ବାପାମାଆଙ୍କ ପାଇଁ ଦିନେ ଅଲୋଡ଼ା ଥିଲେ କଙ୍ଗନା

ମୁମ୍ବାଇ: ବଲିଉଡ କୁଇନ୍ କଙ୍ଗନା ରାଣାୱତଙ୍କୁ ୩୧ ବର୍ଷ ହୋଇଛି। ଆଜି ହେଉଛି କଙ୍ଗନାଙ୍କ ୩୧ତମ ଜନ୍ମଦିନ। ୧୯୮୭ ମସିହା ମାର୍ଚ୍ଚ ୨୩ ତାରିଖରେ ହିମାଚଳ ପ୍ରଦେଶର ମଣ୍ଡି ଜିଲ୍ଲା ସ୍ଥିତ ସୁରଜପୁରଠାରେ ଜନ୍ମଗ୍ରହଣ କରିଥିଲେ। ଆଜିର ଦିନରେ ଆମେ କଙ୍ଗନାଙ୍କ ବିଷୟରେ ଏମିତି ଏକ କଥା କହିବାକୁ ଯାଉଛୁ, ଯାହା ଶିକ୍ଷିତ ସମାଜ ପାଇଁ କଳାଦାଗ ହୋଇ ରହିଛି। ଜାଣିଲେ ଆଶ୍ଚର୍ଯ୍ୟ ଲାଗିବ ବଲିଉଡରେ ଏବେ ରାଜ୍‌ କରୁଥିବା ଏହି ଷ୍ଟାର ଦିନେ ପରିବାର ଲୋକଙ୍କ ପାଇଁ ଅଲୋଡ଼ା ଥିଲେ। ଅତୀତରେ ନିଜେ କଙ୍ଗନା ଏହାର ଖୁଲାସା କରିଥିଲେ। ଆସନ୍ତୁ ଜାଣିବା କାହିଁ ଏହି ବିଉଟି କୁଲନ୍‌ଙ୍କ ଜନ୍ମରେ ଖୁସି ନଥିଲେ ପରିବାର ଲୋକେ।


ଏକ ସାକ୍ଷାତକାରରେ କଙ୍ଗନା କହିଥିଲେ, “ଯେତେବେଳେ ମୋର ଜନ୍ମ ହୋଇଥିଲା, ମୋ ମାତାପିତା ଖୁସି ନଥିଲେ। କାରଣ ମୋ ଉପରେ ଆଉ ଏକ ଝିଅ ଥିଲା। ମୋ ବଡ଼ ଭଉଣୀ ଯେତେବେଳେ ଜନ୍ମ ହୋଇଥିଲେ, ପୂରା ପରିବାର ବେଶ୍ ଖୁସି ଥିଲେ। ହେଲେ ଦ୍ୱିତୀୟ ସନ୍ତାନ ଭାବେ ଯେବେ ମୁଁ ଜନ୍ମ ହୋଇଥିଲି, ପରିବାର ଲୋକେ ଦୁଃଖରେ ଭାଙ୍ଗି ପଡ଼ିଥିଲେ। ଖାଲି ସେତିକି ନୁହେଁ ପରିବାର ଲୋକେ ମୋତେ ଅଲୋଡ଼ା ଶିଶୁ ମାନୁଥିଲେ।”
କଙ୍ଗନାଙ୍କ ପିତା ଅମରଦୀପ ରାଣାୱତ୍ ଜଣେ ବିଜନେସ୍‌ ମ୍ୟାନ ଓ ମାଆ ଆଶା ରାଣାୱତ୍ ଶିକ୍ଷୟତ୍ରୀ। ହେଲେ କଙ୍ଗନାଙ୍କ ଅତି ନିଜର ହେଉଛନ୍ତି ତାଙ୍କ ବଡ଼ ଭଉଣୀ ରଙ୍ଗୋଲି।
ଏସିଡ୍ ଆଟାକ୍ ପରି ମରଣାତ୍ମକ ଯନ୍ତ୍ରଣା ସହି ନୂଆ ରୂପରେ ଜିଇଁବା ଆରମ୍ଭ କରିଥିବା ରଙ୍ଗୋଲି ଉପରେ ବାୟୋପିକ ବାନାଇବାକୁ କଙ୍ଗନାଙ୍କର ଇଚ୍ଛା ରହିଛି। କଙ୍ଗନାଙ୍କର ଜଣେ ଭାଇ ମଧ୍ୟ ଅଛନ୍ତି, ତାଙ୍କ ନାଁ ଅକ୍ଷତ।
୧୫ ବର୍ଷରେ ହିରୋଇନ ହେବାକୁ ଲୁଚି ପଳାଇଥିଲେ ଘରୁ
କଙ୍ଗନାଙ୍କୁ ଆରମ୍ଭରୁ ହିଁ ମଡେଲିଂର ସଉକ ଥିଲା। ଅଭିନୟ କରିବାକୁ ମଧ୍ୟ ଭଲ ଲାଗୁଥିଲା। ଏହି ନିଶା ତାଙ୍କୁ ମୁମ୍ବାଇର ରୂପେଲି ଦୁନିଆକୁ ଟାଣି ଆଣିଥିଲା। ମାତ୍ର ୧୫ ବର୍ଷ ବୟସରେ କଙ୍ଗନା ଘରୁ ଲୁଛି ଦିଲ୍ଲୀ ପଳାଇଥିଲେ। ଦିଲ୍ଲୀର ହ୍ୟାବିଟେଟ୍ ସେଣ୍ଟରରେ ଅନେକ ଦିନ ରହିବା ପରେ ତାଙ୍କୁ ଆକ୍ଟିଂ କରିବାର ସୁୟୋଗ ମିଳିଥିଲା। ୫ରୁ ୬ ମାସ ପରେ ଆକ୍ଟିଂ ୱାର୍କସପର ଅରବିନ୍ଦ ଗୌଡ଼ କଙ୍ଗନାଙ୍କୁ ସୁଯୋଗ ଦେଇଥିଲେ। ବ୍ୟାକ ଷ୍ଟେଜ୍‌ରେ ଅଭିନୟ କରୁ କରୁ ତାଙ୍କୁ ଥରେ ଆଙ୍କରିଂ କରିବାକୁ ମଉକା ମିଳିଥିଲା। ଏହା ପରେ ସେ ମୁମ୍ବାଇ ପଳେଇ ଆସିଥିଲେ।
ଘରୁ ଲୁଛି ପଳାଇବା କାରଣରୁ କଙ୍ଗନାଙ୍କ ସହ ତାଙ୍କ ବାପା ଅନେକ ବର୍ଷ ଯାଏଁ କଥା ହୋଇ ନଥିଲେ। ତାଙ୍କ ମାତାପିତା ଚାହୁଁଥିଲେ କଙ୍ଗନା ଜଣେ ଡାକ୍ତର ହେଉ। କିନ୍ତୁ କଙ୍ଗନା ମଡେଲିଂ ଦୁନିଆରେ ନିଜ ପାଦ ଥାପି ଥିଲେ ଓ ପ୍ରସିଦ୍ଧ ନାଟ୍ୟମଞ୍ଚ ନିର୍ଦ୍ଦେଶକ ଅରବିନ୍ଦ ଗୋଡ଼ଙ୍କ ପାଖରୁ ଅଭିନୟ ଶିଖିଥିଲେ।


କଙ୍ଗନାଙ୍କର ପ୍ରଥମ ବଲିଉଡ ଫିଲ୍ମ ଥିଲା ‘ଗ୍ୟାଙ୍ଗଷ୍ଟାର୍’। ଏହା ୨୦୦୬ରେ ରିଲିଜ ହୋଇଥିଲା। ଏଥିପାଇଁ ତାଙ୍କୁ ବେଷ୍ଟ ଡେବ୍ୟୁ ଆକ୍ଟ୍ରେସ କ୍ୟାଟାଗୋରୀରେ ‘ଫିଲ୍ମ ପେୟାର ଆୱାର୍ଡ’ ମିଳିଥିଲା। ଏହାପରେ ସେ ‘ଫ୍ୟାଶନ୍’, ‘ୱ ଲମ୍‌ହେ’, ‘ଲାଇଫ୍ ଇନ୍ ଏ ମେଟ୍ରୋ’, ‘ୱାନ୍ସ୍ ଅପନ୍ ଏ ଟାଇମ୍ ଇନ୍ ମୁମ୍ବାଇ’, ‘ତନୁ ୱେଡ୍ସ୍ ମନୁ’, ‘କ୍ୱିନ୍’, ‘ତନୁ ୱେଡ୍ସ ମନୁ ରିଟର୍ନ୍ସ’ ଓ ‘କ୍ରିସ୍‌-୨’ ପରି ସୁପରହିଟ୍ ଫିଲ୍ମରେ ଅଭିନୟ କରିଛନ୍ତି। କିନ୍ତୁ ‘ନକ୍ ଆଉଟ୍’, ‘ନୋ ପ୍ରୋବ୍ଲେମ୍’, ‘ରିଭଲ ବଲ ରାନୀ’, ‘କଟ୍ଟୀ ବଟ୍ଟୀ’ ପରି ଫିଲ୍ମ ବକ୍ସ ଅଫିସରେ ସେତେଟା କମାଲ କରିପାରିଲା ନାହିଁ। ‘କ୍ୱିନ୍’ ଓ ‘ତନୁ ୱେଡ୍ସ ମନୁ ରିଟର୍ନ୍ସ’ ଫିଲ୍ମରେ ଚମତ୍କାର ଅଭିନୟ ପାଇଁ କଙ୍ଗନାଙ୍କୁ ବେଷ୍ଟ ଆକ୍ଟ୍ରିସ୍‌ର କ୍ୟାଟାଗୋରୀରେ ‘ଫିଲ୍ମ ଫେୟାର ଆୱାର୍ଡ’ ମିଳିଥିଲା।