ପରାଜୟ ପରେ ଆଜି ଦିଲ୍ଲୀରେ କଂଗ୍ରେସ କାର୍ଯ୍ୟକାରିଣୀ ବୈଠକ

ନୂଆଦିଲ୍ଲୀ: ସାଧାରଣ ନିର୍ବାଚନରେ ଶୋଚନୀୟ ପରାଜୟ ପରେ ଆଜି ଦିଲ୍ଲୀ କଂଗ୍ରେସ ମୁଖ୍ୟ କାର୍ଯ୍ୟାଳୟରେ କଂଗ୍ରେସ ଓ୍ୱାର୍କିଂ କମିଟି ବୈଠକ ବସୁଛି। ଦଳର ଏଭଳି ସ୍ଥିତି, ଆଗାମୀ ଦିନରେ ହେବାକୁ ଥିବା ବିଧାନସଭା ନିର୍ବାଚନ ଏବଂ ମଧ୍ୟପ୍ରଦେଶ ଓ କର୍ଣ୍ଣାଟକ ମେଣ୍ଟ ସରକାରର ସ୍ଥିତି ବାବଦରେ ବୈଠକରେ ଆଲୋଚନା ହେବ ବୋଲି ଜଣାପଡ଼ିଛି।

କଂଗ୍ରେସ କାର୍ଯ୍ୟକାରିଣୀ ବୈଠକରେ ମୋଟ ୨୩ ଜଣ ସଦସ୍ୟ ରହିଛନ୍ତି। ଚଳିତ ଥର ୪ ଜଣ ସଂସଦକୁ ନିର୍ବାଚିତ ହୋଇଥିବା ବେଳେ ୧୨ ଜଣ ପରାଜୟ ହୋଇଛନ୍ତି। ୪ ବିଜୟୀ ପ୍ରାର୍ଥୀ ହେଲେ ସୋନିଆ ଗାନ୍ଧି, ରାହୁଲ ଗାନ୍ଧି, ଗୌରବ ଗୋଗୋଇ, ଏ. ଛେଲା କୁମାର। ତେବେ ବାକି ୭ ଜଣ ଚଳିତଥର ନିର୍ବାଚନ ଲଢ଼ିନଥିଲେ।

ଏହି ବୈଠକରେ ୫ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀ ଯୋଗଦେବେ ବୋଲି ଜଣାପଡ଼ିଛି। ମଧ୍ୟପ୍ରଦେଶ ଓ କର୍ଣ୍ଣାଟକରେ ବିଜେପି ସରକାର ଗଢ଼ିବା ପାଇଁ ପ୍ରୟାସ କରୁଥିବାରୁ ଏ ବାବଦରେ ମଧ୍ୟ ଏହି ବୈଠକରେ ଆଲୋଚନା ହେବ ବୋଲି ଜଣାପଡ଼ିଛି।

ଏଥିସହ ଆଗାମୀ ଦିନରେ ହେବାକୁ ଥିବା ହରିଆନା, ଝାରଖଣ୍ଡ, ମହାରାଷ୍ଟ୍ର ଓ ବିହାରରେ ବିଧାନସଭା ନିର୍ବାଚନ ରହିଥିବାରୁ ଏ ବାବଦରେ ଆଲୋଚନା ହେବ। ନିକଟରେ ରାଜସ୍ଥାନ, ମଧ୍ୟପ୍ରଦେଶ ଏବଂ ଛତିଶଗଡ଼ରେ କଂଗ୍ରେସ ବିଜେପିକୁ ଗାଦିଚ୍ୟୁତ କରି ଶାସନ ଭାର ସମ୍ଭାଳିଥିଲା। ହେଲେ ଲୋକସଭା ନିର୍ବାଚନରେ ୩ ରାଜ୍ୟରୁ ମାତ୍ର ୩ ଜଣ ସାଂସଦ ନିର୍ବାଚିତ ହୋଇଛନ୍ତି। ଯେଉଁଥିରେ ମଧ୍ୟପ୍ରଦେଶରୁ ଜଣେ ଏବଂ ଛତିଶଗଡରୁ ୨ ଜଣ ରହିଛନ୍ତି। ତେଣୁ ୩ ରାଜ୍ୟର ମୁଖ୍ୟମନ୍ତ୍ରୀ ସାଧାରଣ ନିର୍ବାଚନରେ ଦଳର ଏଭଳି ସ୍ଥିତି ପାଇଁ କାର୍ଯ୍ୟକାରିଣୀ ବୈଠକରେ ଜବାବ ରଖିବେ ବୋଲି ଜଣାପଡ଼ିଛି।

କଂଗ୍ରେସ ୨୦୧୪ରେ ୪୪ଟି ଆସନ ଜିତିଥିବା ବେଳେ ଚଳିତଥର ୫୫ଟି ଆସନ ଜିତିବାରେ ସକ୍ଷମ ହୋଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।