ବାହାରେ ଛିଡ଼ାଛିଡ଼ି ଭିତରେ ଯୋଡ଼ାଯୋଡ଼ି: ଗୋଟିଏ କୋଠରିରେ ଏକାଠି ମହାରଥୀ-ଯୁଧିଷ୍ଠିର ଓ ତାରା-ରବି

ଭୁବନେଶ୍ୱର: ଜଣକ ଛାଇ ପଡ଼ିଲେ ଅନ୍ୟର ନାହି ଡିଏଁ। ନେତାଙ୍କ ପାନରୁ ଚୂନ ଖସିଗଲେ ହୁଏ ବାକ୍‌ ଯୁଦ୍ଧ। ସେପଟେ କର୍ମୀ ହୁଅନ୍ତି ହାତାହାତି। ସେଥିରେ ଗୋଟିଏ ଯୋଡ଼ି ପୁରୀ ଜିଲ୍ଲା ପିପିଲି ନିର୍ବାଚନମଣ୍ଡଳୀର ପାରମ୍ପରିକ ପ୍ରତିନ୍ଦ୍ୱନ୍ଦ୍ୱୀ। ଅନ୍ୟ ଯୋଡ଼ିଟି କୋରାପୁଟ ଜିଲ୍ଲାରେ ଦୁଇ ପାରମ୍ପରିକ ରାଜନୈତିକ ଦଳର ଯୋଦ୍ଧା। ଏମିତି ପାରମ୍ପରିକ ପ୍ରତିଦ୍ୱନ୍ଦ୍ୱୀ ଆଜି ନିଜ ନିଜ ମଧ୍ୟରେ ଭାବ ବିନିମୟ କରୁଥିବା ଦେଖିବାକୁ ମିଳିଥିଲା। କଥାଟି ବିଶ୍ୱାସ ହେଉନି ନା? ସେ ଦୃଶ୍ୟ ନିଜ ଆଖିରେ ନ ଦେଖିଲେ ସହଜରେ ବିଶ୍ୱାସ କରିପାରିବେ ନାହିଁ।

ପିପିଲିରେ ଦୁଇଟି ଦୋକାନ: ବିଜେଡି ଓ କଂଗ୍ରେସ

ପିପିଲି ବିଧାୟକ ତଥା ପଞ୍ଚାୟତିରାଜ ବିଭାଗ ମନ୍ତ୍ରୀ ପ୍ରଦୀପ ମହାରଥୀ। ପିପିଲିର ପୂର୍ବତନ କଂଗ୍ରେସ ବିଧାୟକ ଯୁଧିଷ୍ଠିର ସାମନ୍ତରାୟ। ଦିନେ ଦୁଇ ନେତାଙ୍କ ଯୁଦ୍ଧ ହେଲେ ସାରା ଓଡ଼ିଶାର ରାଜନୀତି ଥରି ଉଠୁଥିଲା। ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ମୁହାମୁହିଁ ହେଲେ କୋର୍ଟ କଚେରୀକୁ ମାମଲା ଯାଉଥିଲା। ହେଲେ ଆଜି ଏକାଠି ବସିଥିଲେ ରାଜନୀତିର ଏହି ଦୁଇ ନାୟକ। ସେତିକି ନୁହେଁ ମହାରଥୀଙ୍କ କାନରେ ଚୁପଚୁପ କଥା କହୁଥିଲେ ଯୁଧିଷ୍ଠିର। ଏପରି ମିଳନ ରାଜନୀତିର ମଞ୍ଚ ନୁହେଁ, ସଚିବାଳୟରେ ମନ୍ତ୍ରୀଙ୍କ ଚ୍ୟାମ୍ବରରେ ହୋଇଥିଲା ଭେଟ୍‌ଘାଟ୍‌।

କଂଗ୍ରେସ ନେତା ଯୁଧିଷ୍ଠିର ସାମନ୍ତରାୟ କହିଛନ୍ତି-“ପିପିଲିରେ ଯୋଡ଼ିଏ ଦୋକାନ- କଂଗ୍ରେସ ଓ ବିଜେଡି। ମୋର ବିଜେଡିକୁ କୌଣସି ପରିସ୍ଥିତିରେ ଯିବାର ନାହିଁ। ଲୋକଙ୍କ ଭଲ ପାଇଁ ଆମ ଦୁଇଜଣଙ୍କ ଆଲୋଚନା ଚାଲିଛି।”

ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି- “ଯୁଧିଷ୍ଠିର ବାବୁ ଯାହା କହିଛନ୍ତି ମୁଁ ସେୟା କହିବି। ପିପିଲିରେ ଦୁଇଟି ଦୋକାନ ରହିଛି। ଗୋଟିଏ କଂଗ୍ରେସର ଓ ଅନ୍ୟଟି ବିଜେଡିର। ସେ କଂଗ୍ରେସରୁ ଛିଡ଼ା ହୋଇଛନ୍ତି, ବିଜେଡିକୁ ଆସିବାର ପ୍ରଶ୍ନ ଉଠୁନି। ଏଠି ବିଜେପି ଦୋକାନ ନାହିଁ।”

ଗୋଟିଏ ଖୋଳରେ ଜୟପୁରର ଦୁଇ ଖଣ୍ଡା

ସେହିପରି ଜୟପୁରର କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ଓ ବିଜେଡିର ପୂର୍ବତନ ବିଧାୟକ ରବି ନାରାୟଣ ନନ୍ଦ। ବେଳେବେଳେ ଏ ଦୁଇନେତା ଓଡ଼ିଶା ରାଜନୀତିକୁ ଖୁବ୍ ରୋଚକ ଖବର ଦିଅନ୍ତି। ପରସ୍ପର ବିରୋଧରେ ବ୍ୟକ୍ତିଗତ ଆ‍କ୍ଷେପ କରି ଚର୍ଚ୍ଚାକୁ ଆସନ୍ତି। କିନ୍ତୁ ଆଜି ମହାରଥୀଙ୍କ ଚାମ୍ବରରେ ଏକାଠି ହୋଇଥିଲେ ପାହାଡ଼ି ଇଲାକାର ଏ ଦୁଇ ରାଜନୈତିକ ଯୋଦ୍ଧା। କୁହାଯାଏ, ଯେତେବେଳେ ରାଜନୀତିର ମହାଭାରତ ସୃଷ୍ଟି ହୁଏ ରଣକ୍ଷେତ୍ର ପାଲଟେ ଜୟପୁର। ସମର୍ଥକ ହୁଅନ୍ତି ମୁହାଁମୁହିଁ। ସଂଘର୍ଷରେ ସରେ ଶତ୍ରୁତା, ହେଲେ ଆଜି କିନ୍ତୁ ଏକାଠି ବସିଥିଲେ ଏ ଦୁଇ ପାରମ୍ପରିକ ବିରୋଧୀ ନେତା।

ବିଜେଜି ମୁଖପାତ୍ର ରବିନାରାୟଣ ନନ୍ଦ କହିଛନ୍ତି- “ରାଜନୀତିରେ ଆମର ଲଢ଼େଇ। କିନ୍ତୁ ବ୍ୟକ୍ତିଗତ ଭାବେ ଆମେ ପୁରୁଣା ବନ୍ଧୁ। ସାଙ୍ଗରେ ମିଶି ଖାଉ ଖୁସିକଥା କହୁ।”

ବିରୋଧୀ ଦଳ ମୁଖ୍ୟ ସଚେତକ ତାରାପ୍ରସାଦ ବାହିନୀପତି କହିଛନ୍ତି- “ମୋର ଟିକେ ଖୋଲା ମିଞ୍ଜାସ, ମୁଁ ଟିକେ ଖୋଲାଖୋଲି ଭାବେ କୁହେ। ରବିବାବୁ ଟିକେ କୁତ୍ରିମ ଲୋକ। ତାଙ୍କର ହୃଦୟ ଟିକେ ନିର୍ମଳ ରଖିବା ଦରକାର।”

ଗଣତନ୍ତ୍ର ସେତେବେଳେ ଭଲରେ ଚାଲେ, ଯେତେବେଳେ ରାଜନୈତିକ ବିବାଦ ଭୁଲି ନେତାମାନେ ଲୋକଙ୍କ ବିକାଶ ପାଇଁ ଏକାଠି ହୁଅନ୍ତି। ଆଜିର ଦୃଶ୍ୟ ଗଣତନ୍ତ୍ର ପାଇଁ ନିଶ୍ଚିତ ଏକ ଶୁଭ ସୂଚନା ଦେଇଛି। ଏଥିରୁ ରାଜ୍ୟର ଅନ୍ୟ ନେତାମାନେ ବି କିଛି ଶିଖିବା ଦରକାର।