ଦିସପୁର: ପାସପୋର୍ଟ ଓ ଭିସା ନଥାଇ ଟ୍ରେନ୍ରେ ଯାତ୍ରା ବେଳେ ଆସାମରୁ ଧରାପଡ଼ିଲେ ୨ ୟୁକ୍ରେନ୍ ନାଗରିକ । ସେମାନଙ୍କୁ ଆସାମ କରମଗଞ୍ଜ ଜିଲ୍ଲା ବଦରପୁର ରେଳ ଷ୍ଟେସନରେ ଅଟକ ରଖାଯାଇଛି । ତ୍ରିପୁରା ଅଗରତାଲାରୁ ଦିଲ୍ଲୀ ଅଭିମୁଖେ ଯାଉଥିବା ତ୍ରିପୁରାସୁନ୍ଦରୀ ଏକ୍ସପ୍ରେସ୍ରେ ସେମାନେ ଯାତ୍ରା କରୁଥିଲେ। ସେମାନଙ୍କ ଠାରୁ ବାଂଲାଦେଶୀ ଟଙ୍କା ଓ ଅନ୍ୟ କିଛି ସାମଗ୍ରୀ ଜହତ ହୋଇଛି । ଆରପିଏଫ ଓ ଜିଆରପି ଯବାନ ସେମାନଙ୍କୁ ଷ୍ଟେସନରେ ସନ୍ଦେହଜନକ ଅବସ୍ଥାରେ ବୁଲୁଥିବା ଦେଖି ପଚରାଉଚରା କରିବାରୁ କଥା ସାମ୍ନାକୁ ଆସିଥିଲା ।
ସେମାନେ ଗତ ଫେବୃଆରୀରେ ଭାରତ ଆସିଥିଲେ ଏବଂ ନୂଆଦିଲ୍ଲୀ ଓ କୋଲକାତା ଆଦି ଯାଇଥିଲେ । ତେବେ ତ୍ରିପୁରାରେ ସେମାନଙ୍କ ପାସପୋର୍ଟ ଓ ଭିସା ଚୋରି ହୋଇଯାଇଥିବା ସେମାନେ କହିଛନ୍ତି ।
ଏହାର ସତ୍ୟାସତ୍ୟ ଯାଞ୍ଚ କରାଯିବା ସହ ୟୁକ୍ରେନ୍ ଦୂତାବାସ ସହିତ ଯୋଗାଯୋଗ କରାଯାଉଥିବା ସୂଚନା ମିଳିଛି। ଉଭୟ ହେଲେ କ୍ରିସନସ୍କି ଭୋଲଦିମିର ଏବଂ ନାଜରି ଭୋଜନ୍ୟୁକ୍। ରୁଷ ଆକ୍ରମଣ ପୂବଆରୁ ଉଭୟେ ଭାରତ ଆସିଥିବେ କହିଛନ୍ତି। ଅନ୍ୟପଟେ ରୁଷ-ୟୁକ୍ରେନ୍ ଯୁଦ୍ଧ ଯୋଗୁ ୟୁକ୍ରେନ୍ର ୨୩୪୫ ଜଣଙ୍କର ମୃତ୍ୟୁ ଘଟିଥିବା ଆମେରିକା କହିଛି।