ବାଲେଶ୍ୱର (ରଣଜିତ ପାକଳ): ବାଲେଶ୍ୱର ଜିଲା ଚାନ୍ଦିପୁର ଥାନା ଗୁଡୁପାହି ନୂଆ ନଈରେ ପିକ୍ଅପ୍ ଭ୍ୟାନ୍ଓଲଟି ୨ ଶ୍ରମିକ ମୃତ୍ୟୁବରଣ କରିଛନ୍ତି। ଏହି ଦୁର୍ଘଟଣାରେ ୫ ଜଣ ଆହତ ହୋଇ ନିକଟସ୍ଥ ଏକ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏହି ଶ୍ରମିକମାନେ ଚାନ୍ଦିପୁର ଅଞ୍ଚଳରେ ଏକ ଘରୋଇ ଚିଙ୍ଗୁଡି ଫାର୍ମରେ କାମ କରି ଆସୁଥିଲେ । ଆଜି ବଳରାମଗଡିକୁ ଇଟା ଆଣିବାକୁ ଯାଉଥିବା ବେଳେ ପିକ୍ଅପ୍ଟି ଭାରସାମ୍ୟ ହରାଇ ତଳକୁ ଖସିପିଡ଼ିଥିଲା।
ଫଳରେ ସମସ୍ତ ଶ୍ରମିକ ଗୁରୁତର ହୋଇପଡିଥିଲେ। ତୁରନ୍ତ ସେମାନଙ୍କୁ ସ୍ଥାନୀୟ ଲୋକେ ଜିଲ୍ଲାମୁଖ୍ୟ ଚିକିତ୍ସାଲୟରେ ଭର୍ତ୍ତି କରିଥିଲେ। ହେଲେ ଡାକ୍ତର ଦୁଇ ଜଣଙ୍କୁ ମୃତ ଘୋଷଣା କରିଥିବା ବେଳେ ୫ ଜଣଙ୍କୁ ଚିକିତ୍ସା କରାଇ ସେମାନଙ୍କୁ କଟକ ସ୍ଥାନାନ୍ତାର କରିଛନ୍ତି। ମୃତକ ଦ୍ୱୟ ହେଲେ ଗୁଦୁପାହି ଗାଁର ରବୀନ୍ଦ୍ର ହାଁସଦା ଓ ବସୁଆ ହାଁସଦା। ସେହିଭଳି ଗୁରୁତରମାନଙ୍କ ମଧ୍ୟରୁ ଜଣେ ଜଳେଶ୍ୱର ଅଞ୍ଚଳରେ ହୋଇଥିବା ବେଳେ ଅନ୍ୟ ସମସ୍ତ ଚାନ୍ଦିପୁର ଥାନା ଅଧୀନରେ ବୋଲି ଜଣାପଡିଛି।
