ଶିକ୍ଷକଙ୍କ ଦାବି ମାନିଲେ, କିନ୍ତୁ ଅବସର ବୟସ ବଢ଼ାଇବାକୁ ଅମଙ୍ଗ

ଭୁବନେଶ୍ୱର (ଓଡ଼ିଶା ରିପୋର୍ଟର): ଛୁଟି ଦିନ ସତ୍ତ୍ୱେ ଆଜି ଖୋଲିଥିଲା ସଚିବାଳୟ। ଆନ୍ଦୋଳନରତ ଶିକ୍ଷକଙ୍କ ସହିତ ଆଲୋଚନା କରିଛନ୍ତି ଉଚ୍ଚଶିକ୍ଷା ମନ୍ତ୍ରୀ ଅନନ୍ତ ଦାସ, ଗଣଶିକ୍ଷା ମନ୍ତ୍ରୀ ବଦ୍ରିନାରାୟଣ ପାତ୍ର ଓ ଦୁଇ ବିଭାର ସଚିବ। ସଂଘର ୭ଟି ଦଫାରୁ ୬ଟି ପୂରଣ ପାଇଁ ରାଜ୍ୟ ସରକାର ରାଜି ହୋଇଛନ୍ତି। ତେବେ କାର୍ଯ୍ୟରତ ଶିକ୍ଷକଙ୍କ ଅବସର ବୟସ ୬୦ରୁ ୬୨କୁ ବୃଦ୍ଧି କରିବାକୁ ରାଜ୍ୟ ସରକାର ରାଜି ହେଉନାହାନ୍ତି। ରାଜ୍ୟ ସରକାରଙ୍କ ଅନୁରୋଧ ଓ ପିଲାଙ୍କ ସ୍ୱାର୍ଥକୁ ଦୃଷ୍ଟିରେ ରଖି ମାର୍ଚ୍ଚ ୯ ତାରିଖ ପର୍ଯ୍ୟନ୍ତ ଆନ୍ଦୋଳନ ସ୍ଥଗିତ ରଖାଯାଇଛି। ଏନେଇ ଆଜି ସୂଚନା ଦେଇଛନ୍ତି ଶିକ୍ଷକ ସଂଘ ସଭାପତି ପବିତ୍ର ମହଲା।

ସେ କହିଛନ୍ତି-“ରାଜ୍ୟ ସରକାର ରଖିଥିବା ସତ୍ୟପାଠ ଦାଖଲକୁ ଉଚ୍ଛେଦ କରାଯିବ। ଏହାଛଡ଼ା ୬୦, ୪୦ ଓ ୭୫ ବର୍ଗ ଅଧ୍ୟାପକଙ୍କୁ ପୂର୍ଣ୍ଣଅନୁଦାନ ଦିଆଯିବ, ବକେୟା ଦରମା ପ୍ରଦାନ କରାଯିବ, ସପ୍ତମ ବେତନ କମିଶନ ଲାଗୁ କରିବା ପ୍ରମୁଖ ଦାବି ପୂରଣ ପାଇଁ ରାଜ୍ୟ ସରକାର ରାଜି ହୋଇଛନ୍ତି।”

ସେ ଆହୁରି କହିଲେ-“ଏବେ ବିଜେପୁର ଉପନିର୍ବାଚନ ପାଇଁ ଆଚରଣ ବିଧି ଲାଗିଛି। ତେଣୁ ବିଜ୍ଞପ୍ତି ପ୍ରକାଶ ପାଇପାରୁ ନାହିଁ। ରାଜ୍ୟ ସରକାରଙ୍କଠାରୁ ମୌଖିକ ପ୍ରତିଶ୍ରୁତି ପାଇ ଆମେ ଆନ୍ଦୋଳନକୁ ସ୍ଥଗିତ ରଖିଛୁ। ଏଥିପାଇଁ ମାର୍ଚ୍ଚ ୯ ତାରିଖ ପର୍ଯ୍ୟନ୍ତ ସମୟ ଦିଆଯାଇଛି। ୯ ତାରିଖ ସୁଦ୍ଧା ଦାବି ପୂରଣ ନହେଲେ ୨୦ ତାରିଖଠାରୁ ଖାତା ମୂଲ୍ୟାୟନ ବର୍ଜନ କରିବୁ।”