ସଭ୍ୟ ସମାଜରେ କଙ୍ଗାରୁ କୋର୍ଟ: ଛାତି ଓ ପିଠିରେ ‘ମୁଁ ଚୁର’ ଲେଖି ବୁଲାଇଲେ

ବାଲେଶ୍ୱର: ପୁଣି ଆଇନକୁ ହାତକୁ ନେଲେ ଲୋକେ। ସାଇକେଲ୍‌ ଚୋର ସନ୍ଦେହରେ ଜଣେ ଯୁବକଙ୍କ ହାତବାନ୍ଧି, ତାଙ୍କ ଛାତି ଓ ପିଠିରେ ‘ମୁଁ ଚୁର’ ବୋଲି ଲେଖି ରାସ୍ତାରେ ବୁଲାଇଛନ୍ତି ଲୋକେ। ଏଭଳି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲା ସହଦେବଖୁଣ୍ଟା ଥାନା ଅନ୍ତର୍ଗତ ନୂଆବଜାର ପରିବା ମାର୍କେଟରେ। ଏଭଳି  ଦୃଶ୍ୟ ସାମ୍ନାକୁ ଆସିବା ପରେ ଯୁବକଙ୍କ ମାନବିକ ଅଧିକାର ଉଲଂଘନ ହୋଇଥିବା ଚର୍ଚ୍ଚା ହେଉଛି।

ନୂଆବଜାର ପରିବା ମାର୍କେଟରେ ଜଣେ ବ୍ୟବସାୟୀଙ୍କର ସାଇକେଲ୍‌ ଚୋରି ହୋଇଯାଇଥିଲା। ଏହି ଯୁବକ ଜଣଙ୍କ ସାଇକେଲ୍‌ ଚୋରି କରିଥିବା ସନ୍ଦେହ କରି ଲୋକେ ତାଙ୍କ ଚୁଟି କାଟିବା ସହିତ ସାର୍ଟ ଖୋଲି ଦେଇଥିଲେ। ପରେ ତାଙ୍କ ଛାତିରେ ଓ ପିଠିରେ ‘ମୁଁ ଚୁର’ ବୋଲି ଲେଖି ରାସ୍ତାରେ ବୁଲାଇଥିଲେ। ଏହି ଦୃଶ୍ୟକୁ ସ୍ଥାନୀୟ ଲୋକେ ଦେଖି ମୋବାଇଲରେ ଫଟୋ ଉଠାଇଥିଲେ ମଧ୍ୟ କେହି ପ୍ରତିବାଦ କରି ନ ଥିଲେ। ଏ ସମ୍ପର୍କରେ ଥାନାରେ କୌଣସି ଅଭିଯୋଗ ହୋଇନାହିଁ। ତେବେ ଏଭଳି ଘଟଣା କେତେ ଠିକ୍‌ ଓ କେତେ ଭୁଲ ସେନେଇ ଚର୍ଚ୍ଚା ଜୋର ଧରିଛି।  କିନ୍ତୁ ଯୁବକ ଜଣଙ୍କର ପରିଚୟ ମିଳିନାହିଁ।

ସ୍ଥାନୀୟ ଲୋକେ କହିଛନ୍ତି,“ନୂଆବଜାର ପରିବା ମାର୍କେଟରେ ଜଣେ ବ୍ୟବସାୟୀଙ୍କର ସାଇକେଲ ଚୋରି ହୋଇଯାଇଥିଲା। ଏହି ଯୁବକ ଜଣଙ୍କ ସାଇକେଲ ଚୋରି କରିଥିବା ସନ୍ଦେହ କରି ଲୋକେମାନେ ତାକୁ ପଚରାଉଚରା କରିଥିଲେ। ତାଙ୍କର କଥାବାର୍ତ୍ତା ସନ୍ଦେହଜନକ ଲାଗିଥିଲା। ପରେ ଲୋକମାନେ ତାଙ୍କ ଗଞ୍ଜିକୁ କାଢ଼ି ତାଙ୍କର ହାତ ଦୁଇଟିକୁ ବାନ୍ଧି ଦେଇଥିଲେ। ଏହାସହ ତାର ଚୁଟି ମଧ୍ୟ କାଟି ଦେଇଥିଲେ। ତା’ର ଛାତି ଓ ପିଠିରେ ‘ମୁଁ ଚୁର’ ବୋଲି ଲେଖିବା ସହ ରାସ୍ତାରେ ବୁଲାଇ ଥିଲେ। ପୂର୍ବରୁ ଲୋକେମାନେ ଯୁବକଙ୍କ ଗତିବିଧିକୁ ସନ୍ଦେହ କରୁଥିଲେ।”