ସନ୍ନିଙ୍କୁ ଲୋଭରେ ପକାଇଲା ଗେଲ୍‌ଙ୍କ ଅଫର: ଠୁମ୍‌କା ଲଗାଇଲେ, ଭିଡିଓ ପଠାଇଲେ

ନୂଆଦିଲ୍ଲୀ: କ୍ରିକେଟ ଗ୍ରାଉଣ୍ଡରେ ଧୂଆଁଧାର ବ୍ୟାଟିଂରେ ନିଜର ଯାଦୁ ଦେଖାଇଥିବା ୱେଷ୍ଟଇଣ୍ଡିଜ କ୍ରିକେଟର କ୍ରିସ୍‌ ଗେଲ୍‌ ପଡିଆ ବାହାରେ ମଧ୍ୟ ନିଜର ଜଲୱା ଦେଖାଇଛନ୍ତି। କ୍ରିକେଟ ଛଡା ନିଜ ନାଚ ପାଇଁ ମଧ୍ୟ ଏହି କାରବିୟାନ କ୍ରିକେଟର ଜଣାଶୁଣା। ଅନେକ ସମୟରେ ପଡିଆ ମଧ୍ୟରେ ଗେଲ୍‌ଙ୍କୁ ନୃତ୍ୟକୁ ଉପଭୋଗ କରିଛନ୍ତି ପ୍ରଶଂସକ ମାନେ। ତେବେ ପଡିଆ ଭିତରେ ଗେଲ ନାଚିବା କିଛି ନୂଆ ଘଟଣା ନୁହେଁ। ପୂର୍ବରୁ ତାଙ୍କର ଗଙ୍ଗନମ୍‌ ଷ୍ଟାଇଲ୍‌ ଡ୍ୟାନ୍ସକୁ ମନଭରି ଉପଭୋଗ କରିଥିଲେ ଦର୍ଶକ। କିନ୍ତୁ ଏବେ ବଲିଉଡ ବିଟ୍‌ରେ ଝୁମିଛନ୍ତି ଗେଲ୍‌। ରଇସ୍‌ ଫିଲ୍ମର ‘ଲୈଲା ମେଁ ଲୈଲା’ ଆଇଟମ୍‌ ଗୀତରେ ଗେଲ୍‌ ନାଚୁଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି।  ଏହି ଭିଡ଼ିଓକୁ ଗେଲ ନିଜ ଇନଷ୍ଟାଗ୍ରାମ୍‌ ପେଜ୍‌ରେ ସେୟାର କରିଛନ୍ତି। କିନ୍ତୁ କଥା ଏତିକିରେ ସରିନି। ଦେଖନ୍ତୁ ଏହି ଭଡିଓ

ଗେଲ୍‌ ଏହି ଭିଡିଓକୁ ସୋସିଆଲ ମିଡିଆରେ ସେୟାର କରିବା ସହ ଫ୍ୟାନମାନଙ୍କୁ ଏହି ଆଇଟମ୍‌ ଗୀତରେ ଡ୍ୟାନ୍ସ କରିବାକୁ ଚ୍ୟାଲେଞ୍ଜ ଦେଇଛନ୍ତି। ଚ୍ୟାଲେଞ୍ଜ ଅନୁସାରେ, ଏହି ଗୀତରେ ଯେ କେହି ବି ତାଙ୍କ ଭଳି ଡ୍ୟାନ୍ସ କରିବ ପୁରସ୍କାର ଭାବେ ୫ ହଜାର ଡଲାର ଦେବାକୁ ଘୋଷଣା କରିଛନ୍ତି ଗେଲ୍‌। ଜାଣିକି ଆଶ୍ଚର୍ଯ୍ୟ ହେବେ ଗେଲ୍‌ଙ୍କ ଏହି ଚ୍ୟାଲେଞ୍ଜରେ ଏଣ୍ଟ୍ରି କରିଛନ୍ତି ବଲିଉଡ଼ର ଜଣେ ଆଇଟମ୍‌ ଡ଼୍ୟାନ୍ସର। ସେ ହେଉଛନ୍ତି ବଲିଉଡ଼ର ଆଇଟମ ଗାର୍ଲ ସନ୍ନି ଲିଓନ। ସନ୍ନି ମଧ୍ୟ ଏହି ଗୀତରେ ନିଜର ଏକ ଭିଡ଼ିଓ ଗେଲଙ୍କୁ ଟ୍ୟାଗ୍‌ କରି ସେୟାର କରିଛନ୍ତି। ତେବେ ମଜାଦାର କଥା ହେଉଛି, ଗେଲ୍‌ ଯେଉଁ ଆଇଟମ୍‌ ଗୀତରେ ନାଚୁଛନ୍ତି ସେ ଗୀତର ଅରଜିନାଲ ଭର୍ସନରେ ସନ୍ନି ଲିଓନ ହିଁ ନାଚିଥିଲେ। ସେତେବେଳେ ଏହି ଗୀତଟି ଜବରଦସ୍ତ ହିଟ୍‌ ହୋଇଥିଲା।

ଏହି ଚ୍ୟାଲେଞ୍ଜରେ ଉଭୟ ପୁରୁଷ ଓ ମହିଳା ଭାଗ ନେଇ ପାରିବେ ବୋଲି ସୋସିଆଲ ସାଇଟ୍‌ରେ ଉଲ୍ଲେଖ କରିଛନ୍ତି ଗେଲ୍‌। ଫ୍ୟାନ ମାନେ ଏହି ଆଇଟମ୍‌ ଗୀତରେ ଡ୍ୟାନ୍ସ କରି ଏହାର ଭିଡ଼ିଓ ତାଙ୍କ ସୋସିଆଲ ସାଇଟ୍‌ ପେଜ୍‌ରେ ସେୟାର କରିବାକୁ କହିଛନ୍ତି ଗେଲ୍‌। ଫ୍ୟାନ ମାନେ ପଠାଇଥିବା ଭିଡ଼ିଓ ମଧ୍ୟରୁ ଟପ୍‌-୫ ଭିଡିଓ ଗେଲ୍‌ ନିଜ ପେଜରେ ସେୟାର କରିବେ ଓ ଦର୍ଶକ ହିଁ ବିଜେତା ବାଛିବେ। ତେବେ ଏହି ଚ୍ୟାଲେଞ୍ଜରେ ଭାଗ ନେଇଥିବା ବିଜେତାଙ୍କ ନାମ ୨୪ ତାରିଖରେ ଘୋଷଣା କରାଯିବ। ତେବେ ବିଜେତା ଘୋଷଣା ହେବାକୁ ଆହୁରି ୫ଦିନ ବାକିଥି‍ବା ବେଳେ ସନ୍ନିଙ୍କ ଏଣ୍ଟ୍ରି ଗେଲ୍‌ଙ୍କ ଚ୍ୟାଲେଞ୍ଜକୁ ଗରମାଗରମ କରିଦେଇଛି।