ପାଟଣାଗଡ଼(ଓଡ଼ିଶା ରିପୋର୍ଟର): ମାନବିକତା ଭୁଲି ଗଲେ ଜାତି ଭାଇ। ବଞ୍ଚି ଥାଉ ଥାଉ ବାସନ୍ଦ କରିଥିବା ବେଳେ ଆଖି ବୁଜିଲା ପରେ ବି ପାଖ ମାଡ଼ିଲେନି। ଅନ୍ୟ ଜାତିରେ ବିବାହ କରିଥିବାରୁ ଶେଷରେ ଶବ ଉପରେ ବି ରାଗ ଶୁଝାଇଲେ । ଦୀର୍ଘ ସମୟ ଧରି ଶବ ପଡ଼ି ରହିବା ସତ୍ତ୍ୱେ କେହି କାନ୍ଧ ଦେବାକୁ ଆଗେଇ ନ ଆସିବାରୁ ଶଗଡ଼ ଗାଡ଼ିରେ ନେଇ ବାପାଙ୍କ ଅନ୍ତିମ ସଂସ୍କାର କରିଛି ନାବାଳକ ପୁଅ । ଏପରି ହୃଦୟ ବିଦାରକ ଘଟଣା ପାଟଣାଗଡ଼ ବ୍ଲକ ମାରୁଆ ପଞ୍ଚାୟତ ର ପଢେଲ ଗାଁରେ ଘଟିଛି।
ପଢେଲ ଗାଁର ସୀତା ସରାଫଙ୍କୁ ଛତିଶଗଡ଼ ଅଞ୍ଚଳର କଲ୍ୟାଣ ସୁନାନୀ ପ୍ରେମ ବିବାହ କରିଥିଲେ। ଦୁହେଁ ଭିନ୍ନ ଜାତିର ହୋଇଥିବାରୁ ଜାତି କୁଳ ସେମାନଙ୍କୁ ବାସନ୍ଦ କରିଥିଲେ । କିଛି ଦିନ ଗାଁରେ ରହିବା ପରେ ଉଭୟ ପତିପତ୍ନୀ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥିଲେ । ସେଠାରେ ପ୍ରାୟ ୧୦ ବର୍ଷ ରହିବା ପରେ ପୁଣି ଗାଁକୁ ଫେରି ଆସିଥିଲେ ।
ଇତି ମଧ୍ୟରେ ସୀତା ଓ କଲ୍ୟାଣଙ୍କର ୩ଟି ଝିଅ ଓ ଗୋଟିଏ ପୁଅ ହୋଇ ସାରିଥିଲେ । ଗାଁରେ ସମସ୍ତେ ଏକାଠି ରହିବା ପରେ ଉଭୟ ପତିପତ୍ନୀକୁ ଜାତିକୁଳ ବାସନ୍ଦ କରିଥିଲେ । ବିଭିନ୍ନ ଘାତ ପ୍ରତିଘାତର ସାମନା କରିବା ପରେ ସ୍ୱାମୀ ସ୍ତ୍ରୀ ଦୁହେଁ ଏକାଠି ରହିଥିବା ବେଳେ ପିଲାମାନେ ଅନ୍ୟତ୍ର ରହି ଆସୁଥୁଲେ |
ଗତ ରବିବାର କଲ୍ୟାଣ ସୁନାନୀଙ୍କ ମୃତ୍ୟୁ ଘଟିଥିଲା । ଘଣ୍ଟା ଘଣ୍ଟା ଧରି ଘରେ ଶବ ପଡିରହିଥିଲେ ମଧ୍ୟ ପାଖକୁ କେହି ଭାଇ ବନ୍ଧୁ ଆସିନଥିଲେ। ଶେଷରେ ନିଜ ନାବାଳକ ପୁଅ ଶବକୁ ଶଗଡ଼ ଗାଡ଼ିରେ ମଶାଣିକୁ ନେଇଥିଲେ । ଖବର ପାଇ ଗାଁର କିଛିଲୋକ ଏବଂ ସେବା ଚାରିଟେବୁଲ ଟ୍ରଷ୍ଟର ସଦସ୍ୟ ଘଟଣାସ୍ଥଳରେ ପହଁଚି ଶବ ସତ୍କାର କରିବାରେ ସାହାଯ୍ୟ କରିଥିଲେ।