ଚଣ୍ଡିଗଡ଼: ପଞ୍ଜାବର ନୂଆ ମୁଖ୍ୟମନ୍ତ୍ରୀ ଚରଣଜିତ୍ ସିଂହ ଚନ୍ନିଙ୍କର ନୂଆ କ୍ୟାବିନେଟର ଶପଥ ଗ୍ରହଣ ସମାରୋହ ରାଜଭବନରେ ସମ୍ପନ୍ନ ହୋଇଛି। ପଞ୍ଜାବର ଚନ୍ନି ସରକାରରେ ୧୫ ଜଣ ମନ୍ତ୍ରୀ ପଦର ଶପଥ ନେଇଛନ୍ତି। ହେଲେ କାହାକୁ କେଉଁ ପଦ ମିଳିବ, ତା'ର ସୂଚନା ମିଳିନାହିଁ। ପାର୍ଟିରେ ରାଣା ଗୁରଜିତ୍ ସିଂହଙ୍କୁ ବିରୋଧ ସତ୍ତ୍ୱେ ଚରଣଜିତ୍ ଚନ୍ନି ତାଙ୍କୁ ମନ୍ତ୍ରୀ କରିଛନ୍ତି।
ପଞ୍ଜାବ ରାଜ୍ୟପାଳ ବନୱାରୀଲାଲ ପୁରୋହିତ୍ ଚଣ୍ଡିଗଡ଼ ରାଜଭବନରେ କଂଗ୍ରେସ ବିଧାୟକ ବ୍ରହ୍ମା ମହିନ୍ଦ୍ରା, ଭରତ ଭୂଷଣ, ମନପ୍ରୀତ ବାଦଲ, ତୃପ୍ତ ରାଜିନ୍ଦର ସିଂହ ବାଜୱା, ପର୍ଗତ ସିଂହ, ସୁଖବିନ୍ଦର ସକାରିଆ, ବିଜେନ୍ଦ୍ର ସିଂହ ସିଙ୍ଗଲା, ରାଜକୁମାର ଭେର୍କା, ରାଣା ଗୁରଜିତ୍ ସିଂହ, ସଂଗତ ସିଂହ ଗିଲଜିଆନ୍, ରଣଦୀପ ସିଂହ ନାଭା, ଅରୁଣା ଚୌଧୁରୀ, ରାଜିଆ ସୁଲତାନା, ଗୁରକିରତ୍ କୋଟଲୀ, ଅମରିନ୍ଦର ସିଂହ ରାଜା ୱାରିଙ୍ଗଙ୍କୁ ଶପଥ ପାଠ କରାଇଛନ୍ତି।
କ୍ୟାବିନେଟ୍ ମନ୍ତ୍ରୀ ଭାବେ ଶପଥ ନେଇଥିବା ମନପ୍ରୀତ ସିଂହ ବାଦଲ, ବ୍ରହ୍ମା ମହିନ୍ଦ୍ରା, ଅରୁଣା ଚୌଧୁରୀ, ତୃପ୍ତ ରାଜିନ୍ଦର ସିଂହ ବାଜୱା, ସୁଖବିନ୍ଦର ସିଂହ ସକାରିୟା, ରାଜିଆ ସୁଲତାନା, ବିଜେନ୍ଦ୍ର ସିଂହ ସିଙ୍ଗଲା, ଭରତ ଭୂଷଣ ଆଶୁ ପୂର୍ବ କ୍ୟାପଟେନ୍ ସରକାରରେ ମଧ୍ୟ କ୍ୟାବିନେଟ୍ ମନ୍ତ୍ରୀ ଥିଲେ। ଏହାବ୍ୟତୀତ ୭ ନୂଆ ମୁହଁଙ୍କୁ ଏଥର କ୍ୟାବିନେଟରେ ସ୍ଥାନ ମିଳିଛି। ସେମାନେ ହେଲେ ରାଣା ଗୁରଜିତ୍ ସିଂହ, ରଣଦୀପ ସିଂହ ନାଭା, ରାଜ କୁମାର ଭେର୍କା, ସଂଗତ ସିଂହ ଗିଲଜିଆନ୍, ପରଗତ ସିଂହ, ଅମରିନ୍ଦର ସିଂହ ରାଜା ୱାରିଙ୍ଗ ଓ ଗୁରକିରତ ସିଂହ କୋଟଲୀ।
https://twitter.com/ANI/status/1442083857595916289?s=20
ନୂଆ ମନ୍ତ୍ରିଙ୍କୁ ବିଭାଗ ବଣ୍ଟଡ଼ ଆଜି ବିଳମ୍ବିତ ସନ୍ଧ୍ୟାରେ ହୋଇପାରେ। ଶପଥ ଗ୍ରହଣ ସମାରୋହ ପରେ ପାର୍ଟିର ପ୍ରଦେଶ କଂଗ୍ରେସ କମିଟି ପ୍ରଭାରୀ ହରିଶ ରାୱତ କହିଛନ୍ତି, ମୁଁ ନୂଆ ମନ୍ତ୍ରୀ, ପଞ୍ଜାବର ବାସିନ୍ଦା ଓ ମୁଖ୍ୟମନ୍ତ୍ରୀ ଚରଣଜିତ୍ ସିଂହ ଚନ୍ନିଙ୍କୁ ନୂଆ ଆରମ୍ଭ ପାଇଁ ବଧେଇ ଜଣାଉଛି। ଯେଉଁ ବରିଷ୍ଠ ନେତାଙ୍କୁ ମନ୍ତ୍ରିମଣ୍ଡଳରେ ସ୍ଥାନ ମିଳିନାହିଁ, ଦଳ ସେମାନଙ୍କ ବିଷୟରେ କିଛି ଅଲଗା ଚିନ୍ତା କରିଛି। ସେମାନଙ୍କୁ ପାର୍ଟି ଓ ସରକାରଙ୍କ ବ୍ୟବସ୍ଥାରେ ଦାୟିତ୍ୱ ପ୍ରଦାନ କରାଯିବ। କାହାକୁ ନିରାଶ ହେବାକୁ ପଡ଼ିବ ନାହିଁ।
ନୂଆ କ୍ୟାବିନେଟରେ କ୍ୟାପଟେନ ଅମରିନ୍ଦରଙ୍କ ନିକଟତର ଥିବା ୫ ଜଣ ମନ୍ତ୍ରୀଙ୍କୁ ବିଦା କରାଯାଇଛି। ସେମାନଙ୍କ ମଧ୍ୟରେ ସାଧୁ ସିଂହ ଧର୍ମସୋତ୍, ବଲବୀର ସିଦ୍ଧୁ, ରାଣା ଗୁରମିତ ସୋଢି, ଗୁରପ୍ରୀତ କାଙ୍ଗାର ଏବଂ ସୁନ୍ଦର ଶ୍ୟାମ ଆରୋରା ଅଛନ୍ତି। ସେହିପରି ମନ୍ତ୍ରୀଙ୍କର ଶପଥ ପୂର୍ବରୁ ରାଣା ଗୁରଜିତ ସିଂହଙ୍କୁ ନେଇ ଘୋର ବିରୋଧ ହୋଇଥିଲା। ମନ୍ତ୍ରିମଣ୍ଡଳ ସମ୍ପ୍ରସାରଣର କିଛି ଘଣ୍ଟା ପୂର୍ବରୁ ରାଜ୍ୟର କିଛି କଂଗ୍ରେସ ନେତା ରବିବାର ପାର୍ଟିର ରାଜ୍ୟ ୟୁନିଟର ମୁଖ୍ୟ ନବଜୋତ୍ ସିଂହ ସିଦ୍ଧୁଙ୍କୁ ଚିଠି ଲେଖି ଗୁରଜିତଙ୍କୁ ମନ୍ତ୍ରିମଣ୍ଡଳରେ ସାମିଲ୍ ନକରିବାକୁ କହିଥିଲେ। ଏହି ନେତାମାନେ କହିଛନ୍ତି ଯେ ତାଙ୍କ ସ୍ଥାନରେ ସ୍ୱଚ୍ଛ ଭାବମୂର୍ତ୍ତି ଥିବା ଜଣେ ଦଳିତ ନେତା (ରାଣା ଗୁରୁଜିତ୍)ଙ୍କୁ ମନ୍ତ୍ରୀ ପଦ ଦିଆଯିବା ଉଚିତ୍।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
