ରୋହତକ୍: ଶନିବାର ବିଜେପି ସାଂସଦ ଅରବିନ୍ଦ ଶର୍ମା ଧମକ ଦେଇଛନ୍ତି। ଯଦି କେହି ହରିୟାଣାର ପୂର୍ବତନ ମନ୍ତ୍ରୀ ମନୀଷ ଗ୍ରୋଭରଙ୍କୁ ଟାର୍ଗେଟ କରିବାକୁ ଚେଷ୍ଟା କରନ୍ତି ତେବେ ସେମାନଙ୍କ ଆଖି କଣା କରିଦିଆଯିବ। ଆଉ ହାତ କାଟି ଦିଆଯିବ । ଗ୍ରୋଭର ସମେତ କିଛି ବିଜେପି ନେତାଙ୍କୁ ହରିୟାଣାର ରୋହତକସ୍ଥିତ ଏକ ମନ୍ଦିର କମ୍ପ୍ଲେକ୍ସରେ ଅଟକ ରଖାଯିବା ପରେ ଏପରି ମନ୍ତବ୍ୟ ଦେଇଛନ୍ତି ଅରବିନ୍ଦ ।
ମନୀଷ ଗ୍ରୋଭର ଏବଂ ଅନ୍ୟ ବିଜେପି ନେତାଙ୍କୁ ଶୁକ୍ରବାର ହରିୟାଣାର ରୋହତକରେ ଥିବା ଏକ ମନ୍ଦିର କମ୍ପ୍ଲେକ୍ସରେ କିଛି ଘଣ୍ଟା ପାଇଁ ବନ୍ଦୀ ରଖାଯାଇଥିଲା । ଏନେଇ ବିଜେପି ସାଂସଦ ଅରବିନ୍ଦ ଶର୍ମା କଂଗ୍ରେସ ଏବଂ ଦଳର ନେତା ଭୁପିନ୍ଦର ସିଂ ହୁଡା ଏବଂ ତାଙ୍କ ପୁଅ ଦିପେନ୍ଦର ହୁଡାଙ୍କୁ ଟାର୍ଗେଟ କରିଛନ୍ତି। ଦିପେନ୍ଦର ଲୋକସଭା ନିର୍ବାଚନରେ ହାରିଯାଇ ଯାଇଥିବାରୁ ସେ ମନୀଷ ଗ୍ରୋଭରଙ୍କୁ ଆକ୍ରମଣ କରୁଛନ୍ତି ବୋଲି ବିଜେପି ନେତା ଅଭିଯୋଗ ଆଣିଛନ୍ତି। ରୋହତକ ସାଂସଦ ଶର୍ମା କହିଛନ୍ତି ଯେ, ମନୀଷ ଗ୍ରୋଭରଙ୍କ କାରଣରୁ ରୋହତକ ଲୋକସଭା ଆସନ ଦିପେନ୍ଦର ଜିତିପାରିଲେ ନାହିଁ।
ଦିପେନ୍ଦର ହୁଡାଙ୍କୁ ଚେତାବନୀ ଦେଇ ଶର୍ମା କହିଛନ୍ତି, ଯଦି ମନୀଷ ଗ୍ରୋଭରଙ୍କ ବିରୋଧରେ କେହି ଆଖି ଉଠାଯାଏ, ତେବେ ସେହି ଆଖି କଣାକରି ଦିଆଯିବ ଏବଂ ହାତ କାଟି ଦିଆଯିବ। ଆମେ କାହାକୁ ଛାଡ଼ିବୁ ନାହିଁ। ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉତ୍ତରରାଖଣ୍ଡ ଗସ୍ତର ସିଧା ପ୍ରସାରଣ ଦେଖିବା ପାଇଁ ବିଜେପି ନେତାମାନେ କିଲୋଇ ଗାଁର ଏକ ପ୍ରାଚୀନ ଶିବ ମନ୍ଦିରକୁ ଯାଇଥିଲେ। ସେଠାରେ ଏହି ଖବର ପ୍ରଚାରିତ ହେବା ମାତ୍ରେ କୃଷକମାନେ - ତିନୋଟି ନୂତନ କୃଷି ନିୟମକୁ ବିରୋଧ କରି ମନ୍ଦିରରେ ପହଞ୍ଚି ତାଙ୍କୁ ଘେରାଉ କରିଥିଲେ। ସେମାନେ ଟିଭି ସଂଯୋଗ କାଟି ମନ୍ଦିରର ପ୍ରବେଶ ପଥକୁ ଅବରୋଧ କରିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
