ଜୟପୁର: କୋରାପୁଟ ଜିଲ୍ଲା ଜୟପୁର ବ୍ଲକ କୁମୁଲିପୁଟ ନିକଟ ୨୬ ନମ୍ବର ଜାତୀୟ ରାଜପଥରୁ ଗତ ରାତିରେ ଦୁର୍ବୃତ୍ତମାନେ ଏକ କାଜୁ ବୋଝେଇ ମ୍ୟାକ୍ସ ପିକଅପକୁ ଲୁଟି ନେଇଛନ୍ତି। ଏକ ବାଇକରେ ୩ଜଣ ଦୁର୍ବୃତ୍ତ ଆସି ପିକଅପ୍ ଡ୍ରାଇଭରଙ୍କୁ ମାଡ ମାରିବା ସହ ମାରଣାସ୍ତ୍ର ଦେଖାଇ ଗାଡିଟିକୁ ଲୁଟି ନେଇଥିଲେ। ଏ ନେଇ ଡ୍ରାଇଭର କାଜୁ ମାଲିକଙ୍କୁ ଜଣାଇବା ପରେ ସେ ଆମ୍ବାଗୁଡା ଫାଣ୍ଡିରେ ଲିଖିତ ଅଭିଯୋଗ କରିଥିଲେ।
ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। କୁମୁଲିପୁଟର ଏକ ମିଲ ସାମନାରେ ଲାଗିଥିବା ସିସିଟିଭି ଫୁଟେଜକୁ ପୋଲିସ ଅନୁଧ୍ୟାନ କରୁଛି। କାଜୁ ମିଲର କିଛି କର୍ମଚାରୀ ଓ ଡ୍ରାଇଭର ଏହି ଲୁଟରେ ସମ୍ପୃକ୍ତ ଥିବା ପୋଲିସ ସନ୍ଦେହ କରୁଛି। ଜୟପୁର ବ୍ଲକ ପଲକାପୁଟ ସ୍ଥିତ ଏକ କାଜୁ ମିଲରୁ ୧୪୯ଟି ଟିଣ ଡବାରେ କାଜୁ ପ୍ୟାକିଂ ହୋଇ ପିକଅପରେ ବୋରିଗୁମ୍ମା ଯାଉଥିବା ବେଳେ ଲୁଟ୍ ହୋଇଥିଲା।