ବ୍ଲୁ-ହ୍ୱେଲ ଆତଙ୍କ: ସ୍କୁଲ ଓ କଲେଜ ପିଲାଙ୍କୁ ସଚେତନ କରିବ ପୋଲିସ

କଟକ (ଓଡ଼ିଶା ରିପୋର୍ଟର): ବ୍ଲୁ ହ୍ୱେଲ ଗେମ୍‌ ସମ୍ପର୍କରେ ବ୍ୟାପକ ସଚେତନତା ସୃଷ୍ଟି କରାଯିବ। ବିଭିନ୍ନ ଥାନାର ପୋଲିସ ଅଧିକାରୀମାନେ ସ୍କୁଲ ଓ କଲେଜକୁ ଯାଇ ବ୍ଲୁ ହ୍ୱେଲ୍‌ ଅପକାରିତା ସମ୍ପର୍କରେ ଶିକ୍ଷକ, ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କୁ ଅବଗତ କରାଇବେ। ଏପରିକି ସାଇବର କାଫେ କର୍ମଚାରୀଙ୍କୁ ମଧ୍ୟ ସଚେତନ କରାଯିବ। ଯଦି କେଉଁଠି ବ୍ଲୁ ହ୍ୱେଲ ଲିଙ୍କ୍‌ ଦେଖିବାକୁ ମିଳୁଛି, ତାକୁ ହଟାଇବାକୁ ଉଦ୍ୟମ କରାଯିବ ବୋଲି ଡିଜିପି ଡ. ରାଜେନ୍ଦ୍ର ପ୍ରସାଦ ଶର୍ମା କହିଛନ୍ତି।

ସେ କହିଛନ୍ତି-“ବ୍ଲୁ ହ୍ୱେଲ ଗେମ୍‌କୁ ନେଇ ଏତେ ବ୍ୟସ୍ତ ଓ ବିବ୍ରତ ହେବାର ନାହିଁ। ତଥା ସୁରକ୍ଷା ଦୃଷ୍ଟିରୁ ସ୍କୁଲର ପ୍ରଧାନଶିକ୍ଷକ ଓ କଲେଜ ପ୍ରିନ୍ସପାଲମାନଙ୍କ ପାଇଁ ଏକ ଗାଇଡ୍‌ଲାଇନ୍‌ ଜାରି କରାଯିବ। ଯଦି କୌଣସି ପିଲାର ବ୍ୟବହାରିକ ପରିବର୍ତ୍ତନ ହେବାର ଶିକ୍ଷକମାନେ ଦେଖିବେ ସଙ୍ଗେସଙ୍ଗେ ସେମାନଙ୍କୁ କାଉନ୍‌ସେଲିଂ କରିବେ। ଏପରିକି ନିକଟସ୍ଥ ଥାନା ଅବଗତ କରାଇବେ। ଓଡ଼ିଶାରେ କେବଳ କଟକକୁ ଛାଡ଼ି ଦେଲେ ଅନ୍ୟ କେଉଁଠି ଦେଖିବାକୁ ଗେମ୍‌ର ପ୍ରଭାବ ଦେଖିବାକୁ ମିଳିନି।”

ଅଧିକ ପଢ଼ନ୍ତୁ:ବ୍ଲୁ ହ୍ୱେଲ୍‌ ଖେଳରେ ଫସିଥିବା ଇଞ୍ଜିନିୟରିଂ ଛାତ୍ର ଉଦ୍ଧାର: ପୋଲିସ କହିଲା- କିଛି ଷ୍ଟେପ୍‌ ଖେଳିଥିଲେ

କଟକରେ ଅନ୍ୟ ପିଲା ବ୍ଲୁ ହ୍ୱେଲ ଖେଳୁଥିବା ନେଇ ପ୍ରଶ୍ନର ଉତ୍ତରରେ ଶର୍ମା କହିଛନ୍ତି-“ଘଟଣାର ତଦନ୍ତ ଚାଲିଛି। ମାତ୍ର ଉଦ୍ଧାର ହୋଇଥିବା ପିଲା ଯାହା କହିଛନ୍ତି ତାହାର ସତ୍ୟାସତ୍ୟ ଥିବା ପରି ଲାଗୁନି। ତଥାପି କମିଶନରେଟ୍‌ ପୋଲିସ ଘଟଣାର ଖୋଳତାଡ ଜାରି ରଖିଛି।”

ସେ କହିଛନ୍ତି-“ବ୍ଲୁ ହ୍ୱେଲ ନେଇ କୌଣସି ଅଭିଯୋଗ ଥାନାକୁ ଆସିଲେ ପୋଲିସ ସଙ୍ଗେସଙ୍ଗେ ସହାୟତା ଗ୍ରହଣ କରିବ। ଏନେଇ ରାଜ୍ୟର ସମସ୍ତ ଥାନାକୁ ସୂଚନା ଦିଆଯାଇଛି।”

ଅଧିକ ପଢ଼ନ୍ତୁ: ମାଡ଼ି ଆସୁଛି ବ୍ଲୁ ହ୍ୱେଲ : ହାଇଆଲର୍ଟ ଜାରି କଲା ଓଡ଼ିଶା ପୋଲିସ