କ୍ୱାରେଣ୍ଟାଇନ୍‌ରେ ଗଲେ ୩୭୨ ଅଗ୍ନିଶମ କର୍ମଚାରୀ

ଭୁବନେଶ୍ୱର(ଓଡ଼ିଶା ରିପୋର୍ଟର): ପଶ୍ଚିମବଙ୍ଗରୁ ଉଦ୍ଧାର କାର୍ଯ୍ୟ ସାରି ଓଡ଼ିଶା ଫେରିବା ପରେ କ୍ୱାରେଣ୍ଟାଇନ୍‌ରେ ଗଲେ ଓଡ଼ିଶା ଅଗ୍ନିଶମ ବିଭାଗର ୩୭୨ କର୍ମଚାରୀ। ସମସ୍ତଙ୍କୁ ୧୪ ଦିନିଆ  କ୍ୱାରେଣ୍ଟାଇନ୍‌ରେ ରଖାଯାଇଛି । କୃପାଜଳ ଇଂଜିନିୟରିଂ କ୍ୟାମ୍ପସ ଏବଂ ରେଭିନ୍ୟୁ ଅଫିସର୍ସ ଟ୍ରେନିଂ ଇନଷ୍ଟିଚ୍ୟୁଟ୍‌ରେ ହୋଇଥିବା ଟିଏମ୍‌ସିରେ ସେମାନଙ୍କୁ ରଖାଯାଇଛି । ସମସ୍ତ ସଦସ୍ୟଙ୍କ କୋଭିଡ୍-୧୯ ଟେଷ୍ଟ କରାଯିବ ବୋଲି ଜଣାଯାଇଛି ।

ବାତ୍ୟା ଅମ୍ଫାନ କ୍ଷୟକ୍ଷତି ପରେ ଅଧିକ କ୍ଷତିଗ୍ରସ୍ତ ହୋଇଥିବା ପଶ୍ଚିମବଙ୍ଗରେ  ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିଲେ ଓଡ଼ିଶା ଅଗ୍ନିଶମ ବାହିନୀର ୩୭୨ ସଦସ୍ୟ । ବିଧ୍ୱସ୍ତ ହୋଇପଡ଼ିଥିବା କୋଲକାତା ଓ ଆଖପାଖ ଅଞ୍ଚଳରେ ପୁନରୁଦ୍ଧାର କାର୍ଯ୍ୟରେ ସେମାନଙ୍କୁ ନିୟୋଜିତ କରାଯାଇଥିଲା ।

ଗତ ୨୪ ତାରିଖରେ ଏହି ଟିମ୍‌ ପଶ୍ଚିମବଙ୍ଗ ଗସ୍ତ କରିଥିବାବେଳେ ସେଠାରେ ଉଲ୍ଲେଖନୀୟ କାର୍ଯ୍ୟ କରି ବେଶ୍‌ ପ୍ରଶଂସା ସାଉଣ୍ଟିଛନ୍ତି । ଓଡ଼ିଶାରୁ ଯାଇଥିବା ଅଗ୍ନିଶମ ଟିମ୍‌ ୨୫୫୦ ଗଛ କାଟି ସଫା କରିବା ସହ ରାସ୍ତାରେ ବାଧକ ସାଜିଥିବା ୭୧୭ଟି ବିଦ୍ୟୁତ୍‌ ଖୁଣ୍ଟ ବାହାର କରି ରାସ୍ତା ସଫା କରିଥିଲେ । ସେମାନଙ୍କ ଉଲ୍ଲେଖନୀୟ କାର୍ଯ୍ୟକୁ  ପଶ୍ଚିମବଙ୍ଗ ସରକାର ମଧ୍ୟ ଭୁରି ଭୁରି ପ୍ରଂଶସା କରିଛନ୍ତି। ସେଠାକାର ନଗର ଉନ୍ନୟନ ମନ୍ତ୍ରୀ ଏବଂ କୋଲକାତା ମେୟର ଓଡ଼ିଶା ଅଗ୍ନିଶମ ବାହିନୀର ଏହି ଟିମ୍‌ର ଉଚ୍ଚ ପ୍ରଶଂସା କରିବା ସହ କର୍ମଚାରୀଙ୍କୁ ସମ୍ବର୍ଦ୍ଧିତ କରିଥିଲେ।