ଖାଦ୍ୟ ସୁରକ୍ଷା ଆଇନ: ଅକ୍ଟୋବର ୨ରୁ ହିତାଧିକାରୀ ପାଇବେ ନୂଆ ରାସନକାର୍ଡ

ଭୁବନେଶ୍ୱର: ନଭେମ୍ୱର ପହିଲାରୁ ପ୍ରଥମ ପର୍ଯ୍ୟାୟରେ ରାଜ୍ୟର ୧୪ଟି ଜିଲ୍ଲାରେ ଜାତୀୟ ଖାଦ୍ୟ ସୁରକ୍ଷା ଆଇନ କାର୍ଯ୍ୟକାରୀ କରାଯିବ। ଏଥିପାଇଁ ଅକ୍ଟୋବର ୨ ତଥା ଗାନ୍ଧୀ ଜୟନ୍ତୀ ଅବସରରେ ଖାଉଟୀମାନଙ୍କୁ ନୂଆ ରାସନ୍ କାର୍ଡ ବଣ୍ଟନ କାର୍ଯ୍ୟକ୍ରମର ଶୁଭାରମ୍ଭ ହେବ। ରାଜ୍ୟ ସଚିବାଳୟରେ ଏହି କାର୍ଡ ବଣ୍ଟନ କାର୍ଯ୍ୟର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସେ ଏଠାରେ ଏହି ଆଇନ ପରିସରଭୁକ୍ତ ଖାଉଟିମାନଙ୍କୁ ରାସନ୍ କାର୍ଡ ବଣ୍ଟନ କରିବେ। ସେହିପରି ଜିଲ୍ଲାସ୍ତରରେ ହେବାକୁ ଥିବା ସ୍ୱତନ୍ତ୍ର କାର୍ଯ୍ୟକ୍ରମରେ ମନ୍ତ୍ରୀମାନେ ଯୋଗଦେଇ ରାସନ କାର୍ଡ ବଣ୍ଟନର ଶୁଭାରମ୍ଭ କରିବେ। ପ୍ରଥମ ପର୍ଯ୍ୟାୟରେ ୧୪ଟି ଜିଲ୍ଲାରେ ଜାତୀୟ ଖାଦ୍ୟ ସୁରକ୍ଷା ଆଇନ କାର୍ଯ୍ୟକାରୀ ହେବାକୁ ଥିବା ବେଳେ ଏହି ଜିଲ୍ଲାଗୁଡ଼ିକରେ କାର୍ଡ ବଣ୍ଟନ କରାଯିବ। ଅକ୍ଟୋବର ୩ରୁ ୮ ତାରିଖ ମଧ୍ୟରେ ୧୪ଟି ଜିଲ୍ଲାରେ ପଞ୍ଚାୟତ ସ୍ତରରେ କାର୍ଡ ବଣ୍ଟନ ସାରିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଅବଶିଷ୍ଟ ଜିଲ୍ଲା ଗୁଡ଼ିକରେ ଅକ୍ଟୋବର ୧୬ରୁ ୩୧ ତାରିଖ ମଧ୍ୟରେ ନୂତନ କାର୍ଡ ବଣ୍ଟନ କରିବାକୁ ନିଷ୍ପତ୍ତି ନିଆଯାଇଛି।