ରିଲିଜ୍‌ ହେଲା ଓଡ଼ିଆ ରାପର୍‌ ସମୀରଙ୍କର ଆଉ ଏକ ମ୍ୟୁଜିକ୍‌ ଭିଡିଓ

ଭୁବନେଶ୍ୱର(ଓଡ଼ିଶା ରିପୋର୍ଟର):କିଛି ଦିନ ହେବ ଚର୍ଚ୍ଚାରେ ରହିଛନ୍ତି ଓଡ଼ିଆ ରାପର୍‌ ସମୀର ରିଶୁ ମହାନ୍ତି।ନିକଟରେ ତାଙ୍କର ଏକ ରାପ୍‌ ମ୍ୟୁଜିକ୍‌ ଭିଡିଓ ରିଲିଜ୍‌ ହୋଇଛି। ଯାହାର ନାଁ ରହିଛି ‘I’m an Indian and let me be Indian’। ଗୀତଟିକୁ ବହୁଳ ସଂଖ୍ୟାରେ ଦର୍ଶକେ ପସନ୍ଦ କରୁଛନ୍ତି। ଏପର୍ଯ୍ୟନ୍ତ ୟୁଟ୍ୟୁବ୍‌ରେଏହି ଗୀତକୁ ୨ଲକ୍ଷରୁ ଅଧିକ ଲୋକ ଦେଖି ସାରିଲେଣି। ଗୀତଟି ଜୁଲାଇ ୬ତାରିଖରେ ରିଲିଜ୍‌ ହୋଇଛି।

ଗୀତରେ ଲୋକମାନଙ୍କ ମନରେ ଥିବା ବର୍ଣ୍ଣବୈଷମ୍ୟତାକୁ ଦର୍ଶାଯାଇଛି। ଏଥିସହ ସମୀର ନିଜ ଚେହେରାକୁ ନେଇ କେମିତି ଜୀବନରେ ସମାଲୋଚିତ ହୋଇଛନ୍ତି। କେମିତି ତାଙ୍କ ଚେହେରା ଦେଖି ଲୋକେ ତାଙ୍କର ଭାରତୀୟ ନକହି ବାହାର ଦେଶର ବୋଲି କହି ତାଚ୍ଛଲ୍ୟ କରନ୍ତି ସେସବୁ ସହ ଆଜିର ଯୁବପିଢ଼ିଙ୍କ ବ୍ୟବହାର ଏବଂ ଜୀବନଶୈଳୀକୁ ଇଂଗିତ କରି ଲୋକମାନେ କେମିତି କଟୁ ମନ୍ତବ୍ୟ ଦିଅନ୍ତି ସେସବୁ ଏହି ରାପ୍‌ ମ୍ୟୁଜିକ୍‌ ଭିଡିଓରେ ଆପଣମାନେ ଦେଖିବାକୁ ପାଇବେ।

ତେବେ ଏହି ଗୀତଟି ସମୀରଙ୍କ ପ୍ରଥମ ଗୀତ ନୁହେଁ। ପୂର୍ବରୁ ତାଙ୍କର ‘ମୁଁ ହେଲି ଓଡ଼ିଆ’, ‘ଓ୍ୱାନ କିଡ୍ ଓ୍ୱିଥ ଏ ଡ୍ରିମ’ ମ୍ୟୁଜିକ୍‌ ଭିଡିଓ ରିଲିଜ୍‌ ହୋଇଛି।ସମୀରଙ୍କ ପିଲାଦିନ କଟିଛି ପୁରୀରେ

ସମୀରଙ୍କ ମା ଜାପାନୀ ହୋଇଥିବା ବେଳେ ବାପା ଓଡ଼ିଆ। ଘର ତାଙ୍କର ପୁରୀ। ଏଇ ଶ୍ରୀକ୍ଷେତ୍ରରେ କଟିଛି ତାଙ୍କ ପିଲାଦିନ। ନବମ କ୍ଲାସ ପରେ ସେ ଦାର୍ଜିଲିଂରେ ତାଙ୍କର ଦ୍ୱାଦଶ ପଢ଼ା ଶେଷ କରି ତା’ପରେ ଉଚ୍ଚଶିକ୍ଷା ପାଇଁ ବେଙ୍ଗାଲୁରୁ ଗଲେ। ସେଠାରେ ହିଁ ଆରମ୍ଭ ହେଲା ରାପିଙ୍ଗ କ୍ୟାରିୟର। ଓ୍ୱାଲର୍ଡର ବେଷ୍ଟ ମେଲ୍ ରାପର, ରେକର୍ଡ ପ୍ରଡ୍ୟୁସ୍‌ର ତଥା ଆକ୍ଟର ଏମନେମ୍‌ଙ୍କ ରାପିଙ୍ଗରେ ପ୍ରଭାବିତ ହୋଇ ସମୀର ଆରମ୍ଭ କଲେ ରାପିଙ୍ଗ। ସମୀର ବଲିଉଡ୍, କନ୍ନଡ଼ ଓ ତାମିଲ ଫିଲ୍ମ ଇଣ୍ଡଷ୍ଟ୍ରିରେ ମଧ୍ୟ କାମ କରିଛନ୍ତି।