ନୂଆଦିଲ୍ଲୀ: ପୁଣିଥରେ ରାଫେଲ ଯୁଦ୍ଧ ବିମାନ ଡିଲ୍କୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସିଧାସଳଖ ଟାର୍ଗେଟ କରିଛନ୍ତି କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି। ରାଫେଲ ଡିଲ୍ ସମ୍ପର୍କିତ ଦସ୍ତାବିଜ୍ ଚୋରି ହୋଇଯାଇଥିବା ସରକାର ସୁପ୍ରିମ କୋର୍ଟଙ୍କୁ ଜଣାଇବା ପରେ ଏହାକୁ ଆଧାର କରି ରାହୁଲ ପ୍ରଧାନମନ୍ତ୍ରୀ ମୋଦିଙ୍କୁ ଘେରିବାକୁ ଚେଷ୍ଟା କରିଛନ୍ତି। ଏଥିସହ ସେ ମୋଦି ସରକାରଙ୍କ ପାଇଁ ନୂଆ ଟ୍ୟାଗ୍ ଲାଇନ୍ ‘ଗାୟବ ହୋ ଗୟା’ ବାହାର କରିଛନ୍ତି।
ଆଜି ରାହୁଲ ଗାନ୍ଧି ସାମ୍ବାଦିକ ସମ୍ମିଳନୀ କରି ମୋଦିଙ୍କ ଉପରେ ବର୍ଷିଥିଲେ। 'ଗାୟବ ହୋ ଗୟା' ଟ୍ୟାଗ୍କୁ ଯଥାର୍ଥ ଦର୍ଶାଇବା ପାଇଁ ରାହୁଲ ଯୁବକଙ୍କୁ ଚାକିରି, ଚାଷୀଙ୍କ ଆୟ, ୧୫ ଲକ୍ଷ ଟଙ୍କା ଆକାଉଣ୍ଟକୁ ଆସିବା, ଚାଷୀଙ୍କୁ ବୀମା ପ୍ରଦାନ, ବିମୁଦ୍ରାକରଣ ପରେ କଳାଧନ ଫେରିବା ଓ ଡୋକଲାମ ଆଦି ପ୍ରସଙ୍ଗ ଉଠାଇଥିଲେ। ଏଭଳି ପ୍ରତିଶ୍ରୁତି ମୋଦି ପୂର୍ବରୁ ଦେଇଥିବା ବେଳେ ଏବେ ଏସବୁ ଗାୟବ ହୋଇଯାଇଥିବା ରାହୁଲ କଟାକ୍ଷ କରି କହିଛନ୍ତି।
ରାହୁଲ କହିଛନ୍ତି, “ ରାଫେଲ ଡିଲ୍ରେ ମୋଦିଙ୍କ ସଂପୃକ୍ତି ଥିବା ପ୍ରମାଣିତ ହୋଇଛି। ତେଣୁ ତାଙ୍କ ବିରୋଧରେ ତଦନ୍ତ ହେବା ଦରକାର। ଯଦି ଚୌକିଦାର(ମୋଦି) ସ୍ୱଚ୍ଛ, ତା’ହେଲେ ଘଟଣାର ତଦନ୍ତ କାହିଁକି କରୁନାହାନ୍ତି? ତଦନ୍ତ ପରେ ସବୁ କିଛି ସ୍ପଷ୍ଟ ହୋଇଯିବ। ମୋଦି ତାଙ୍କ ବନ୍ଧୁ ଅନୀଲ ଅମ୍ବାନୀଙ୍କୁ ଫାଇଦା ଦେବାକୁ ଏଭଳି ଡିଲ୍ରେ ହସ୍ତକ୍ଷେପ କରିଥିଲେ।”
ଏହି ପ୍ରସଙ୍ଗରେ ରାହୁଲଙ୍କୁ ଅନେକ ବିରୋଧୀ ଦଳର ନେତାମାନେ ସମର୍ଥନ କରିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
