ବଣାଇ ଜିଲ୍ଲା ପରିଷଦ ସଭ୍ୟ ଦଶରଥ ଓରାମ୍ ହତ୍ୟା ଘଟଣା: ବାପ, ପୁଅ ଗିରଫ

ବଣାଇ: ସୁନ୍ଦରଗଡ଼ ବଣାଇ ଜିଲ୍ଲା ପରିଷଦ ସଭ୍ୟ ଦଶରଥ ଓରାମ୍ ହତ୍ୟା ଘଟଣାରେ ପୋଲିସ ଦୁଇଜଣଙ୍କୁ ଗିରଫ କରିଛି । ଗିରଫ ଦ୍ୱୟ ବାପ ପୁଅ ବୋଲି ପୋଲିସ କହିଛି । ଅଭିଯୁକ୍ତମାନଙ୍କ ପାଖରୁ ହତ୍ୟାରେ ବ୍ୟବହୃତ ଏକ ପନିକି ଓ ବାଇକ ଜବତ କରିଛି ପୋଲିସ। ଏପଟେ ଦଶରଥଙ୍କ ହତ୍ୟା ଘଟଣାର ସିବିଆଇ ତଦନ୍ତ କରାଯିବାକୁ ପରିବାର ପକ୍ଷରୁ ଦାବି କରାଯାଇଛି।

ଗୁରୁବାର ବଣାଇ ଥାନାର ବାବୁ ନୂଆ ଗାଁରେ ଆୟୋଜିତ ରାବଣପୋଡ଼ି ଉତ୍ସବରେ ମୁଖ୍ୟ ଅତିଥି ଭାବେ ଦଶରଥ ଓରାମ୍ ଯୋଗଦେଇଥିଲେ।  ବାଇକରେ ଏକୁଟିଆ ଘରକୁ ଫେରୁଥିବା ବେଳେ ଦେଓଗାଁ ନିକଟରେ ତାଙ୍କୁ ଦୁର୍ବୃତ୍ତମାନେ ହତ୍ୟା କରିଥିବା ଅଭିଯୋଗ ହୋଇଥିଲା। ଦଶରଥଙ୍କ ଶରୀରର ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଛି। ପୋଲିସ ଘଟଣାର ତଦନ୍ତ ଚଳାଇଥିବା ବେଳେ, ଗତକାଲି ସ୍ଥାନୀୟ ଲୋକେ ହତ୍ୟାକାରୀଙ୍କୁ ଧରିବା ଦାବିରେ ରାସ୍ତାରୋକ କରିଥିଲେ। ୪୨ ବର୍ଷୀୟ ଦଶରଥ ଅବିବାହିତ ଥିଲେ।