ଲମତାପୁଟ(ଜଗତ ଜୀବନ): ଚାଷୀଙ୍କୁ ମିଳୁନି। କିନ୍ତୁ ରାସ୍ତା କଡ଼ରେ ଫୋପାଡ଼ି ଦେଲେ ୬୦ ବସ୍ତା ଚିନାବାଦାମ୍ ବିହନ ସମେତ ସାର ଓ କୀଟନାଶକ। ଆଜି କୋରାପୁଟ ଜିଲ୍ଲା ଲମତାପୁଟ ବ୍ଲକ ସାନସଗର ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ। ଯାହାକୁ ନେଇ ଚାଷୀଙ୍କ ମହଲରେ ଖୁବ୍ ଉଦ୍ବେଗ ପ୍ରକାଶ ପାଇଛି।
ଗତ ୭ ମାସ ତଳେ କୋରାପୁଟ ଜିଲ୍ଲା ଲମତାପୁଟ ବ୍ଲକ ସାନ ସଗର ଗାଁର ମହିଳା ଚାଷୀମାନଙ୍କୁ ଦେବା ନିମନ୍ତେ କୋରାପୁଟ ଆଇଟିଡିଏ ବିଭାଗ ପକ୍ଷରୁ ଏହି ସାର, କୀଟନାଶକ ଓ ଚିନାବାଦାମ ବିହନ ଯୋଗାଇ ଦିଆଯାଇଥିଲା। ଚାଷୀ କିପରି ସୁବିଧାରେ ବିହନ ଓ ସାର ପାଇବେ ସେନେଇ ଲମତାପୁଟ ସ୍ଥିତ ପ୍ରଦାନ ଅନୁଷ୍ଠାନକୁ ଦାୟିତ୍ୱ ଦିଆଯାଇଥିଲା। ଏହି ସମୟରେ ଚାଷୀଙ୍କୁ ବିହନ ଦିଆଯାଉ ନ ଥିବା ଓ ପ୍ରଦାନ ଅନୁଷ୍ଠାନ କର୍ମଚାରୀ ବିହନ ଦେବାକୁ ଲାଞ୍ଚ ମାଗୁଥିବା ଅଭିଯୋଗ ହୋଇଥିଲା। ପରେ ପ୍ରଦାନ ଅନୁଷ୍ଠାନର କର୍ମଚାରୀ ଚାଷୀଙ୍କୁ ବିହନ ଓ ସାର ବଣ୍ଟନ ନ କରି ଗାଁ କ୍ଲବ ଘରେ ଏ ସମସ୍ତ ଜିନିଷ ଛାଡ଼ିଦେଇ ଚାଲିଯାଇଥିଲେ। ୭ ମାସରୁ ଅଧିକ ହେବ ଗାଁ କ୍ଲବ ଘରେ ସାର ଓ ବିହନ ପଡି ରହିଥିଲା। ଏଥିଯୋଗୁ ଘର ନଷ୍ଟ ହେଉଥିବାରୁ ଗାଁ ଲୋକେ ଚିନାବାଦାମ ବିହନ ସମେତ ବିଭିନ୍ନ ପ୍ରକାର କୀଟନାଶକ ଔଷଧ ଓ ସାରକୁ କାଢ଼ି ଦେଖିଥିଲେ। ଏସମସ୍ତ ସାମଗ୍ରୀ ନଷ୍ଟ ହୋଇଯାଇଥିବାରୁ ଏହାକୁ ଏକ ଟ୍ରାକ୍ଟର ଯୋଗେ ରାସ୍ତାରେ କଡରେ ଫିଙ୍ଗି ଦେଇଥିବା ଦେଖିବାକୁ ମିଳିଛି।
ଚାଷୀଙ୍କୁ ନଦେଇ ଏଭଳି ବିହନ ଓ ସାର ନଷ୍ଟ କରୁଥିବା ଅନୁଷ୍ଠାନ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
ଗାଁର ମହିଳା ଓ ୱାର୍ଡ ମେମ୍ବରଙ୍କ ଅଭିଯୋଗ ନେଇ ପ୍ରଦାନ ଅନୁଷ୍ଠାନ କର୍ମଚାରୀଙ୍କ ସହ ଯୋଗାଯୋଗ କରାଯାଇଥିଲେ ହେଁ ସେମାନେ କ୍ୟାମେରା ସମ୍ମୁଖକୁ ପ୍ରତିକ୍ରିୟା ଦେବାକୁ ମନା କରିଥିଲେ। ମାତ୍ର ଏଥିପାଇଁ କୋରାପୁଟ ଆଇଟିଡିଏ ବିଭାଗ ଉପରେ ଦୋଷ ଦେଇଥିଲେ।
ଏ ନେଉ କୋରାପୁଟ ପିଏଆଇଟିଡିଏ ଅଧିକାରୀ କାରୁ ସୁରେନ କହିଛନ୍ତି, ସାର ଓ ବିହନ ବଣ୍ଟନ ଦାୟିତ୍ୱ ପ୍ରଦାନ ଅନୁଷ୍ଠାନକୁ ଦିଆଯାଇଥିଲା। ଏହି ଅନୁଷ୍ଠାନ ଏପିସି ପାଟନର ଭାବରେ କାର୍ଯ୍ୟ କରୁଛି। ସାର ଓ ବିହନ ନଷ୍ଟ ହୋଇଥିବା ସେ ଜାଣିବାକୁ ପାଇଛନ୍ତି। ତେଣୁ ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
