ଜୟପୁର: ବ୍ଲାକ୍ ବକ୍ ବା କୃଷ୍ଣସାର ମୃଗ ତଥା କଳା ହରିଣ ଶିକାର ମାମଲାରେ ବଲିଉଡର ଭାଇଜାନ ସଲମାନ ଖାନ୍ଙ୍କୁ ମିଳିଛି ସାମୟିକ ଆଶ୍ୱସ୍ତି। ସୋମବାର ଦିନ ରାଜସ୍ଥାନ ହାଇକୋର୍ଟ ବ୍ଲାକବକ୍ ଶିକାର ମାମଲାରେ ସୁପରଷ୍ଟାର ସଲମାନ ଖାନଙ୍କ ମାମଲା ସ୍ଥାନାନ୍ତର ଆବେଦନକୁ ଅନୁମୋଦନ କରିଛନ୍ତି। ନ୍ୟୁଜ୍ ଏଜେନ୍ସି ANI ଅନୁଯାୟୀ ବର୍ତ୍ତମାନ ସଲମାନ ଖାନଙ୍କ ସହ ଜଡିତ ସମସ୍ତ ଆବେଦନର ଶୁଣାଣି ରାଜସ୍ଥାନ ହାଇକୋର୍ଟରେ ହେବ।
ସୂଚନା ମୁତାବକ, ସଲମାନ ଖାନ୍ ସେସନ୍ କୋର୍ଟରେ ବିଚାରାଧୀନ ଆବେଦନକୁ ହାଇକୋର୍ଟକୁ ସ୍ଥାନାନ୍ତର କରିବା ପାଇଁ ସେସନ କୋର୍ଟରେ ଏକ ଆବେଦନ କରିଥିଲେ, ଯାହା ପରେ ଏବେ ଏହି ନିଷ୍ପତ୍ତି ସାମ୍ନାକୁ ଆସିଛି।
ଉଲ୍ଲେଖ ଯୋଗ୍ୟ ଯେ, କଳା ହରିଣ ଶିକାର ମାଲାରେ ସଲମାନ ଖାନ୍ ଏବେ ଜାମିନରେ ଅଛନ୍ତି। ୫ ଏପ୍ରିଲ ୨୦୧୮ରେ ଟ୍ରାଏଲ କୋର୍ଟ ସଲମାନ ଖାନଙ୍କୁ କଳା ହରିଣ ଶିକାର ମାମଲାରେ ଦୋଷୀ ସାବ୍ୟସ୍ତ କରି ତାଙ୍କୁ ୫ ବର୍ଷର ଜେଲ ଦଣ୍ଡାଦେଶରେ ଦଣ୍ଡିତ କରିଥିଲେ। ଏହି ମାମଲାରେ ସହ-ଅଭିଯୁକ୍ତ, ଅଭିନେତା ସୈଫ ଅଲ୍ଲି ଖାନ, ଅଭିନେତ୍ରୀ ନୀଲମ, ତବୁ ଏବଂ ସୋନାଲି ବାନ୍ଦ୍ରେ ନିର୍ଦ୍ଦୋଷରେ ଖଲାସ ହୋଇଥିଲେ।
ସଲମାନ ଖାନଙ୍କୁ ସେହି ସମୟରେ ଗିରଫ କରାଯାଇ ଯୋଧପୁର ଜେଲକୁ ପଠାଯାଇଥିଲା। ଏହାପରେ ତିନି ଦିନ ପରେ କୋର୍ଟ ଦେଇଥିବା ଜାମିନ ଆଧାରରେ ତାଙ୍କୁ ଜେଲ୍ରୁ ମୁକ୍ତ କରାଯାଇଥିଲା। ଏଥିସହ କୋର୍ଟ ସଲମାନଙ୍କୁ ଆର୍ମସ ଆକ୍ଟ ମାମଲାରେ ନିର୍ଦ୍ଦୋଷରେ ଖଲାସ କରିଥିଲେ। ତେବେ କୋର୍ଟଙ୍କ ଏହି ନିଷ୍ପତ୍ତିକୁ ରାଜ୍ୟ ସରକାର ଉପର କୋର୍ଟରେ ଚ୍ୟାଲେଞ୍ଜ କରିଛନ୍ତି।
ସୂଚନା ମୁତାବକ, ୧୯୯୮ରେ ରିଲିଜ ହୋଇଥିବା ଫିଲ୍ମ 'ହମ୍ ସାଥ ସାଥ ହୈ'ର ଜୋଧପୁରରେ ସୁଟିଂ ସମୟ ସଲମାନ ଖାନ୍ ତିନୋଟି ଭିନ୍ନ ଭିନ୍ନ ସ୍ଥାନରେ କଳା ହରିଣ ଶିକାର କରିଥିବା ଅଭିଯୋଗ ରହିଛି। ସେହିପରି ତାଙ୍କ ବିରୋଧରେ ଘୋଡା ଫାର୍ମ ହାଉସରେ ମୃଗ ଶିକାର କରିବା ନେଇ ଭିନ୍ନ ଭିନ୍ନ ମାମଲା ରୁଜୁ ହୋଇଛି।
https://twitter.com/ANI/status/1505859322537865216?s=20&t=LM01QMXU2feeTgOOnS-LSA