ପଦୋନ୍ନତି କ୍ଷେତ୍ରରେ ଜାରି ରହିବ ସଂରକ୍ଷଣ

ନୂଆଦିଲ୍ଲୀ: ଆଇନ ଅନୁସାରେ ସରକାରୀ ଚାକିରିରେ ପଦୋନ୍ନତି କ୍ଷେତ୍ରରେ ଥିବା ସଂରକ୍ଷଣ ପୂର୍ବପରି କାଏମ  ରହିବ। ଯେପର୍ଯ୍ୟନ୍ତ ସାମ୍ବିଧାନିକ ଶୁଣାଣି ସମ୍ପୂର୍ଣ୍ଣ ନ ହୋଇଛି ସେ ପର୍ଯ୍ୟନ୍ତ ସଂରକ୍ଷଣ ବ୍ୟବସ୍ଥା ଚାଲୁ ରହିବ ବୋଲି ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି।

ପୂର୍ବରୁ ଦେଶର ବିଭିନ୍ନ ହାଇକୋର୍ଟ ସରକାରୀ ଚାକିରିରେ ପଦୋନ୍ନତି କ୍ଷେତ୍ରରେ ଥିବା ସଂରକ୍ଷଣ ବ୍ୟବସ୍ଥାକୁ ରଦ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ପରେ ହାଇକୋର୍ଟର ଏହି ନିଷ୍ପତ୍ତି ବିରୋଧରେ କେତେକ ରାଜ୍ୟ ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହାପରେ ମାମଲାର ଶୁଣାଣି ୫ ଜଣିଆ ଖଣ୍ଡପୀଠ କରିବେ ବୋଲି  ଗତବର୍ଷ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଏପର୍ଯ୍ୟନ୍ତ ଏ ବିଷୟରେ ବିଚାର ବିମର୍ଷ ଚାଲୁ ରହିଛି।

କିଛି ରାଜ୍ୟ ସରକାର କୋର୍ଟରେ ଦେଇଥିବା ଦଲିଲ୍‌ରେ ଯୁକ୍ତି ଦର୍ଶାଇଥିଲେ ଯେ, ରାଷ୍ଟ୍ରପତି ଏସ୍‌ସି ଓ ଏସ୍‌ଟିଙ୍କ  ଅନଗ୍ରସରତାକୁ ନିର୍ଦ୍ଧାରଣ କରି ଅଧିସୂଚନା ଜାରି କରିଛନ୍ତି। ତେବେ ଏହାକୁ ପୁନର୍ବାର ତର୍ଜମା କରାଯାଇ ପାରିବ ନାହିଁ।