ତ ଦୋକାନ ବଜାର ବନ୍ଦ ରହିଥିଲା