ନୂଆଦିଲ୍ଲୀ: ବହୁଚର୍ଚ୍ଚିତ ଶୀନା ବୋରା ହତ୍ୟା ମାମଲାର ମୁଖ୍ୟ ଅଭିଯୁକ୍ତ ଇନ୍ଦ୍ରାଣୀ ମୁଖାର୍ଜୀଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡିଛି। ମୁମ୍ୱାଇ ଜେଜେ ହସ୍ପିଟାଲରେ ଇନ୍ଦ୍ରାଣୀଙ୍କ ଚିକିତ୍ସା ଚାଲିଛି। ନିଃଶ୍ୱାସ ନେବାରେ କଷ୍ଟ ଅନୁଭବ କରୁଥିବାରୁ ତାଙ୍କୁ ଅକ୍ସିଜେନରେ ରଖାଯାଇଛି। ତାଙ୍କ ସ୍ୱାସ୍ଥ୍ୟବସ୍ଥାରେ କୌଣସି ସୁଧାର ଆସି ନଥିବା ଡାକ୍ତର କହିଛନ୍ତି।
ଛାତିରେ ଯନ୍ତ୍ରଣା ଅନୁଭବ କରିବା ପରେ ଗତକାଲି ଇନ୍ଦ୍ରାଣୀଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ମାତ୍ରାଧିକ ଔଷଧ ସେବନ ଯୋଗୁଁ ଇନ୍ଦ୍ରାଣୀ ଅସୁସ୍ଥ ହୋଇପଡ଼ିଥିବା ସନ୍ଦେହ କରାଯାଉଛି। ସେହି ଭିତ୍ତିରେ ତାଙ୍କର ଚିକିତ୍ସା ଚାଲିଛି।
ଜେଲ୍ ବିଭାଗ ଆଇଜି କହିଛନ୍ତି ଇନ୍ଦ୍ରାଣୀ କୌଣସି ଏକ ରୋଗ ପାଇଁ ସକାଳେ ଓ ସଂଧ୍ୟାରେ ଜେଲ୍ କର୍ତ୍ତୃପକ୍ଷଙ୍କ ତତ୍ତ୍ୱାବଧାନରେ ଔଷଧ ସେବନ କରିଥାନ୍ତି। ତେବେ ମାତ୍ରାଧିକ ଔଷଧ ସେବନ ସଂପର୍କରେ ଜେଲ୍ କର୍ତ୍ତୃପକ୍ଷଙ୍କୁ ପଚରାଉଚରା କରାଯିବ। ସେପେଟେ ଇନ୍ଦ୍ରାଣୀଙ୍କ ଅସୁସ୍ଥତାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍।