୧୫୦ ଛାତ୍ରଛାତ୍ରୀ ଓ ୩୪ ଶିକ୍ଷକ,ଶିକ୍ଷୟିତ୍ରୀ କରୋନା ପଜିଟିଭ୍

ତିରୁଅନନ୍ତପୁରମ: କେରଳର ମାଲାପୁରମର ମାରାନଚେରୀସ୍ଥିତ ଏକ ସରକାରୀ ସ୍କୁଲ୍‌ର ୧୫୦ ଜଣ ଛାତ୍ରଛାତ୍ରୀ ଓ ୩୪ ଜଣ ଶିକ୍ଷକଶିକ୍ଷୟିତ୍ରୀ କରୋନା ପଜିଟିଭ୍ ଚିହ୍ନଟ ହୋଇଛନ୍ତି।

ଏହି ସ୍କୁଲ୍‌ର ଜଣେ ଛାତ୍ର କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିବ ପରେ ଦଶମ ଶ୍ରେଣୀର ସମସ୍ତ ଛାତ୍ରଛାତ୍ରୀଙ୍କ ସହିତ ସମସ୍ତ ଶିକ୍ଷକଙ୍କ ସମେତ ମୋଟ ୬୮୪ ଜଣଙ୍କ କରୋନା ପରୀକ୍ଷା କରାଯାଇଥିଲା। କରୋନା ପଜିଟିଭ୍ ଚିହ୍ନଟ ହୋଇଥିବା ସମସ୍ତ ୧୫୦ ଛାତ୍ରଛାତ୍ରୀ ଦଶମ ଶ୍ରେଣୀର। କିନ୍ତୁ ସେମାନଙ୍କ ମଧ୍ୟରୁ କାହାଠାରେ କରୋନାର ଲକ୍ଷଣ ଦେଖିବାକୁ ମିଳି ନଥିଲା।

ଏହି ସ୍କୁଲ୍‌ରେ ଏକାଦଶ ଓ ଦ୍ୱାଦଶ ଶ୍ରେଣୀ ମଧ୍ୟ ରହିଛି। ତେବେ ସେମାନଙ୍କର କରୋନା ପରୀକ୍ଷା କରାଯାଇ ନାହିଁ। କିନ୍ତୁ ସେମାନଙ୍କର ବି କରୋନା ପରୀକ୍ଷା କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି।

ତିସୁର ଜିଲ୍ଲାରୁ ମଧ୍ୟ ପିଲାମାନେ ଏହି ସ୍କୁଲ୍‌ରେ ପଢୁଛନ୍ତି। ତେଣୁ ଏବେ ସମସ୍ତ ଛାତ୍ରଛାତ୍ରୀଙ୍କୁ କ୍ୱାରେଣ୍ଟାଇନ୍‌ରେ ରହିବାକୁ କୁହାଯାଇଛି। ଅନ୍ୟପକ୍ଷରେ ଏହି ଘଟଣା ପରେ ସମସ୍ତ ସ୍କୁଲ୍‌ରେ କୋଭିଡ୍ କଟକଣାକୁ କଡ଼ାକଡ଼ି କରିବାକୁ ନିର୍ଦ୍ଦେଶ ଦିଆଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।