ନୂଆଦିଲ୍ଲୀ: ଆସନ୍ତା ସାଧାରଣ ନିର୍ବାଚନ ପାଇଁ କଂଗ୍ରେସ ଓ ଜେଡିଏସ୍ ଏକାଠି ଲଢ଼ିବା ଏକ ପ୍ରକାରର ନିଶ୍ଚିତ ହୋଇଛି। କର୍ଣ୍ଣାଟକାର ୨୮ଟି ଲୋକସଭା ଆସନରୁ ଜେଡିଏସ୍ ୧୦ଟି ଆସନରେ ପ୍ରାର୍ଥୀ ଦେବ ବୋଲି ଆଜି ଜଣାପଡ଼ିଛି।
ପୂର୍ବରୁ ଜେଡିଏସ୍ ରାଜ୍ୟର ୧୨ଟି ଆସନରେ ଲଢ଼ିବେ ବୋଲି ଦାବି କରିଥିଲା। କିନ୍ତୁ ଆଜି ଦିଲ୍ଲୀଠାରେ ଜେଡିଏସ୍ ସୁପ୍ରିମୋ ଏଚ୍ଡି ଦେବଗୌଡ଼ା ଓ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ରୁଦ୍ଧଦ୍ୱାର ବୈଠକ କରିଥିଲେ। ଏହି ସମୟରେ ଜେଡିଏସ୍ ୧୦ଟି ଆସନରେ ପ୍ରାର୍ଥୀ ଦେବ ବୋଲି ସ୍ଥିର ହୋଇଥିବା ଜଣାପଡ଼ିଛି। ଏ ସମ୍ପର୍କରେ ଚୂଡ଼ାନ୍ତ ଘୋଷଣା ଆସନ୍ତା ୧୦ ତାରିଖରେ ହେବ।
ଆଜି ରାହୁଲ ଓ ଦେବଗୌଡ଼ା ଦୀର୍ଘ ୨ ଘଣ୍ଟା କାଳ ଆଲୋଚନା କରିଥିଲେ। ଏଥିରେ ଉଭୟ ନେତା କର୍ଣ୍ଣାଟକାର ରାଜନୀତିକ ସ୍ଥିତି ଓ ଶିଟ୍ ଶେୟାରିଂ ସମ୍ପର୍କରେ ବିସ୍ତୃତ ଭାବେ କଥାବାର୍ତ୍ତା ହୋଇଥିଲେ। ଏହି ବୈଠକରେ କର୍ଣ୍ଣାଟକା ଏଆଇସିସି ସାଧାରଣ ସମ୍ପାଦକ କେସି ଭେନୁଗୋପାଲ ଓ ଜେଡିଏସ୍ ସାଧାରଣ ସମ୍ପାଦକ ଦାନିଶ ଅଲୀ ଉପସ୍ଥିତ ରହିଥିଲେ।
ବୈଠକ ପରେ ଦେବ ଗୌଡ଼ା କହିଛନ୍ତି, “ରାହୁଲଙ୍କ ସହ ଶିଟ୍ ଶେୟାରିଂ ସମ୍ପର୍କରେ କଥା ହୋଇଛି। ଶିଟ୍ ଶେୟାରିଂ ସମ୍ପର୍କରେ କଂଗ୍ରେସ ଓ ଜେଡିଏସ୍ ପ୍ରଥମଥର ପାଇଁ ଆଲୋଚନା କରିଛନ୍ତି। ପୂର୍ବରୁ ମୁଁ ୧୨ଟି ଆସନ ପାଇଁ ଅନୁରୋଧ କରିଥିଲି। ହେଲେ ଆଜି ଅତିକମ୍ରେ ୧୦ଟି ଆସନ ଜେଡିଏସ୍କୁ ଦେବାକୁ ରାହୁଲଜୀଙ୍କୁ କହିଛି।”
ଅନ୍ୟପକ୍ଷରେ କଂଗ୍ରେସ ଆଜିର ବୈଠକ ପରେ ଜେଡିଏସ୍କୁ ୯ଟି ଆସନ ଦେବାକୁ ଚାହୁଁଥିବା ଚର୍ଚ୍ଚା ହେଉଛି। ଯଦି ଏହା ସତ ତା’ହେଲେ ଦୁଇ ଦଳ ୧୯-୯ ଫର୍ମୁଲା ଆପଣାଇ ପାରନ୍ତି। କିନ୍ତୁ ଏଥିରେ ଜେଡିଏସ୍ ରାଜି ହେବ କି ନାହିଁ, ତା’ ସବୁଠାରୁ ବଡ଼ ପ୍ରଶ୍ନ।