ଭୁବନେଶ୍ୱର: ନାଲଦାକୁ ଛାଡି ଏପ୍ରିଲ ୧ରୁ ରାଜ୍ୟରେ ଥିବା ସମସ୍ତ ଅନ୍ତଃରାଜ୍ୟ ଚେକ୍ଗେଟ ଉଚ୍ଛେଦ ହେବ। ଆଜି ଅର୍ଥମନ୍ତ୍ରୀ ପ୍ରଦୀପ ଅମାତ ବିଧାନସଭାରେ ଏହି ସୂଚନା ଦେଇଛନ୍ତି। ଇସ୍ପାତ ଓ ଖଣି ବିଭାଗର ଅଧିକାରୀ ଏହି ଚେକ୍ଗେଟ୍ ପରିଚାଳନା କରିବେ। ପ୍ରସ୍ତାବିତ ଦ୍ରବ୍ୟ ଓ ସେବା କର ଅର୍ଥାତ ଜିଏସ୍ଟି ବ୍ୟବସ୍ଥାରେ ଚେକ୍ଗେଟ୍ ସ୍ଥାପନ ବ୍ୟବସ୍ଥା ନାହିଁ।
ଉଚ୍ଛେଦ ପରେ ବିଭିନ୍ନ ବିଭାଗ ଭ୍ରାମ୍ୟମାଣ ଯାନରେ ଆଧୁନିକ ଯନ୍ତ୍ରପାତି ଓ ଉପକରଣ ବ୍ୟବହାର କରି ଏନ୍ଫୋରସ୍ମେଣ୍ଟ କାର୍ଯ୍ୟ କରାଯିବ। ଏହା ଦ୍ୱାରା ଦ୍ରବ୍ୟ ଓ କଂଚାମାଲ ପରିବହନ ସହଜ ହେବ। ତେବେ ମାଲବୁହା ଗାଡି ଯିବାଆସିବାରେ ଚେକ୍ଗେଟ୍ ପ୍ରତିବନ୍ଧକ ସୃଷ୍ଟି କରିବା ସହ ଦୁର୍ନୀତି କାରବାରର ଅଭିଯୋଗ ମଧ୍ୟ ଆସୁଥିଲା।