୯ କିଲୋମିଟର ଷ୍ଟ୍ରେଚରରେ ବୁହା ହେଲେ ପ୍ରସୂତି: କାହିଁକି ଓ କେଉଁଠି ଜାଣନ୍ତୁ

rayagadaକଲ୍ୟାଣସିଂହପୁର: ଅନ୍ଧବିଶ୍ୱାସ ଓ କୁସଂସ୍କାର ପାଇଁ ଗୁରୁତର ହେଲେ ପ୍ରସୂତି ମହିଳା। ତେବେ ଡାକ୍ତର ଓ ଗଣମାଧ୍ୟମ ପ୍ରତିନିଧିଙ୍କ ସହାୟତା ଯୋଗୁ ବଞ୍ଚିଗଲେ। ରାୟଗଡ଼ା ଜିଲ୍ଲା କଲ୍ୟାଣସିଂପୁର ଅଞ୍ଚଳରେ ଗତକାଲି ରାତିରେ ଦେଖିବାକୁ ମିଳିଛି ଏମିତି ଏକ ଅଭାବନୀୟ ଘଟଣା। କରପା ପଞ୍ଚାୟତର ସିଂଘାମୁହିଁ ଗାଁର ଜଣେ ପ୍ରସୂତିଙ୍କ ଗର୍ଭଯନ୍ତ୍ରଣା ହେବା ଖବର ପାଇ ଆଶା କର୍ମୀ ତାଙ୍କ ଘରେ ପହଞ୍ଚିଥିଲେ ଓ ତାଙ୍କୁ ଡାକ୍ତରଖାନା ନେବାକୁ ପରାମର୍ଶ ଦେଇଥିଲେ। ହେଲେ ମହିଳାଙ୍କର ରକ୍ତସ୍ରାବ ହେଉଥିବାରୁ ତାଙ୍କୁ ଗାଁର ପୁରୁଷ ଲୋକମାନେ ତାଙ୍କୁ ଛୁଇଁବାକୁ ମନା କରି ଦେଇଥିଲେ। ସେମାନଙ୍କର ଏକ ଅନ୍ଧବିଶ୍ୱାସ ରହିଛି ଯେ କୌଣସି ମହିଳାଙ୍କର ରକ୍ତସ୍ରାବ ହେଉଥିଲେ ପୁରୁଷମାନେ ତାଙ୍କୁ ଛୁଇଁବେ ନାହିଁ। ଫଳରେ ଆଶାକର୍ମୀ ଡାକ୍ତରଙ୍କୁ ଫୋନ୍‌ କରି ଗାଁକୁ ଡକାଇଥିଲେ। କଲ୍ୟାଣସିଂହପୁର ଗୋଷ୍ଠୀ ସ୍ୱାସ୍ଥକେନ୍ଦ୍ରରୁ ଡାକ୍ତର ପହଞ୍ଚିବା ପରେ ମହିଳାଙ୍କ ଅବସ୍ଥାର ଗୁରୁତର ହୋଇଥିବା ଜାଣି ତାଙ୍କୁ ତୁରନ୍ତ ଡାକ୍ତରଖାନ ନେବାକୁ ବ୍ୟବସ୍ଥା କରିଥିଲେ। ଗାଁକୁ ଆମ୍ବୁଲାନ୍ସ ଯିବାକୁ ରାସ୍ତା ନ ଥିବାରୁ ନିଜେ ଡାକ୍ତର ଓ ଘଟଣାସ୍ଥଳରେ ପହଞ୍ଚିଥିବା କିଛି ଗଣମାଧ୍ୟମ ପ୍ରତିନିଧି ଅନ୍ଧାରରେ ମହିଳାଙ୍କୁ ଷ୍ଟ୍ରେଚରରେ ୪ କିଲୋମିଟର ବାଟ ବୋହି ଆଣିଥିଲେ। ସେମାନେ ପ୍ରାୟ ଚାରି କିଲୋମିଟର ମହିଳାଙ୍କୁ ବୋହି ଆଣିବା ପରେ ସ୍ଥାନୀୟ ଲୋକଙ୍କର ଚେତା ପଶିଲା। ତା’ପରେ ସେମାନେ ସହଯୋଗ କରିବାକୁ ଆଗେଇ ଆସିଲେ ଏବଂ   ଉକ୍ତ ମହିଳାଙ୍କୁ ଆଉ ୫ କିଲୋମିଟର ବୋହି କଲ୍ୟାଣସିଂହପୁର ଡାକ୍ତରଖାନା ଆଣିଥିଲେ। ତେବେ ଅବସ୍ଥା ଗୁରୁତର ହେବାରୁ ତାଙ୍କୁ ସେଠାରୁ ଆମ୍ବୁଲାନ୍ସ ଯୋଗେ ରାୟଗଡ଼ା ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।

ଏଏନ୍‌ଏମ୍‌ ସନ୍ଧ୍ୟାରାଣୀ ପଥି କହିଛନ୍ତି,“ ମହିଳାଙ୍କୁ ଡାକ୍ତରଖାନା ନେବାକୁ ଆମେ ସମସ୍ତେ ଗାଁ ଲୋକଙ୍କୁ ବୁଝାସୁଝା କରିଥିଲୁ। କିନ୍ତୁ କେହି ଶୁଣି ନଥିଲେ। ଏମିତି ଗଣମାଧ୍ୟମ ପ୍ରତିନିଧିମାନେ ମଧ୍ୟ ବୁଝାଇଥିଲେ। ହେଲେ କେହି ଶୁଣି ନଥିଲେ। ତଥାପି ବହୁ ବୁଝାସୁଝା ପରେ ଗାଁର ୪ ଜଣ ଲୋକେ ମହିଳାଙ୍କୁ ଡାକ୍ତରଖାନାକୁ ନେବାକୁ ରାଜି ହୋଇଥିଲେ। ପ୍ରଥମେ ଡାକ୍ତର ଓ ସାମ୍ୱାଦିକ ଭାଇମାନେ ବୋହି ଥିଲେ।”