ଯନ୍ତାରେ ପଡ଼ିଲା କଲରାପତରିଆ ବାଘ

ନୂଆପଡ଼ା(ଓଡ଼ିଶା ରିପୋର୍ଟର): ଅନ୍ଧାର ରାତିରେ ଶିକାର କରିବା ପାଇଁ ଆସିଥିଲା। ମାତ୍ର ବନ ବିଭାଗ ବସାଇଥିବା ଯନ୍ତାରେ ଫସିଗଲା କଲରାପତରିଆ ବାଘ। ଏହା ଆଉ କୌଣସି ଗାଁର କଥା ନୁହେଁ, ନୂଆପଡ଼ା ଜିଲ୍ଲାର ସେହି ହଳଦୀ ଗାଁ। ଯେଉଁଠି ଦିନେ ମା’ କୋଳରୁ ଛୁଆକୁ ଟାଣିନେଇ ମାରିଦେଇଥିଲା ଏକ କଲରାପତରିଆ ବାଘ। ଅଞ୍ଚଳରେ ପୁଣି ଥରେ ବାଘ ଦେଖାଦେବାକୁ ନେଇ କୋକୁଆ ଭୟ ସୃଷ୍ଟି ହୋଇଛି। ସେ ଯାହାବି ହେଉ କୌଣସି ଅଘଟଣ ଘଟିବା ପୂର୍ବରୁ ବନ ବିଭାଗ ବାଘଟିକୁ ଧରିନେଇଛି।

ଗତ ମେ’ ୨୬ ତାରିଖ ରାତିରେ ହଳଦୀ ଗାଁରେ ମାଆ କୋଳରେ ଶୋଇଥିବା ୪ ବର୍ଷର ଶିଶୁ ଛଗନକୁ ଝାମ୍ପି ନେଇଥିଲା ବାଘ। ଦିନକ ପରେ ନିକଟବର୍ତ୍ତୀ ପାହାଡରୁ ମିଳିଥିଲା ଶିଶୁର ଅସ୍ତିକଙ୍କାଳ। ଘଟଣାସ୍ଥଳରୁ ମିଳିଥିବା ଲୋମ ଓ ନଖର ପରୀକ୍ଷା ପରେ ଏହା ବାଘର କାରନାମା ବୋଲି ବନ ବିଭାଗ କହିଥିଲା। ଏହା ପରେ ବନ ବିଭାଗ ଗାଁର ବିଭିନ୍ନ ସ୍ଥାନରେ କ୍ୟାମେରା ଲଗାଇଥିବା ସହିତ ଯନ୍ତା ମଧ୍ୟ ବସାଥିଲା। କ୍ୟାମେରାରେ ବାଘର ଛବି ମଧ୍ୟ କଏଦ୍ ହୋଇଥିଲା। ତେବେ ବାଘକୁ କାବୁ କରିପାରିନଥିଲା ବନ ବିଭାଗ।

ଜୁଲାଇ ୯ ତାରିଖରେ ରାତିରେ ପୁଣି ଥରେ ହଳଦୀ ଗାଁରେ ପସିଥିଲା ବାଘ। ରାତି ପ୍ରାୟ ୧ହେବ, ଚାରିଆଡେ ଅନ୍ଧକାର। ଗାଁରେ ବନ ବିଭାଗ ପାଟ୍ରୋଲିଂ କରୁଛନ୍ତି। ବିଭିନ୍ନ ଜାଗାରେ ସିସିଟିଭି ଓ ଜନ୍ତା ବସିଛି। ଏହା ଭିତରେ ମାଂସ ଲୋଭି କଲରାପତରିଆ ବାଘ ସମସ୍ତଙ୍କୁ ଚକ୍‌ମା ଦେଇ କବାଟ ଖୋଲା କରି ଶୋଇଥିବା ଧନବାଲି ଓ ତାଙ୍କ ନାତୁଣୀ ଚାନ୍ଦିନୀଙ୍କୁ ଆକ୍ରମଣ କରିଥିଲା। ସେମାନଙ୍କ ଚିତ୍କାର ଶୁଣି ଗାଁ ଲୋକେ ଉଠି ପଡ଼ିବାରୁ ବାଘଟି ଅନ୍ଧାର ରାତିର ସୁଯୋଗ ନେଇ ପଳାଇ ଯାଇଥିଲା।