ଜାମିନ ପାଇଁ ହାଇକୋର୍ଟ କିଛି ସର୍ତ୍ତ ରଖିଛନ୍ତି। ମାମଲାରେ ଜଡ଼ିତ ଥିବା ସାକ୍ଷୀଙ୍କୁ ଧମକଚମକ ନ ଦେବା ସହିତ ତଦନ୍ତରେ ସହଯୋଗ କରିବାକୁ କୋର୍ଟ ଉଭୟଙ୍କୁ କହିଛନ୍ତି।
ପପୁ ଓ ପ୍ରଦୀପ୍ତଙ୍କ ଜାମିନ୍ ଆବେଦନ ଉପରେ ଗତକାଲି ହାଇକୋର୍ଟରେ ଶୁଣାଣି ଶେଷ ହୋଇଥିଲା। କୋର୍ଟ ରାୟ ସଂରକ୍ଷିତ ରଖିଥିଲେ। ଆଜି କୋର୍ଟ ରାୟ ପ୍ରକାଶ କଲେ।
ଗତ ୩ ତାରିଖରେ ହାଇକୋର୍ଟରେ ପପୁଙ୍କ ଜାମିନ ଆବେଦନର ଶୁଣାଣି ହେବାର ଥିଲା। କିନ୍ତୁ ମାମଲାର କେସ୍ ଡାଏରୀ ଦାଖଲ ହୋଇ ନ ଥିବାରୁ ଶୁଣାଣି ହୋଇପାରି ନ ଥିଲା।
ଜୁନ୍ ୩୦ ତାରିଖରେ ପୁରୀର ନନ୍ଦିଘୋଷ ଆପାର୍ଟମେଣ୍ଟରୁ ପପୁ ଓ ପ୍ରଦୀପ୍ତଙ୍କୁ ଗିରଫ କରିଥିଲା କମିଶନରେଟ୍ ପୋଲିସ୍ର ସ୍ପେଶାଲ୍ ସ୍କ୍ୱାଡ୍।
ଖୋର୍ଦ୍ଧା ଜିଲ୍ଲା ଓ ଦୌରା ଜଜ୍ ପପୁ ଓ ପ୍ରଦୀପ୍ତଙ୍କ ଜାମିନ ଆବେଦନ ଖାରଜ କରି ଦେଇଥିଲେ। ତା’ପରେ ସେମାନେ ହାଇକୋର୍ଟରେ ଜାମିନ ଆବେଦନ କରିଥିଲେ।
ଆବଶ୍ୟକ ପଡ଼ିଲେ ସୁପ୍ରିମକୋର୍ଟ ଯିବୁ ବୋଲି ସିଡବ୍ଲ୍ୟୁସି ପକ୍ଷରୁ କୁହାଯାଇଛି। ସିଡବ୍ଲ୍ୟୁସି ସଦସ୍ୟ ବେଣୁଧର ସେନାପତି କହିଛନ୍ତି, “ଆମେ ଆଇନଜୀବୀ ଓ ପୋଲିସ ଅଧିକାରୀମାନଙ୍କ ସହ ପରାମର୍ଶ କରୁଛି। ପୀଡ଼ିତା କିପରି ସୁରକ୍ଷିତ ରହିବ, ତା’ ଉପରେ କୌଣସି ପ୍ରକାର ପ୍ରଭାବ ପଡ଼ିବ ନାହିଁ ଓ ତଦନ୍ତ ପ୍ରକ୍ରିୟାରେ କୌଣସି ବାଧା ସୃଷ୍ଟି ନ ହେବ ସେ ନେଇ ଆମେ ସଚେତନ ଅଛୁ।”