ଏହି ୩ଟି ଜିନିଷରେ ଭୁଲ୍‌ରେ ବି ଗୋଡ଼ ବଜାନ୍ତୁନି, ସୃଷ୍ଟି ହୋଇପାରେ ଅଶାନ୍ତି

ଭୁବନେଶ୍ଵର(ଓଡିଶା ରିପୋର୍ଟର): ଚାଲୁଥିବା ସମୟରେ ବେଳେବେଳେ ଆମ ଅଜାଣତରେ କେଉଁଠି କେଉଁଠି ଗୋଡ଼ ବାଜିଯାଏ। କିଛି ଲୋକ ଜାଣତରେ ବି କାହାକୁ କାହାକୁ ଗୋଡ଼ରେ ଆଘାତ ଦେଇଥାନ୍ତି। ଶାସ୍ତ୍ର କହୁଛି, ଏହା କିନ୍ତୁ ବହୁତ ଖରାପ ଅଭ୍ୟାସ। ଏହାଦ୍ୱାରା ପ୍ରକାରାନ୍ତରେ ଆମର ଅନିଷ୍ଠ ହିଁ ହୋଇଥାଏ। ପ୍ରଥମ କଥା ଏହା ବ୍ୟବହାର ଗତ ସୌଜନ୍ୟ ନୁହେଁ। ଦ୍ଵିତୀୟ କଥା, ଏହା ଧାର୍ମିକ ଦୃଷ୍ଟିରୁ ମଧ୍ୟ ଏକ ପାପ। ଅଜାଣତରେ କାହାଠାରେ ଗୋଡ଼ ବାଜିଗଲେ ଆମେ ‘ବିଷ୍ଣୁ’ ବୋଲି କହି ‍କ୍ଷମା ମାଗିନେଉ। କିନ୍ତୁ ଶାସ୍ତ୍ର କହୁଛି, ଏହାଦ୍ଵାରା ଆମେ ପାପରୁ ମୁକ୍ତି ପାଇପାରନ୍ତି ନାହିଁ। ପଣ୍ଡିତଙ୍କ ଦୃଷ୍ଟିରେ ଏମିତି ୩ଟି ଜିନିଷ ଅଛି ଯାହାଠାରେ ଗୋଡ଼ ଭୁଲ୍‌ରେ ବି ବାଜିବା ଅନୁଚିତ। ତେଣୁ ଏଥିପ୍ରତି ଆମେ ଦୃଷ୍ଟି ଦେବା ଆବଶ୍ୟକ। ଆସନ୍ତୁ ଜାଣିବା ସେଗୁଡ଼ିକ କଣ।

୧. ଛୋଟ ଛୁଆ: ସାଧାରଣ ଭାବରେ ଶାସ୍ତ୍ର କହୁଛି, ଶିଶୁଙ୍କ ଦେହରେ ସ୍ଵୟଂ ଭଗବାନ ବିରାଜମାନ କରିଥାନ୍ତି। ପିଲାମାନେ ଦୁନିଆର କ୍ଲୀଷ୍ଟ ଜୀବନରୁ ଦୂରରେ ଥାଆନ୍ତି। ସେମାନଙ୍କ ଭିତରେ କୌଣସି ପ୍ରକାର ପାପ ଓ ଖରାପ ଚିନ୍ତା ନଥାଏ। ତେଣୁ ସେମାନେ ଈଶ୍ଵରଙ୍କ ପରି ପବିତ୍ର ହୋଇ ରହିଥାନ୍ତି। ତେଣୁ ଶାସ୍ତ୍ର କହୁଛି, ପିଲାଙ୍କ ଦେହରେ ଭୁଲ୍‌ରେ ବି ଗୋଡ଼ ବଜାନ୍ତୁ ନାହିଁ। ଗୋଇଠା ମାରିବା ତ ନିହାତି ପାପ, ଗୋଡ଼ରେ ବି ଆଘାତ ଦେବାରୁ ଦୂରେଇ ରହନ୍ତୁ।

୨. ଅଗ୍ନି: ସେହିପରି ଅଗ୍ନି ହେଉଛି ସକଳ ଶକ୍ତିର ଆଧାର। କେବଳ ହିନ୍ଦୁଧର୍ମ ନୁହେଁ, ଅନ୍ୟ ଧର୍ମରେ ବି ଏହାକୁ ଦେବତା ଭାବେ ପୂଜା କରାଯାଏ। ହିନ୍ଦୁଶାସ୍ତ୍ରରେ ଅଗ୍ନିଙ୍କ ପାଇଁ ସ୍ଵତନ୍ତ୍ର ପୂଜା ବିଧି ରହିଛି। ଯେହେତୁ ଅଗ୍ନି ବା ନିଆଁ ହେଉଛନ୍ତି ଦେବତା, ତେଣୁ ତାଙ୍କଠାରେ ଗୋଡ଼ ମାରନ୍ତୁ ନାହିଁ ବା ଆଘାତ ଦିଅନ୍ତୁ ନାହିଁ।

୩. ଗୋମାତା: ସେହିପରି ହିନ୍ଦୁ ଧର୍ମରେ ଗୋରୁଗାଈଙ୍କୁ ମାତା ବା ମାଆ ହିସାବରେ ଗ୍ରହଣ କରାଯାଏ। ଅଗ୍ନି ପରି ଗୋମାତା ମଧ୍ୟ ଦେବୀ, ଯାହାଙ୍କୁ ଆମେ ପୂଜା କରିଥାନ୍ତି। କେବଳ ଗୋମାତା କାହିଁକି ଅନ୍ୟ ଜୀବଜନ୍ତୁ ଓ ପ୍ରାଣୀଙ୍କୁ ବି ଆମେ ପବିତ୍ର ଏବଂ ପ୍ରକୃତିର ସୁନ୍ଦର ସୃଷ୍ଟି ଭାବରେ ଗ୍ରହଣ କରିଥାନ୍ତି। ତେଣୁ କୌଣସି ସମୟରେ ବି ଗୋମାତାଙ୍କଠାରୁ ଗୋଡ଼ ଲଗାନ୍ତୁ ନାହିଁ। କିମ୍ବା କ୍ରୋଧରେ ତାଙ୍କୁ ଗୋଇଠା ମାରନ୍ତୁ ନାହିଁ।

ଶାସ୍ତ୍ର କହୁଛି, ଏ ତିନିଟି ଜିନିଷକୁ ଗୋଡ଼ରେ ଆଘାତ ଦେଲେ ଅଶାନ୍ତି ସୃଷ୍ଟି ହୋଇଥାଏ। ଏମିତି ବି କୌଣସି ବ୍ୟକ୍ତି ବା ଜିନିଷକୁ ଆଘାତ କରିବା ଦ୍ୱାରା ଆମେ ଅଶାନ୍ତି ହିଁ ସୃଷ୍ଟି କରିଥାନ୍ତି। ତେଣୁ ଛୋଟ ଛୁଆ, ଅଗ୍ନି ଓ ଗୋମାତା, ଏ ତିନିଟି ଜିନିଷ ପ୍ରତି ଟିକିଏ ଅଧିକ ଧ୍ୟାନ ଦେଲେ ଆମ ଜୀବନ ଶାନ୍ତିରେ ଭରି ଯାଇଥାଏ।