ପାଣ୍ଡିଆନଙ୍କ ଘରେ ବିଜେପି କର୍ମୀଙ୍କ ଆକ୍ରମଣ ଘଟଣା ପରେ ଏମିତି ପ୍ରତିକ୍ରିୟା ରଖିଲେ ବିଭିନ୍ନ ଦଳର ନେତା

ଭୁବନେଶ୍ୱର(ଓଡ଼ିଶା ରିପୋର୍ଟର): ତୀବ୍ର ହେଲା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ଭି.କାର୍ତ୍ତିକେୟନ୍‌ ପାଣ୍ଡିଆନଙ୍କ ବିରୋଧରେ ପ୍ରତିବାଦର ସ୍ୱର। ଆଜି ବିଜେପି କର୍ମୀ ପାଣ୍ଡିଆନଙ୍କ ସରକାରୀ କ୍ୱାର୍ଟର୍ସ ଭିତରକୁ ଧସେଇ ପଶି ଭଙ୍ଗାରୁଜା କରିଛନ୍ତି। କ୍ୱାର୍ଟର୍ସ ଭିତରେ ପଶି ଫୁଲ କୁଣ୍ଡ ଓ ବାଇକ୍ ଭାଙ୍ଗିବା ସହ ଫାଟକକୁ ଗୋବର ମାଡ଼ କରିଛନ୍ତି ବିଜେପି କର୍ମୀ। ନିର୍ଦ୍ଦିଷ୍ଟ ସରକାରୀ ଦଳ ପାଇଁ ପାଣ୍ଡିଆନ୍ କାମ କରୁଥିବା ଅଭିଯୋଗ ଆଣି ବିଜେପି କର୍ମୀ ତାଙ୍କ ରୋଷ ଦେଖାଇଛନ୍ତି। ଏମିତିକି ପାଣ୍ଡିଆନଙ୍କ ଘର ଭିତରକୁ ମଧ୍ୟ ଧସେଇ ପଶିବାକୁ ଉଦ୍ୟମ କରିଥିଲେ ବିଜେପି କର୍ମୀ।

ବେଶ୍ କିଛି ଦିନ ଧରି ଥାର୍ଡ ଫ୍ଲୋରର ଏହି ଅଣ ଓଡ଼ିଆ ଅଫିସର ପାଣ୍ଡିଆନଙ୍କୁ ବିଭିନ୍ନ ଆଡୁ ଟାର୍ଗେଟ୍ କରାଯାଉଛି। ଖୋଦ୍ ବିଜେଡିର ନେତାମାନେ ବି ତାଙ୍କ କାର୍ଯ୍ୟ କଳାପକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିବା ସହ କଡ଼ା ସମାଲୋଚନା କରୁଛନ୍ତି। ଏମିତିକି ଦାବି ହାସଲ ପାଇଁ ରାଜଧାନୀରେ ଆନ୍ଦୋଳନ କରୁଥିବା ଶିକ୍ଷକ ସଂଘ ବି ପାଣ୍ଡିଆନଙ୍କୁ ଟାର୍ଗେଟ୍ କରି ଦୁଇ ଦିନ ତଳେ ବିଷୋଦଗାର କରିଥିଲେ।

ପାଣ୍ଡିଆନଙ୍କ ଘରକୁ ଗୋବର ଫିଙ୍ଗିବା ନେଇ କାର୍ଯ୍ୟାନୁଷ୍ଠାନ: ଏହି ଘଟଣା ପରେ ପୋଲିସ କମିଶନର, ଡିସିପି ଓ ଘଟଣାସ୍ଥଳକୁ ଯାଇ ସ୍ଥିତି ପରଖିବା ସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି। ଏହି ଘଟଣାରେ ବର୍ତ୍ତମାନ ସୁଦ୍ଧା ୪ଜଣ ବିଜେପି କର୍ମୀଙ୍କୁ ଗିରଫ କରାଯାଇଛି। ସେମାନେ ହେଲେ ଯୁଗଜ୍ୟୋତି ସ୍ୱାଇଁ, ରଶ୍ମୀରଂଜନ ମୁଦୁଲି, ବିଭୂତି ଭୂଷଣ ପୃଷ୍ଟି ଏବଂ ବିଶ୍ୱରଂଜନ ବଡ଼ଜେନା।

ପାଣ୍ଡିଆନଙ୍କ ଘରେ ଗୋବର ଫିଙ୍ଗିବା ନେଇ କିଏ କ’ଣ କହିଲେ: ବିଜେପି ଉପସଭାପତି ସମୀର ମହାନ୍ତି କହିଛନ୍ତି,-“ସୁପର ସିଏମ୍ ପାଣ୍ଡିଆନ୍ ଓଡ଼ିଶାକୁ ନଷ୍ଟ କରିଦେଲେଣି। ସରକାରୀ ଚାକିରିଆ ହୋଇ ଏକ ନିର୍ଦ୍ଦିଷ୍ଟ ଦଳ ପାଇଁ କାମ କରୁଛନ୍ତି। ପାଣ୍ଡିଆନଙ୍କ ପାଇଁ ଓଡ଼ିଶାର ମାଆ, ଭଉଣୀଙ୍କ ଇଜ୍ଜତ ଯାଉଛି। ପାଣ୍ଡିଆନ ସୁଧରିଯାଆନ୍ତୁ, ନ ସୁଧୁରିଲେ ପ୍ରତିବାଦ ବଢ଼ିବ।”

ସେହିପରି ବିଜେଡି ମୁଖପାତ୍ର ପ୍ରତାପ ଦେବ କହିଛନ୍ତି,“ପାଣ୍ଡିଆନଙ୍କ ଘରକୁ ବିଜେପି କର୍ମୀଙ୍କ ଗୋବର ଫିଙ୍ଗିବା ଘଟଣା ଅତ୍ୟନ୍ତ ନିନ୍ଦନୀୟ ଓ ଦୁର୍ଭାଗ୍ୟଜନକ। ପ୍ରଶାସନିକ ଅଧିକାରୀଙ୍କୁ ଆକ୍ରମଣ ଅସହ୍ୟ ମନୋଭାବର ପରିଚୟ। ଯେଉଁମାନେ ଏଥିରେ ଜଡ଼ିତ ସେମାନଙ୍କୁ ଗିରଫ କରାଯାଉ।”

ସେ ଆହୁରି କହିଛନ୍ତି,- ବିଜେପି ରାଜ୍ୟ ଶାସନ କରିବ ବୋଲି କହୁଛି, କିପରି କରିବେ ଏଥିରୁ ସ୍ପଷ୍ଟ ହେଉଛି। ଏଠାରେ ହିଟଲରୀ ଶାସନ ଚଳିବ ନାହିଁ।

ବିରୋଧୀ ଦଳ ନେତା ନରସିଂହ ମିଶ୍ର କହିଛନ୍ତି- ସରକାରୀ ଅଧିକାରୀଙ୍କ ଘରେ ବିଜେପି କର୍ମୀଙ୍କ ଆକ୍ରମଣ ଘୃଣ୍ୟ। ଦାଦାଗିରି କରି ଏବେ କ୍ଷମତା ଦାଖଲ ପାଇଁ ଓଡ଼ିଶାରେ ପହଞ୍ଚିଛନ୍ତି। ଭୟଭୀତ କରି କ୍ଷମତାକୁ ‌ଆସିବାକୁ ଅପଚେଷ୍ଟା କରୁଛନ୍ତି।

କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା କହିଛନ୍ତି,- ପ୍ରତିବାଦ ପାଇଁ କାହା ଘରକୁ ଟାର୍ଗେଟ କରାଯିବା ଘଟଣାକୁ ମୁଁ ଗ୍ରହଣ କରୁନି। କିନ୍ତୁ ପାଣ୍ଡିଆନ ମୋ ଉପରେ ଆକ୍ରମଣ ପାଇଁ ଲୋକ ଲଗାଇଥିଲେ। କିଛି ଲୋକଙ୍କୁ ଲଗାଇ ମୋ ଉପରେ ଅଣ୍ଡା, ପଥର ମାଡ଼ କରାଇଥିଲେ। ଆକ୍ରମଣକାରୀଙ୍କୁ ସେ ସୁରକ୍ଷା ମଧ୍ୟ ଦେଇଥିଲେ। ଘଟଣାର ୪ ମାସ ପର୍ଯ୍ୟନ୍ତ କାହାରିକୁ ଗିରଫ କରାଯାଇ ନ ଥିଲା ଦୁର୍ନୀତି କରିବା ଓ ଗୁଣ୍ଡା ପୋଷିବା ନେଇ ତାଙ୍କ ନାଁରେ ଗୁରୁତର ଅଭିଯୋଗ ରହିଛି। ଏସବୁ ପାଇଁ ତାଙ୍କୁ ନିହାତି ଉତ୍ତର ରଖିବାକୁ ପଡ଼ିବ।

ପାଣ୍ଡିଆନଙ୍କ ଘରକୁ ବିଜେପି କର୍ମୀଙ୍କ ଗୋବର ମାଡ଼ ଘଟଣା ନେଇ  OAS ସଂଘ ସମ୍ପାଦକ ଜ୍ୟୋତିରଞ୍ଜନ ମିଶ୍ର କହିଛନ୍ତି- ଓଡ଼ିଶା ଇତିହାସରେ ଏମିତି ହୋଇ ନ ଥିଲା। ଏହି ଘଟଣାକୁ ଦୃଢ଼ ନିନ୍ଦା କରୁଛୁ। କାର୍ଯ୍ୟକାରିଣୀ ବୈଠକରେ ଆଗାମୀ ନିଷ୍ପତ୍ତି ନିଆଯିବ।