ଫିଲ୍ମରେ ଦର୍ଶକଙ୍କ ମନ ଜିଣୁଥିବା ରିଅଲ୍‌ କମଲେଶ୍‌ କିଏ?

ମୁମ୍ବାଇ: ବକ୍ସ ଅଫିସରେ ବାଜିମାତ୍‌ କରୁଛି ଫିଲ୍ମ ‘ସଞ୍ଜୁ’। ଚଳଚ୍ଚିତ୍ରର କାହାଣୀ ଦର୍ଶକଙ୍କ ହୃଦୟକୁ ବେଶ୍‌ ଛୁଇଁପାରିଛି। ମାତ୍ର ୩ ଦିନରେ ଏହି ଫିଲ୍ମ ୧୦୦ କୋଟି କ୍ଲବରେ ସାମିଲ୍‌ ହୋଇଛି। ବାପପୁଅ ଓ ଦୁଇ ବନ୍ଧୁଙ୍କ ସମ୍ପର୍କକୁ ନେଇ ଫିଲ୍ମଟି ଗତିଶୀଳ ହୋଇଛି। ହେଲେ ଫିଲ୍ମରେ କମଲେଶ୍‌ ଚରିତ୍ର ଅତି ଦମ୍‌ଦାର ହୋଇଛି। ଯାହା ଦର୍ଶକଙ୍କୁ ଖୁବ୍‌ ଭାବବିହ୍ୱଳ କରିଦେଇଛି।  କିନ୍ତୁ ସଞ୍ଜୟଙ୍କ ରିଅଲ୍‌ ଲାଇଫ୍‌ ବେଷ୍ଟଫ୍ରେଣ୍ଡ୍‌ କମଲେଶ୍‌ଙ୍କୁ ଖୁବ୍‌ କମ୍‌ ଲୋକ ଜାଣିଥିବେ। ତେବେ ଚାଲନ୍ତୁ ଜାଣିବା କମଲେଶ୍‌ଙ୍କ ଜୀବନୀ ବିଷୟରେ।

ଫିଲ୍ମରେ କମଲେଶ୍‌ ଭୂମିକାଟି ହେଉଛି ବାସ୍ତବ ଜୀବନରେ ସଞ୍ଜୟ ଦତ୍ତଙ୍କ ପ୍ରକୃତ ବେଷ୍ଟଫ୍ରେଣ୍ଡ ପରେଶ୍‌ ଘେଲାନି। ସଞ୍ଜୟ ଯେବେ ଶେଷଥର ପାଇଁ ଜେଲ୍‌ରୁ ଫେରିଥିଲେ ସେତେବେଳେ ସେ ଏକ ନାଲି ରଙ୍ଗର ସାର୍ଟ ପିନ୍ଧି ତାଙ୍କୁ ଦେଖା କରିବାକୁ ଆସିଥିଲେ। ଆଉ ଫିଲ୍ମରେ ତାହା ମଧ୍ୟ ଦର୍ଶାଯାଇଛି। ଏହି ଫିଲ୍ମ ରିଲିଜ୍‌ ହେବା ପରେ ପରେଶ ଘେଲାନିଙ୍କ ଭିଡିଓ ସୋସିଆଲ ମିଡିଆରେ ଖୁବ୍‌ ଭାଇରାଲ ହେଉଛି।

ପରେଶ ପିଲାଦିନରୁ ଆମେରିକାରେ ରୁହୁଥିଲେ। ତା’ପରେ ତାଙ୍କ ପରିବାର ସିକାଗୋରେ ରହୁଥିଲେ। ଏବେ ସେ ତାଙ୍କ ପରିବାର ସହ  ଲସ୍‌ଏଞ୍ଜଲିସ୍‌ରେ ରହୁଛନ୍ତି। ରିପୋର୍ଟ ମୁତାବକ ପରେଶଙ୍କର ଆମେରିକାର ମୁନ୍‌ ଏକ୍ସପ୍ରେସ୍‌ , ଏକ୍ସ ପ୍ରାଇଜ୍‌ ଓ ରେଡିମ୍ୟୁନ୍‌ ନାଁରେ କମ୍ପାନୀ ଅଛି। ଫିଲ୍ମରେ ପରେଶଙ୍କ ଡାକ ନାଁ କମ୍‌ଲି ରଖାଯାଇଛି କିନ୍ତୁ ପ୍ରକୃତରେ ତାଙ୍କ ନାଁ ପରାୟା।

ନ୍ୟୁୟର୍କରେ ପରେଶଙ୍କ ସହ ସଞ୍ଜୟଙ୍କର ଭେଟ ହୋଇଥିଲା। ସେହି ସମୟରେ ଦୁହିଁଙ୍କ ମଧ୍ୟରେ ବନ୍ଧୁତା ଘନିଷ୍ଟ ହୋଇଯାଇଥିଲା। ପରେଶ ସବୁବେଳେ ସଞ୍ଜୟଙ୍କ କଠିନ ସମୟରେ ତାଙ୍କ ସାଥ୍‌ ଦେଇଛନ୍ତି। ଯାହା ଫିଲ୍ମରେ ଦର୍ଶାଯାଇଛି।

ପରେଶ ଆମେରିକାରେ ଥାଇ ମଧ୍ୟ ସବୁବେଳେ ସଞ୍ଜୟଙ୍କୁ ସାହାଯ୍ୟ ଓ ସହଯୋଗ କରିଛନ୍ତି। ପରେଶ ଖୁବ୍‌ ଲାଜୁଆ ସ୍ୱଭାବର ଥିଲେ। ଏମିତିକି ସେ ଲୋକଙ୍କ ନଜରକୁ ଆସିବାକୁ ଚାହାନ୍ତି ନାହିଁ। ତେଣୁ ତାଙ୍କୁ ଖୁବ୍‌ କମ୍‌ ଲୋକ ଚିହ୍ନନ୍ତି।

ପରେଶ କୁହନ୍ତି ସଞ୍ଜୟ ତାଙ୍କ ପାଇଁ ବଡ଼ ଭାଇ ପରି। ସେ ମଧ୍ୟ ସବୁ ସମୟରେ ତାଙ୍କ ସାଥ୍‌ ଦେଇଛନ୍ତି।