ଆଇଓସିଏଲ୍‌ ସହ ସୁଧମୁକ୍ତ ଋଣ ଚୁକ୍ତି ପ୍ରତ୍ୟାହାର କଲେ ରାଜ୍ୟ ସରକାର

ଭୁବନେଶ୍ୱର: ଆଇଓସିଏଲ୍‌ ସହ ସୁଧମୁକ୍ତ ଋଣ ନେଇ ରାଜ୍ୟ ସରକାର କରିଥିବା ଚୁକ୍ତିକୁ ପ୍ରତ୍ୟାହାର କରି ନେଇଛନ୍ତି। ଗତକାଲି ଏନେଇ କ୍ୟାବିନେଟ୍‌ରେ ନିଷ୍ପତ୍ତି ନିଆଯାଇଥିବା ବେଳେ ଆଜି ବିଧାନସଭାରେ ଅର୍ଥମନ୍ତ୍ରୀ ପ୍ରଦୀପ ଅମାତ ଏହି ସୂଚନା ଦେଇଛନ୍ତି। ୨୦୦୪ରେ ସୁଧମୁକ୍ତ ଋଣ ନେଇ ରାଜ୍ୟ ସରକାର ଆଇଓସିଏଲ୍‌ ସହ ଚୁକ୍ତି କରିଥିଲେ।

ଭାଟ୍‌ ଛାଡ ନେଇ ହୋଇଥିବା ଏହି ଚୁକ୍ତି ଯୋଗୁଁ ରାଜ୍ୟ ସରକାରଙ୍କୁ ୨୨,୭୪୫ କୋଟି ଟଙ୍କାର କ୍ଷତି ସହିବାକୁ ପଡ଼ିବ ବୋଲି ଅର୍ଥମନ୍ତ୍ରୀ କହିଛନ୍ତି। ସେ କହିଛନ୍ତି,“ଏମ୍‌ଓୟୁ ଅନୁସାରେ ପ୍ରକଳ୍ପ କାମ ୭ ବର୍ଷ ବିଳମ୍ବରେ ସରିଛି। ଏହାସହ ଆଇଓସିଏଲ୍‌ ମଧ୍ୟ ଏକତରଫା ଭାବେ ଉତ୍ପାଦନ କ୍ଷମତା ବୃଦ୍ଧି କରିଛି। ଆଇଓସିଏଲ୍‌ ଲାଭ କରୁଥିବା କମ୍ପାନୀ, ସୁଧମୁକ୍ତ ଋଣର ଆବଶ୍ୟକତା ନାହିଁ।”

ସୂଚନାଯୋଗ୍ୟ ଆଇଓସିଏଲ୍‌ ଏକତରଫା ଭାବେ ବିଶୋଧନାଗାରର କ୍ଷମତା ବୃଦ୍ଧି କରିଛି। ଏମ୍‌ଓୟୁରେ ୯ ମିଲିୟନ ଟନ୍‌ ଉତ୍ପାଦନ କରିବାକୁ ଅନୁମତି ମିଳିଥିବା ବେଳେ ଆଇଓସିଏଲ୍‌କୁ ଏହାକୁ ବଢାଇ ୧୫ ମିଲିୟନ ଟନ୍‌ କରିଛି।