ବେଜିଂ: ମହାକାଶରେ କର୍ତ୍ତୃତ୍ୱ ବିସ୍ତାର ଲାଗି ଯୋଜନା କରୁଛି ଚୀନ୍! ଚନ୍ଦ୍ରପୃଷ୍ଠରେ ଏକଚାଟିଆ ଅଧିକାର ସାବ୍ୟସ୍ତ ଲାଗି ଚୀନ୍ ବୈଜ୍ଞାନିକ ଗବେଷଣା ଚଳାଇଛି ! ଆମେରିକା ମହାକାଶ ଗବେଷଣା ସଂସ୍ଥା NASAର ବରିଷ୍ଠ ଅଧିକାରୀ ବିଲ୍ ନେଲସନ୍ଙ୍କ ବୟାନକୁ ନେଇ ଉଠିଛି ଏଭଳି ପ୍ରଶ୍ନ। ଚନ୍ଦ୍ରକୁ ମଣିଷ ପ୍ରେରଣ ଲାଗି ଚୀନ୍ ନିଜ କାର୍ଯ୍ୟକ୍ରମକୁ ଜୋରଦାର କରିଥିବା ବେଳେ ବିଭିନ୍ନ ତଥ୍ୟ ଆଧାରରେ ଏଭଳି ବୟାନ ଦେଇଛନ୍ତି ନେଲସନ୍। ଚୀନ୍ର ମହାକାଶ କାର୍ଯ୍ୟକ୍ରମ ସଂପୂର୍ଣ୍ଣ ଭାବେ ସାମରିକ ବୋଲି ସେ ଅଭିଯୋଗ କରିଛନ୍ତି। ତେବେ ଏହାକୁ ଦୃଢ଼ ଭାବେ ଖଣ୍ଡନ କରିବା ସହ ତାଙ୍କ ଦେଶ ବିରୁଦ୍ଧରେ ଆମେରିକାର ମିଥ୍ୟା ପ୍ରଚାର ବୋଲି କହିଛନ୍ତି ଚୀନ୍ ବୈଦେଶିକ ବିଭାଗ ମୁଖପାତ୍ର ଝାଓ ଲିଝିଆନ୍।
ଚନ୍ଦ୍ରପୃଷ୍ଠକୁ ନିଜ ନିୟନ୍ତ୍ରଣକୁ ନେବା, ଚୀନର ସାମରିକ ମହାକାଶ ଅଭିଯାନ କାର୍ଯ୍ୟକ୍ରମର ଏକ ଅଂଶ ବିଶେଷ ବୋଲି ବିଲ୍ ନେଲସନ୍ କହିଛନ୍ତି। ୨୦୩୫ ସୁଦ୍ଧା ଚୀନ ଚନ୍ଦ୍ରରେ ମୁନ୍ ଷ୍ଟେସନ ନିର୍ମାଣ କରିବ ଓ ସମଗ୍ର ଉପଗ୍ରହକୁ ନିୟନ୍ତ୍ରଣରେ ରଖିବାକୁ ଚେଷ୍ଟା କରିବ ବୋଲି ସେ ଆଶଙ୍କା ବ୍ୟକ୍ତ କରିଛନ୍ତି ନେଲସନ୍। ଚନ୍ଦ୍ରର ଦକ୍ଷିଣ ମେରୁରେ ପାଣି ଥିବା ସମ୍ଭାବନା ଦୃଢିଭୁତ ହେଉଥିବାରୁ ଏହି ଅଞ୍ଚଳକୁ ନିୟନ୍ତ୍ରଣରେ ରଖିବା ଲାଗି ଭବିଷ୍ୟତରେ ତୀବ୍ର ପ୍ରତିଯୋଗିତା ହେବ ବୋଲି ସେ କହିଛନ୍ତି। ସେ କାହଁକି ଏଭଳି ଆଶଙ୍କା ପ୍ରକାଶ କରୁଛନ୍ତି ବୋଲି ପ୍ରଶ୍ନରେ ନେଲସନ କହିଛନ୍ତି ଯେ, ଚୀନର ମହାକାଶଚାରୀମାନେ ଅନ୍ୟ ଦେଶର ଉପଗ୍ରହକୁ କିଭଳି ନଷ୍ଟ କରିହେବ ସେ ବିଷୟରେ ଗବେଷଣା ଚଳାଇଛନ୍ତି। ସେହିପରି ଚୀନ୍ ବୈଜ୍ଞାନିକ ଆମେରିକୀୟ ବୈଜ୍ଞାନିକଙ୍କ ସହ ମିଳିତ ଭାବେ କାମ କରିବାକୁ ମନା କରିବା ଓ ଗୁରୁତ୍ୱପୂର୍ଣ୍ଣ ତଥ୍ୟ ଲୁଚାଇ ଥିବାରୁ ଚୀନ୍ର ମନ୍ଦ ଉଦ୍ଦେଶ୍ୟ ସଂପର୍କରେ ତାଙ୍କ ସନ୍ଦେହ ଦୃଢୀଭୂତ ହୋଇଥିବା କହିଛନ୍ତି ନେଲସନ୍।
ସେପଟେ ନାସାର ଅଭିଯୋଗକୁ ଖଣ୍ଡନ କରିଛି ଚୀନ। ତଥ୍ୟକୁ ନଯାଇ ନାସା ଅଧିକାରୀ ଦାୟିତ୍ୱହୀନ ମନ୍ତବ୍ୟ ଦେବା କିଛି ନୂଆ କଥା ନୁହେଁ ବୋଲି କହିଛନ୍ତି ଚୀନ୍ ବୈଦେଶିକ ବ୍ୟାପାର ବିଭାଗ ମୁଖପାତ୍ର ଝାଓ ଲିଝିଆନ୍। ଆମେରିକା ଚୀନ୍ ବରୁଦ୍ଧରେ ମିଥ୍ୟା ପ୍ରଚାର ଚଳାଇଥିବା ସେ ଅଭିଯୋଗ କରିଛନ୍ତି। ମହାକାଶକୁ କିଭଳି ସାମୁହିକ ହିତ ଲାଗି ବ୍ୟବହାର କରିହେବ ସେନେଇ ଚୀନ୍ ଚେଷ୍ଟା କରୁଛି। ଏଠାରେ କୌଣସି ପ୍ରକାର ସାମରିକ କାର୍ଯ୍ୟକ୍ରମ ଓ ଅସ୍ତ୍ର ପ୍ରତିଯୋଗିତାକୁ ବେଜିଂ ଦୃଢ଼ ଭାବେ ବିରୋଧ କରେ ବୋଲି ଲିଝିଆନ୍ କହିଛନ୍ତି।
ଆର୍ଟେମିସ୍ କାର୍ଯ୍ୟକ୍ରମ ଅନ୍ତର୍ଗତ ୨୦୨୪ରେ ନାସା ଚନ୍ଦ୍ରର କକ୍ଷକୁ ମଣିଷ ପଠାଇବ। ସେହିପରି ୨୦୨୫ରେ ଚନ୍ଦ୍ରର ଦକ୍ଷିଣ ମେରୁରେ ମହାକାଶଚାରୀଙ୍କୁ ଅବତରଣ କରାଇବା ଲାଗି ଲକ୍ଷ୍ୟ ରଖିଛି। ଏଥିଲାଗି ପ୍ରକ୍ରିୟା ବି ଆରମ୍ଭ ହୋଇଛି। ୬ ଦିନ ତଳେ ନ୍ୟୁଜିଲ୍ୟାଣ୍ଡରୁ ମହାକାଶ ପ୍ରେରଣ କରାଯାଇଥିବା ନାସାର ଏକ କ୍ଷୁଦ୍ର ଉପଗ୍ରହ ପୃଥବୀ କକ୍ଷରୁ ପୃଥକ ହୋଇ ଚନ୍ଦ୍ର ମୁହାଁ ହୋଇଛି। ୪ ମାସ ମଧ୍ୟରେ ଏହା ଚନ୍ଦ୍ରରେ ପହଞ୍ଚିବା ପରେ ମାନବ ଅବତରଣ ନେଇ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରଦାନ କରିବ। ଅନ୍ୟପକ୍ଷରେ ୨୦୧୩ରେ ପ୍ରଥମ କରି ନିଜ ମହାକାଶଯାନକୁ ଚନ୍ଦ୍ର ପୃଷ୍ଠରେ ଅବତରଣ କରାଇବାରେ ସଫଳ ହୋଇଥିଲା ଚୀନ୍। ୨୦୩୦ ବେଳକୁ ଏହା ଚନ୍ଦ୍ରର ଦକ୍ଷିଣ ମେରୁ ନିକଟରେ ନିଜ ସ୍ପେଶକ୍ରାଫ୍ଟ ଅବତରଣ କରାଇବାକୁ ଯୋଜନା କରିଛି। ଏଥିପାଇଁ ଉଚ୍ଚ କ୍ଷମତାସଂପନ୍ନ ରକେଟ୍ ନିର୍ମାଣ ଜାରି ରହିଛି। ପରବର୍ତ୍ତୀ ସମୟରେ ଏହି ରକେଟ୍ ଜରିଆରେ ମାନବ ପ୍ରେରଣ ଲାଗି ବ୍ୟବହାର କରାଯିବ ବୋଲି ଜଣାପଡ଼ିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
