ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଗଷ୍ଟ ୨, ୨୦୨୧ରେ ଭିଡିଓ କନଫରେନ୍ସିଂ ମାଧ୍ୟମରେ ଡିଜିଟାଲ ପେମେଣ୍ଟ ସଲ୍ୟୁସନ ଇ-ରୁପି (e-RUPI) ଶୁଭାରମ୍ଭ କରିବେ । ସରକାରୀ ସୁବିଧା ହିତାଧିକାରୀମାନଙ୍କ ନିକଟରେ ବିନା ବାଟମାରଣାରେ କିଭଳି ପହଞ୍ଚିବ ତାକୁ ସୁନିଶ୍ଚିତ କରିବା ପାଇଁ ସରକାର ଚେଷ୍ଟା କରୁଛନ୍ତି। ବିଗତ କିଛି ବର୍ଷରେ ଏଭଳି କିଛି କାର୍ଯ୍ୟକ୍ରମ ଆରମ୍ଭ କରାଯାଇଛି। ଏହି ନିଆରା ସୁବିଧା ଅନୁଯାୟୀ ସରକାର ଓ ହିତାଧିକାରୀଙ୍କ ମଧ୍ୟରେ ନିର୍ଦ୍ଦିଷ୍ଟ କିଛି ଟଚ୍ ପଏଣ୍ଟ ରହିଛି । ଏପରି ସେବା ସୁଶାସନ ଦୃଷ୍ଟିକୋଣକୁ ଆଗେଇ ନେବ ବୋଲି ସରକାର ଆଶାବାଦୀ ରହିଛନ୍ତି।
ଇ-ରୁପି କ'ଣ ?
ଇ-ରୁପି ଡିଜିଟାଲ ପେମେଣ୍ଟର ଏକ ନଗଦ ବିହୀନ ଓ ସମ୍ପର୍କମୁକ୍ତ ମାଧ୍ୟମ। ଏହା ଏକ କ୍ୟୁଆର କୋଡ କିମ୍ବା ଏମଏମଏସ ଷ୍ଟ୍ରିଙ୍ଗ ଆଧାରିତ ଇ-ଭାଉଚର, ଯାହା ହିତାଧିକାରୀଙ୍କ ମୋବାଇଲରେ ପହଞ୍ଚିଥାଏ । ଏହି ଅବାଧ ଏକକାଳୀନ ଦେୟପଇଠ ବ୍ୟବସ୍ଥାର ବ୍ୟବହାରକାରୀ ଭାଉଚରକୁ କାର୍ଡ ବ୍ୟବହାର ନକରି ଡିଜିଟାଲ ପେମେଣ୍ଟ ଆପ୍ କିମ୍ବା ଇଣ୍ଟରନେଟ ବ୍ୟାଙ୍କିଙ୍ଗ ମାଧ୍ୟମରେ ସେବା ପ୍ରଦାନକାରୀଙ୍କ ନିକଟରେ ରିଡିମ କରିପାରିବେ । ନ୍ୟାସନାଲ ପେମେଣ୍ଟସ କର୍ପୋରେସନ ଅଫ ଇଣ୍ଡିଆ ନିଜ ୟୁପିଆଇ ପ୍ଲାଟଫର୍ମରେ ବିତ୍ତୀୟ ସେବା ବିଭାଗ, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ଓ ଜାତୀୟ ସ୍ୱାସ୍ଥ୍ୟ କର୍ତ୍ତୃପକ୍ଷଙ୍କ ସହଯୋଗରେ ଏହା ବିକଶିତ ହୋଇଛି।
କୌଣସି ଫିଜିକାଲ ଇଣ୍ଟରଫେସ ବିନା ଡିଜିଟାଲ ଶୈଳୀରେ ହିତାଧିକାରୀ ଓ ସେବାପ୍ରଦାନକାରୀଙ୍କ ସହ ସେବାର ପ୍ରାୟୋଜକଙ୍କ ସହ ଯୋଡିଥାଏ । ନେଣଦେଣ ସରିବା ପରେ ଏହା ସେବା ପ୍ରଦାନକାରୀଙ୍କୁ ଦେୟ ପଇଠ ସୁନିଶ୍ଚିତ କରିବ । ପ୍ରି-ପେଡ ହୋଇଥିବାରୁ ମଧ୍ୟସ୍ଥିଙ୍କ ହସ୍ତକ୍ଷେପ ବିନା ସେବାପ୍ରଦାନକାରୀଙ୍କୁ ଠିକ୍ ସମୟରେ ଦେୟ ପଇଠ ସମ୍ଭବ ହୋଇପାରିବ।
ବାଟମାରଣା ମୁକ୍ତ କଲ୍ୟାଣକାରୀ ସେବା ପ୍ରଦାନ ସୁନିଶ୍ଚିତ କରିବା ଦିଗରେ ଏହା ଏକ ବୈପ୍ଳବିକ ଉପକ୍ରମ ହେବ ବୋଲି ଆଶା ରହିଛି । ଏହାର ବ୍ୟବହାର ମା ଓ ଶିଶୁ କଲ୍ୟାଣ ଯୋଜନା ଅନ୍ତର୍ଗତ ଔଷଧ ଓ ପୋଷଣ ସହାୟତା ପ୍ରଦାନ, ଟିବି ନିର୍ମୂଳ କାର୍ଯ୍ୟକ୍ରମ, ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଭଳି ଯୋଜନା ଅନ୍ତର୍ଗତ ଔଷଧ ଓ ନିଦାନ, ସାର ସବସିଡି ପ୍ରଦାନ ଯୋଜନା ଭଳି ସେବା ଉପଲବ୍ଧ କରାଯାଇପାରିବ । ଏପିରିକି ବେସରକାରୀ କ୍ଷେତ୍ରଗୁଡିକ ମଧ୍ୟ ନିଜ କର୍ମଚାରୀ କଲ୍ୟାଣ ଓ କର୍ପୋରେଟ ସାମାଜିକ ଦାୟିତ୍ୱ କାର୍ଯ୍ୟକ୍ରମ ଅନ୍ତର୍ଗତ ଏହି ଡିଜିଟାଲ ଭାଉଚର ଉପଯୋଗ କରିପାରିବେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
