ନୂଆଦିଲ୍ଲୀ: ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତଥା କୁଖ୍ୟାତ ଆତଙ୍କବାଦୀ ହାଫିଜ୍ ସୟିଦକୁ ଆଜି ମିଳିତ ଜାତିସଂଘ ଜବରଦସ୍ତ ଝଟ୍କା ଦେଇଛି। ଜାତିସଂଘ ପକ୍ଷରୁ ହାଫିଜ୍କୁ ବିଶ୍ୱସ୍ତରୀୟ ଆତଙ୍କୀ ଘୋଷଣା କରାଯାଇଥିଲା। ତେବେ ସେ ଏହି ଅସିଦ୍ଧ ତାଲିକାରରୁ ମୁକ୍ତି ପାଇବା ପାଇଁ ନିକଟରେ ନିବେଦନ କରିଥିଲା। ହେଲେ ଜାତିସଂଘ ହାଫିଜର ଏହି ଆବେଦନକୁ ଖାରଜ କରି ଦେଇଛନ୍ତି।
ଗୋଟିଏ ପଟେ ପାକିସ୍ତାନରେ ସକ୍ରିୟ ଥିବା ଅନ୍ୟତମ କୁଖ୍ୟାତ ଆତଙ୍କୀ ତଥା ଜୈଶ-ଏ-ମହମ୍ମଦର ପ୍ରତିଷ୍ଠାତା ମାସୁଦ ଆଝାରକୁ ବ୍ୟାନ୍ କରିବା ପାଇଁ ପ୍ରସ୍ତାବ ଜାତିସଂଘ ସୁରକ୍ଷା ପରିଷଦରେ ଆସିଥିବା ବେଳେ ହାଫିଜ୍କୁ ଏଭଳି ଝଟ୍କା ଭାରତ ପାଇଁ ଶୁଭ ସୂଚନା ଦେଇଛି। ପୁଲୱାମା ହମ୍ଲା ପଛରେ ଜୈଶ ହିଁ ରହିଥିଲା।
ଜାତିସଂଘ ହାଫିଜ୍ର ଆବେଦନକୁ ବିଚାର କରୁଥିବା ବେଳେ ଭାରତ ତା’ ବିରୋଧରେ ଏକାଧିକ ପ୍ରମାଣ ଦେଇଥିଲା। ହାଫିଜ୍ ହେଉଛି ଲସ୍କର-ଏ-ତାଏବାର ସହ ପ୍ରତିଷ୍ଠାତା। ଏକାଧିକ ଆତଙ୍କୀ କାର୍ଯ୍ୟକଳାପରେ ସେ ସଂପୃକ୍ତ ଥିବା ଦସ୍ତାବିଜ୍ ଭାରତ ଜାତିସଂଘକୁ ଦେଇଥିଲା। ଜାତିସଂଘ ଏହାର ତର୍ଜମା କରି ହାଫିଜର ଆବେଦନକୁ ଖାରଜ କରିଦେଇଥିବା ଜଣାପଡ଼ିଛି।
ଜାତିସଂଘ ପକ୍ଷରୁ ଏ ସମ୍ପର୍କରେ ହାଫିଜ ପାଇଁ ଓକିଲାତି କରୁଥିବା ହାଇଦର ରସୁଲ ମିର୍ଜାଙ୍କୁ ଜଣାଇ ଦିଆଯାଇଛି। ମୁମ୍ବାଇ ୨୬/୧୧ ଆତଙ୍କୀ ହମ୍ଲା ପରେ ଜାତିସଂଘ ସୁରକ୍ଷା ପରିଷଦ ହାଫିଜ୍ ଓ ତା’ର ସଂଗଠନ ଜେୟୁଡିକୁ ବ୍ୟାନ୍ କରିଥିଲା। ୨୦୦୮ ଡିସେମ୍ବର ୧୦ରେ ହାଫିଜ୍କୁ ବିଶ୍ୱସ୍ତରୀୟ ଆତଙ୍କୀ ମଧ୍ୟ ଘୋଷଣା କରାଯାଇଥିଲା। ଏହା ବିରୋଧରେ ହାଫିଜ୍ ୨୦୧୭ରେ ତା’ ଓକିଲ ମିର୍ଜାଙ୍କ ସହାୟତାରେ ଜାତିସଂଘରେ ଆବେଦନ କରିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।