କଟକ: କେନ୍ଦ୍ରାପଡ଼ା ଘଟଣାରେ ଗତକାଲି ଚାକିରିରୁ ନିଲମ୍ବିତ ହୋଇଥିବା ଆଇପିଏସ୍ ଅଫିସର ସତୀଶ ଗଜଭିୟେ ଶୁକ୍ରବାର ଅପରାହ୍ନରେ କଟକ ସ୍ଥିତ ପୋଲିସ୍ ମୁଖ୍ୟ କାର୍ଯ୍ୟାଳୟକୁ ଆସିଥିଲେ। ତେବେ ସେ କାହିଁକି ଆସିଥିଲେ ତାହା ଜଣାପଡ଼ି ନାହିଁ।
ସାରଥି ବାବା ପ୍ରସଙ୍ଗରେ କେନ୍ଦ୍ରାପଡାରେ ପୋଲିସ କାର୍ଯ୍ୟାନୁଷ୍ଠାନ ନେଇ କେନ୍ଦ୍ରାଞ୍ଚଳ ଆଇଜି ଆର.ପି କୋଚେଙ୍କ ରିପୋର୍ଟ ପାଇବା ପରେ ସରକାର ଗତକାଲି ସନ୍ଧ୍ୟାରେ ତାଙ୍କୁ ନିଲମ୍ବିତ କରିଥିଲେ। ଏହା ପୂର୍ବରୁ ଘଟଣା ବେଳେ କେନ୍ଦ୍ରାପଡ଼ା ଏସପି ଥିବା ଗଜଭିୟେଙ୍କୁ ପୋଲିସ୍ ମୁଖ୍ୟ କାର୍ଯ୍ୟାଳୟକୁ ବଦଳି କରି ଅଣାଯାଇଥିଲା। ତେବେ ତାଙ୍କୁ କୌଣସି ଦାୟିତ୍ୱ ଦିଆଯାଇ ନଥିଲା। ଅନ୍ୟପକ୍ଷରେ ବିଜେପି, କଂଗ୍ରେସ ସମେତ ରାଜ୍ୟ ଓକିଲ ସଂଘ ଓ ଅନ୍ୟ ସାମାଜିକ ସଂଗଠନଗୁଡ଼ିକ ଗଜଭିୟେଙ୍କ ନିଲମ୍ବନରେ ବି ସନ୍ତୁଷ୍ଟ ହୋଇ ନାହାନ୍ତି। ତାଙ୍କୁ ଗିରଫ କରିବାକୁ ଦାବି କରିଛନ୍ତି। ଏହି ଦାବି ନେଇ ଆଜି ବିଜେପି ପକ୍ଷରୁ ପୋଲିସ୍ ଡିଜିଙ୍କ ଅଫିସ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା ଓ ତା’ସହିତ ଡିଜିଙ୍କୁ ଏକ ଦାବିପତ୍ର ମଧ୍ୟ ଦିଆଯାଇଥିଲା।