‘ମୁଁ ମଦ ବେପାରୀ’: ପନି ପରିବା ପରି ଗାଁକୁ ଗାଁ ବୁଲି ବିକୁଥିଲେ ଦେଶୀ

<p>ଢେଙ୍କାନାଳ: ପନି ପରିବା ପରି ଗାଁକୁ ଗାଁ ବୁଲି ମଦ ବିକିବା ମହଙ୍ଗା ପଡିଲା। ଉତ୍ତ୍ୟକ୍ତ ଲୋକେ ବିରୋଧ କଲେ। ଖାଲି ବିରୋଧ ନୁହେଁ ଅଟକ ରଖିଲେ ଓ ସିଲଟ ଧରାଇଦେଲେ। ଯେଉଁଥିରେ ତାଙ୍କ ନାଁ ସହ &lsquo;ମଦ ବେପାରୀ&rsquo; ଲେଖା ଯାଇଛି। ଏପରି ଘଟଣା ଘଟିଛି ଢେଙ୍କାନାଳ ଜିଲ୍ଲା ସଦର ଥାନା ସିମିନଈ ଅଞ୍ଚଳରେ।</p> <p>ଏହି ଅଞ୍ଚଳରେ ମଦ ବିରୋଧୀ ଆନ୍ଦୋଳନ ଜୋରସୋରରେ ଚାଲିଛି। ଅଞ୍ଚଳବାସୀ ମଦ ବିକ୍ରିକୁ ବିରୋଧ କରୁଛନ୍ତି। ଏପରି ସ୍ଥିତିରେ ୩ ଜଣ ବେପାରୀ ଗତକାଲି ଗାଡିରେ ଗାଁକୁ ଗାଁ ବୁଲି ମଦ ବିକ୍ରି କରୁଥିଲେ। ଏହାକୁ ସ୍ଥାନୀୟ ଲୋକେ ବିରୋଧ କରିବା ସହ ସେମାନଙ୍କୁ ଅଟକ ରଖି ପଞ୍ଚାୟତ କାର୍ଯ୍ୟାଳୟରେ ତାଲା ପକାଇ ଦେଇଥିଲେ। ଏହାପରେ &lsquo;ମଦ ବେପାରୀ&rsquo; ଲେଖା ଥିବା ସିଲଟ ଧରାଇ ଦେଇ ପଞ୍ଚାୟତ ଅଫିସ ଆଗରେ ବସାଇ ଦେଇଥିଲେ। ସେମାନଙ୍କୁ ନିକଟରୁ ଅଞ୍ଚଳବାସୀ ଦେଶୀ ମଦର ପାଉଚ ଜବତ କରିଛନ୍ତି।</p> <p>ଅଞ୍ଚଳରେ ମଦ ହଟାଅ ଅଭିଯାନ ଚାଲିଥିବା ବେଳେ ବାରମ୍ବାର ମନା କରିବା ସତ୍ତ୍ୱେ ଏମାନେ ମାନୁ ନଥିବା ଲୋକେ ଅଭିଯୋଗ କରିଛନ୍ତି।</p> <p>ଖବର ପାଇ ଅବକାରୀ ବିଭାଗର ଅଧିକାରୀମାନେ ପଞ୍ଚାୟତ କାର୍ଯ୍ୟାଳୟରେ ପହଞ୍ଚି ୩ ଅଭିଯୁକ୍ତଙ୍କୁ ନିଜ ହେପାଜତକୁ ନେଇଛନ୍ତି।</p>