ଫେରିବ ଶାନ୍ତି, ଲଦାଖ ସୀମାରୁ ସେନା ପ୍ରତ୍ୟାହାର କରିବେ ଦୁଇ ଦେଶ!

ବେଜିଂ: ଲଦାଖ ସୀମାରେ ଭାରତ ଓ ଚାଇନା ମଧ୍ୟରେ ଚାଲିଥିବା ବିବାଦ ଭିତରେ ନୂଆ ଆଶାର କିରଣ ସୃଷ୍ଟି ହୋଇଛି। ଦୁଇ ଦେଶ ମଧ୍ୟରେ ସୀମାରେ ଶାନ୍ତି ଫେରାଇ ଆଣିବା ପାଇଁ ଚାଲିଥିବା ବୈଠକ ଫଳପ୍ରଦ ହେବାର ସମ୍ଭାବନା ଦେଖାଯାଇଛି। ସୀମାରେ ଶାନ୍ତି ଫେରାଇ ଆଣିବା ପାଇଁ ଦୁଇ ଦେଶ ରାଜି ହୋଇଛନ୍ତି ଓ ପର୍ଯ୍ୟାୟକ୍ରମେ ଲଦାଖ ସୀମାରୁ ଉଭୟ ଭାରତ ଏବଂ ଚାଇନା ସେନା ପ୍ରତ୍ୟାହାର କରିବାକୁ ସହମତି ପ୍ରକାଶ କରିଥିବା ବେଜିଂ ପକ୍ଷରୁ କୁହାଯାଇଛି।

ଚାଇନା ସରକାରଙ୍କ ମୁଖପାତ୍ର କୁହାଯାଉଥିବା ଗ୍ଲୋବାଲ ଟାଇମ୍ସରେ ପ୍ରକାଶିତ ଖବର ଅନୁଯାୟୀ, ପର୍ଯ୍ୟାକ୍ରମେ ଭାରତ ଓ ଚାଇନା ଫ୍ରଣ୍ଟ ଲାଇନ ଫୋର୍ସଙ୍କୁ ଡିସଏନଗେଜ୍‌ କରିବାକୁ ରାଜି ହୋଇଛନ୍ତି। ସେହିପରି ଦୁଇ ଦେଶ ସୀମାନ୍ତ ଅଞ୍ଚଳରେ ସ୍ଥିତିକୁ ସ୍ୱାଭାବିକ କରିବା ପାଇଁ ସବୁ ପ୍ରକାରର ବ୍ୟବସ୍ଥା ଗ୍ରହଣ କରିବାକୁ ଏକମତ ହୋଇଛନ୍ତି। ଗତକାଲି ଦୁଇ ଦେଶ ମଧ୍ୟରେ କର୍ପଣ କମାଣ୍ଡରସ୍ତରୀୟ ବୈଠକ ବସିଥିଲା। ଏହି ସମୟରେ ଦୁଇ ଦେଶ ଶାନ୍ତି ଫେରାଇ ଆଣିବାକୁ ଆଲୋଚନା କରିଥିବା ଗ୍ଲୋବାଲ ଟାଇମ୍ସ କହିଛି।

ଅନ୍ୟପକ୍ଷରେ ଦୀର୍ଘ ୧୨ ଘଣ୍ଟା ଧରି ଛୁଶୁଲ ଠାରେ ଚାଲିଥିବା ଏହି ବୈଠକରେ ଦୁଇ ଦେଶର ଆର୍ମି ସୀମାରେ ଦୀର୍ଘ ୭ ସପ୍ତାହ ହେଲା ଚାଲିଥିବା ବିବାଦର କେମିତି ସମାଧାନ ହୋଇପାରିବ, ତା’ ଉପରେ ଗୁରୁତ୍ୱ ଦେଇଥିଲେ। ବୈଠକରେ ଭାରତ ଏପ୍ରିଲ ମାସର ଷ୍ଟାଟସ କୋ କାଏମ ରଖିବା ସପକ୍ଷରେ ଯୁକ୍ତି କରିଥିଲା।

ଚାଇନା ବି ଏଥରେ କିଛି ମାତ୍ରାରେ ରାଜି ହୋଇଥିବା କୁହାଯାଉଛି। ହେଲେ ଚାଇନା ସୀମାରେ ୨୦ ହଜାର ସୈନ୍ୟ ମୁତୟନ କରିବା ଭାରତର ସନ୍ଦେହ ବଢ଼ାଇ ଦେଇଛି। ତେବେ ଭାରତ ମଧ୍ୟ ଆଲୋଚନା ସହ ଚାଇନା ଯବାନଙ୍କ ମୁକାବିଲା କରିବାକୁ ସୀମାରେ ପୂରା ପ୍ରସ୍ତୁତି କରିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।