ବମିଖାଲ ଓଭରବ୍ରିଜ୍‌ ଭୁଶୁଡିବା ଘଟଣାର ତଦନ୍ତ ଆସନ୍ତାକାଲିଠାରୁ, ୨ ଇଂଜିନିୟର ନିଲମ୍ବିତ

ଭୁବନେଶ୍ୱର (ଓଡ଼ିଶା ରିପୋର୍ଟର): ବମିଖାଲ ଓଭରବ୍ରିଜ୍‌ ଭୁଶୁଡିବା ଘଟଣାର ତଦନ୍ତ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ନିର୍ଦ୍ଦେଶ ଦେଇଛନ୍ତି। ଆସନ୍ତାକାଲିଠାରୁ ପୂର୍ତ୍ତ ବିଭାଗ ଏହାର ତଦନ୍ତ କରିବ। ଏହାସହ ୨ ଜଣ ଇଂଜିନିୟରଙ୍କୁ ନିଲମ୍ବନ କରାଯାଇଛି। ନିଲମ୍ବିତ ଅଧିକାରୀମାନେ ହେଲେ ଉପ ନିର୍ବାହୀ ଯନ୍ତ୍ରୀ ବଂଶୀଧର ପ୍ରହରାଜ ଏବଂ ସହକାରୀ ଯନ୍ତ୍ରୀ କିଶୋର ରାଉତ।

ଏହି ଘଟଣା ପାଇଁ ଯିଏ ବି ଦାୟୀ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୂର୍ତ୍ତ ବିଭାଗ ସଚିବ ନଳିନୀକାନ୍ତ ପ୍ରଧାନ କହିଛନ୍ତି। ଆର ଆଣ୍ଡ ବି ଡିଭିଜନ-୪ ଏହାର ନିର୍ମାଣ ଦାୟିତ୍ୱରେ ଥିଲା। ପଣ୍ଡା ଇନ୍‌ଫ୍ରା ନିର୍ମାଣ ପାଇଁ ଟେଣ୍ଡର ନେଇଥିଲା।

ଅନ୍ୟପକ୍ଷରେ ଘଟଣା ସ୍ଥଳରେ ଉଦ୍ଧାର କାର୍ଯ୍ୟକୁ ତ୍ୱରିତ କରାଯାଇଛି। ସୂଚନା ମିଳିବା ମାତ୍ରେ ଦମକଳ ବାହିନୀକୁ ଉଦ୍ଧାର କାର୍ଯ୍ୟରେ ନିୟୋଜିତ କରାଯାଇଥିଲା। ୩ଟି କ୍ରେନ୍‌କୁ ଉଦ୍ଧାର କାର୍ଯ୍ୟରେ ଲଗାଯାଇଛି। ଓଡ୍ରାଫ ଟିମ୍‌ ମଧ୍ୟ ଉଦ୍ଧାର କାର୍ଯ୍ୟରେ ଲାଗିଛନ୍ତି। ଏହାସହ ଏନ୍‌ଡିଆରଏଫ୍‌ର ୨ଟି ଟିମ୍‌ ନିୟୋଜିତ ହୋଇଛନ୍ତି। ଟିମ୍‌ରେ ୪୪ ଜଣ ଯବାନ ଓ ୪ଟି ସନ୍ଧାନୀ କୁକୁର ଅଛନ୍ତି।