ହାଜିପୁର: ବିବାଦୀୟ ଅଯୋଧ୍ଯା ରାମ ମନ୍ଦିର ପ୍ରସଙ୍ଗରେ ବିହାରରେ ବିଜେପି-ଜେଡିୟୁ କର୍ମୀଙ୍କ ମଧ୍ଯରେ ଗଣ୍ଡଗୋଳ ହୋଇଛି। ଏହି ପ୍ରସଙ୍ଗ ଗୋଟିଏ ଦଳର ଏଜେଣ୍ଡା ହୋଇପାରିବ ନାହିଁ ବୋଲି ଉପସ୍ଥିତ ଜେଡିୟୁ ନେତା କହିବା ପରେ ବିଜେପି କର୍ମୀ ହୋ ହାଲ୍ଲା କରିଥିବା ସୂଚନା ରହିଛି।
ସୂଚନାଯୋଗ୍ଯ ଦ୍ବିତୀୟ ପର୍ଯ୍ଯାୟ ନିର୍ବାଚନ ପାଇଁ ଏନଡିଏ କର୍ମୀଙ୍କ ବୈଠକ ବସିଥିଲା। ଏଥିରେ ବିଜେପି-ଜେଡିୟୁ ଏବଂ ଏଲଜେପିର ନେତା ଓ କର୍ମୀ ଭାଗ ନେଇଥିଲେ। ଏଲଜେପି ନେତା ପଶୁପତି ପାଶୱାନଙ୍କ ସହ ରାମ ମନ୍ଦିର ପ୍ରସଙ୍ଗରେ ଆଲୋଚନା ହେଉଥିବା ବେଳେ ବିଜେପି ଜେଡିୟୁ କର୍ମୀ ମୁହାଁମୁହିଁ ହୋଇଥିବା ଜଣାପଡ଼ିଛି। ଏମିତିକି ଉତ୍ତ୍ଯକ୍ତ ଦୁଇ ଦଳର କର୍ମୀ ପରସ୍ପର ଉପରକୁ ଚେୟାର ଟେବୁଲ ଫୋପାଡ଼ି ଥିଲେ ବୋଲି ଜଣାପଡ଼ିଛି।
ବିହାରରେ ଚଳିତଥର ଜେଡିୟୁ ଓ ଏଲଜେପି ବିଜେପି ସହିତ ମିଶି ଏକାଠି ନିର୍ବାଚନ ଲଢୁଛନ୍ତି। ୪୦ଟି ଲୋକସଭା ଆସନରୁ ଜେଡିୟୁ ଓ ବିଜେପି ପରସ୍ପର ୧୭ଟି ଲେଖା ଆସନରେ ନିର୍ବାଚନ ଲଢ଼ୁଥିବାବେଳେ ଏଲଜେପି ୬ଟି ଆସନରେ ନିର୍ବାଚନ ଲଢ଼ୁଛି।
ଜେଡିୟୁ ମୁଖପାତ୍ର କେ.ସି ତ୍ଯାଗୀ ବିବାଦ ସମ୍ପର୍କରେ ପ୍ରତିକ୍ରିୟା ଦେଇ କହିଛନ୍ତି କର୍ମୀଙ୍କ ମଧ୍ଯରେ ମତାନ୍ତର ରହିବା ସ୍ବାଭାବିକ। ଏନଡିଏ ଏକତ୍ରିତ ଅଛି ବୋଲି କହିଛନ୍ତି ତ୍ଯାଗୀ।
ସୂଚନାଯୋଗ୍ୟ, ବିବାଦୀୟ ରାମ ମନ୍ଦିର ପ୍ରସଙ୍ଗ ଏବେ ସୁପ୍ରିମକୋର୍ଟରେ ବିଚାରାଧୀନ ରହିଛି। ସମାଧାନ ପାଇଁ ନିଯୁକ୍ତ ହୋଇଥିବା ମଧ୍ଯସ୍ଥି ଉଭୟ ପକ୍ଷ ମଧ୍ଯରେ ଆପୋସ ଆଲୋଚନା କରୁଛନ୍ତି। ନିର୍ବାଚନ ବେଳେ ଏ ସଂକ୍ରାନ୍ତରେ କୌଣସି ରାଜନୀତିକ ଦଳ ଏହାକୁ ଏଜେଣ୍ଡା କରିପାରିବେ ନାହିଁ କି ପରସ୍ପର ଉପରକୁ ଦୋଷ ଲଦିପାରିବେ ନାହିଁ ବୋଲି ନିର୍ଦ୍ଦେଶ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
