ନୂଆଦିଲ୍ଲୀ: ବହୁଚର୍ଚ୍ଚିତ ଶାରଦା ଚିଟଫଣ୍ଡ ଘୋଟାଲା ମାମଲାରେ ତଦନ୍ତରେ ସହଯୋଗ କରନୁଥିବା ଟେଲିକମ କମ୍ପାନୀ ଭୋଡାଫୋନ ଓ ଏୟାରଟେଲକୁ ସୁପ୍ରିମ କୋର୍ଟ ନୋଟିସ ପଠାଇଛନ୍ତି। ଏହି ଦୁଇ ଟେଲିକମ କମ୍ପାନୀ ଚିଟଫଣ୍ଡ ଦୁର୍ନୀତି ତଦନ୍ତରେ ସହଯୋଗ କରୁନଥିବା ଦର୍ଶାଇ ସିବିଆଇ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା।
ସୁପ୍ରିମକୋର୍ଟର ମୁଖ୍ୟ ବିଚାରପତି ରଞ୍ଜନ ଗୋଗୋଇଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ନୋଟିସ ପଠାଇଛନ୍ତି।
ପଶ୍ଚିମବଙ୍ଗରେ ଏହି ଚିଟଫଣ୍ଡ ଘୋଟାଲା ସାମ୍ନାକୁ ଆସିବା ପରେ ରାଜ୍ୟ ସରକାର ଏସଟିଏଫ ତଦନ୍ତ ନିର୍ଦ୍ଦେଶ ଦେଇଥିଲେ। ଯାହାର ମୁଖ୍ୟ ଥିଲେ ରାଜୀବ କୁମାର। ତେବେ ତଦନ୍ତ ବେଳେ ଅନେକ ପ୍ରମାଣ ନଷ୍ଟ କରିଦିଆଯାଇଥିବା ଜଣାପଡ଼ିଥିଲା। ଯେଉଁଥିରେ ତଦନ୍ତ ଅଧିକାରୀ ରାଜୀବ କୁମାରଙ୍କର ସହଯୋଗ ରହିଛି ବୋଲି ସିବିଆଇ ଜାଣିବାକୁ ପାଇଥିଲା।
ଏହି ଘୋଟାଲାରେ ଶାସକ ତୃଣମୁଳ କଂଗ୍ରେସର ଅନେକ ନେତା ସାମିଲ ଥିବା ଜଣାପଡ଼ିଛି। କୋଲକାତା ପୋଲିସ କମିଶନର ରାଜୀବ କୁମାର ଏହି ଦୁଇ ଟେଲିକମ କମ୍ପାନୀର ସିମକାର୍ଡ ବ୍ୟବହାର କରି ଅନେକ ଫୋନ କଲ କରିଥିବା ଜଣାପଡ଼ିଛି।
ତେବେ ରାଜୀବ କୁମାର ଚିଟଫଣ୍ଡ ଘୋଟାଲାର ତଦନ୍ତ କରୁଥିବାବେଳେ କାହାକାହା ସହ ଯୋଗାଯୋଗରେ ଥିଲେ ଏବଂ କିଏ ତାଙ୍କୁ ପ୍ରମାଣ ନଷ୍ଟ ପାଇଁ ପ୍ରବର୍ତ୍ତାଇ ଥିଲା ବୋଲି ଜାଣିବାକୁ ଚେଷ୍ଟା କରିଛି ସିବିଆଇ। ରାଜୀବ କୁମାର ତଦନ୍ତ କରୁଥିବାବେଳେ ଭୋଡାଫୋନ ଓ ଏୟାରଟେଲ ସିମ୍ ବ୍ୟବହାର କରୁଥିବା ଜଣାପଡ଼ିବା ପରେ କଲ ଡିଟେଲ୍ସ ପାଇଁ ଏହି ଦୁଇକମ୍ପାନୀକୁ ସିବିଆଇ ପ୍ରମାଣ ମାଗିଛି। ହେଲେ ଏହି ଦୁଇ କମ୍ପାନୀ ତଥ୍ୟ ଦେଉନଥିବା ସିବିଆଇ କୋର୍ଟରେ ଦର୍ଶାଇଛି।
ସେପଟେ ମଙ୍ଗଳବାର ସିବିଆଇ ଶାରଦା ଘୋଟାଲା ତଦନ୍ତର ଷ୍ଟାଟସ୍ ରିପୋର୍ଟ ସୁପ୍ରିମକୋର୍ଟରେ ଦାଖଲ କରିଛି। ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ୍ ରଞ୍ଜନ ଗୋଗୋଇ ରିପୋର୍ଟ ଦେଖିବା ପରେ ସିବିଆଇକୁ ଶ୍ରୀ କୁମାରଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ କୋର୍ଟଙ୍କୁ ଆବେଦନ କରିବାକୁ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
