ଅଯୋଧ୍ୟା: ଅଯୋଧ୍ୟାରେ ରାମ ମନ୍ଦିର ଜମିକୁ ନେଇ ପ୍ରଶ୍ନ ଉଠାଇଛନ୍ତି ସମାଜବାଦୀ ପାର୍ଟି ଏବଂ ଆମ୍ ଆଦମୀ ପାର୍ଟିର ନେତା। ମନ୍ଦିର ଟ୍ରଷ୍ଟ ଜମି କିଣିବାରେ ଘୋଟାଲା ହୋଇଥିବା ଅଭିଯୋଗ ହୋଇଛି। ବିବାଦ ଘନଉଥିବା ଦେଖି ଟ୍ରଷ୍ଟ ତା’ର ସ୍ପଷ୍ଟୀକରଣ ରଖିଛି।
ଟ୍ରଷ୍ଟର ସଚିବ ତଥା ସାଧାରଣ ସମ୍ପାଦକ ଚମ୍ପତ ରାୟ କହିଛନ୍ତି ଯେ ମନ୍ଦିର ଜମି କିଣିବାରେ ଠକେଇ ଅଭିଯୋଗ ରାଜନୀତିକ ମତଭେଦ କାରଣରୁ ହୋଇଛି। ସମସ୍ତ ଜମି ବଜାର ମୂଲ୍ୟଠାରୁ କମ୍ ଦରରେ କିଣାଯାଇଛି।
ସେ କହିଛନ୍ତି ଯେ ଜମି କିଣିବା ପୂର୍ବରୁ ଟ୍ରଷ୍ଟ ସହିତ ଜମି ମାଲିକଙ୍କ ସହ ଆଲୋଚନା ହୋଇଥିଲା। ଏହାପରେ ଟ୍ରଷ୍ଟ ଜମି କିଣିଛି। ଜମି କିଣା ନେଇ କୌଣସି ଆପତ୍ତି ନଥିବାରୁ ସେ ଉଭୟ ଦଲିଲରେ ହସ୍ତାକ୍ଷର କରିଛନ୍ତି। ଜମି କିଣିବା ବେଳେ ଅନଲାଇନରେ ଷ୍ଟାମ୍ପ ପେପର କିଣା ହୋଇଥିଲା। ଏହାପରେ ବିକ୍ରେତାଙ୍କ ଆକାଉଣ୍ଟକୁ ଟ୍ରଷ୍ଟ ଟଙ୍କା ପଠାଇଛି ବୋଲି ଚମ୍ପତ କହିଛନ୍ତି।
ସମାଜବାଦୀ ଦଳର ବରିଷ୍ଠ ନେତା ତେଜ ନାରାୟଣ ପାଣ୍ଡେ ଏହି ଅଭିଯୋଗ ଉଠାଇ ପ୍ରଶ୍ନ କରିଥିଲେ ଯେ ଯେଉଁ ଜମିର ମୂଲ୍ୟ ୨ କୋଟି ଟଙ୍କା ଥିଲା ସେହି ଜମିକୁ ୧୮.୫୦ କୋଟି ଟଙ୍କାରେ କିଣାଯାଇଛି। ଏ ସଂପର୍କରେ ଅନେକ ଦଲିଲ ଓ ପ୍ରମାଣପତ୍ର ଉପସ୍ଥାପନ କରି ସେ ଏହାର ସିବିଆଇ ତଦନ୍ତ ଦାବି କରିଛନ୍ତି। ତେବେ ଏହି ଦଲିଲ ଦେଖିବା ପରେ ପ୍ରତିକ୍ରିୟା ଦେବେ ବୋଲି କହିଛନ୍ତି ଚମ୍ପତ ରାୟ।
ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ସଞ୍ଜୟ ସିଂହ ମଧ୍ୟ ଟ୍ରଷ୍ଟ ବିରୋଧରେ ଦୁର୍ନୀତି ଅଭିଯୋଗ ଆଣିଛନ୍ତି। ଆର୍ଥିକ ଅନିୟମିତତା ଅଭିଯୋଗ କରି ସେ ସିବିଆଇ ଏବଂ ଇଡିଙ୍କୁ ଏହି ଘଟଣାର ତଦନ୍ତ କରିବାକୁ ଦାବି କରିଛନ୍ତି। ଲକ୍ଷ୍ନୌରେ ଏକ ସାମ୍ବାଦିକ ସମ୍ମିଳନୀ କରିବାବେଳେ ସଞ୍ଜୟ ସିଂହ କହିଛନ୍ତି ଯେ ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ ଟ୍ରଷ୍ଟ ସଦସ୍ୟ ଅନୀଲ ମିଶ୍ରଙ୍କ ସହାୟତାରେ ୨ କୋଟି ଟଙ୍କାର ଜମିକୁ ୧୮ କୋଟି ଟଙ୍କାରେ କିଣିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
