ମୁମ୍ବାଇ: ଚଳିତ ବର୍ଷ ଜୁନ୍ ମାସରେ ବଲିଉଡ୍ର ଅନ୍ୟତମ ସୁପର୍ଷ୍ଟାର୍ ସଲ୍ମାନ୍ ଖାନ୍ଙ୍କ ଫିଲ୍ମ ‘ଭାରତ’ ରିଲିଜ୍ ହୋଇଥିଲା। ଏହା ବକ୍ସ ଅଫିସ୍ରେ ଜବରଦସ୍ତ ପ୍ରଦର୍ଶନ କରିଥିଲା। ଏହି ଫିଲ୍ମଟି ଥିଲା ଦକ୍ଷିଣ କୋରିଆର ଫିଲ୍ମ ‘ଓଡ୍ ଟୁ ମାଇଁ ଫାଦର୍’ର ରିମେକ୍। ‘ଭାରତ’ର ସଫଳତା ପରେ ସଲ୍ମାନ୍ ଦକ୍ଷିଣ କୋରିଆର ଆଉ ଏକ ଫିଲ୍ମକୁ ରିମେକ୍ କରିବା ପାଇଁ ଚାହୁଁଥିବା ଜଣାପଡ଼ିଛି।
ଏକ ରିପୋର୍ଟ ଅନୁଯାୟୀ, ଦକ୍ଷିଣ କୋରିଆର ଆଉ ଏକ ଫିଲ୍ମ ରିମେକ୍ କରିବାକୁ ସଲ୍ମାନ୍ ନିଷ୍ପତ୍ତି ନେବା ସହିତ ଏ ଦିଗରେ ଆଗେଇ ସାରିଲେଣି। ଏ ଫିଲ୍ମ ପାଇଁ ସେ ପ୍ରଭୁ ଦେବାଙ୍କ ସହ ହାତ ମିଳାଇଛନ୍ତି। ଫିଲ୍ମର ନାଁ ମଧ୍ୟ ସ୍ଥିର ହୋଇ ସାରିଲାଣି। ସେ ଫିଲ୍ମଟିର ନାଁ ‘ରାଧେ’ ରଖିବା ପାଇଁ ଭାବିଚନ୍ତି। ‘ୱାଣ୍ଟେଡ୍’ ଫିଲ୍ମରେ ସଲ୍ମାନ୍ ‘ରାଧେ’ ନାମକ ଚରିତ୍ରରେ ଅଭିନୟ କରିଥିଲେ।
ଏହା ବି ସୂଚନା ଆସିଛି ଯେ, ଏହି ଫିଲ୍ମରେ ସଲ୍ମାନ୍ ଜଣେ ପୁଲିସ୍ ଅଫିସର୍ ଅବା ଗୁପ୍ତଚର ଭୂମିକାରେ ଅଭିନୟ କରିବେ।
ଦକ୍ଷିଣ କୋରିଆର କେଉଁ ଫିଲ୍ମଟିକୁ ସେ ରିମେକ୍ କରିବେ, ତାହା ଅବଶ୍ୟ ଜଣାପଡ଼ିନି। କିନ୍ତୁ ଏ ଫିଲ୍ମର ରାଇଟ୍ସ ଅତୁଲ ଅଗ୍ନିହୋତ୍ରୀଙ୍କ ପାଖରେ ରହିଛନ୍ତି। ସଲ୍ମାନ୍ ତାଙ୍କଠାରୁ ସେ ଅଧିକାର ଆଣି ଫିଲ୍ମଟି ତିଆରି କରିବେ ବୋଲି କୁହାଯାଉଛି।
ସଲ୍ମାନ୍ ଏବେ ପ୍ରଭୁ ଦେବାଙ୍କ ସହ ‘ଦବଙ୍ଗ ୩’ରେ କାମ କରୁଛନ୍ତି। ଫିଲ୍ମଟି ଡିସେମ୍ବର ୨୦ ତାରିଖରେ ରିଲିଜ୍ ହେବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
