ଭୁବନେଶ୍ୱର(ଓଡ଼ିଶା ରିପୋର୍ଟର): ଭାରତର ଅଲିମ୍ପିକ୍ସ ସଫଳତାର ଚର୍ଚ୍ଚା ଭିତରେ ଓଡ଼ିଶାର କ୍ରୀଡ଼ା ଭିତ୍ତିଭୂମି ବିକାଶ ଲାଗି ବଡ଼ ଘୋଷଣା। ପ୍ରାୟ ୭ ଶହ କୋଟି ଟଙ୍କା ବ୍ୟୟରେ ରାଜ୍ୟର ବିଭିନ୍ନ ପୌରାଞ୍ଚଳରେ ନିର୍ମାଣ ହେବ ୮୯ଟି ବହୁମୁଖୀ ଷ୍ଟା଼ଡିୟମ । ଗତକାଲି ରାଜ୍ୟ କ୍ୟାବିନେଟରେ ଏ ସମ୍ପର୍କିତ ପ୍ରସ୍ତାବକୁ ମଞ୍ଜୁରୀ ମିଳିବା ମାତ୍ରେ ତୁରନ୍ତ ରାଜ୍ୟ ସରକାରଙ୍କୁ ଧନ୍ୟବାଦ ଦେବାକୁ ସତେ ଯେମିତି ଆଗୁଆ ପ୍ରସ୍ତୁତ ଥିଲା ଟିମ୍ ବିଜେଡି । ଭୁବନେଶ୍ୱରରୁ ବାଲେଶ୍ୱର, ଭଦ୍ରକରୁ ମୟୂରଭଞ୍ଜ, ସବୁଠି ଆୟୋଜିତ ହୋଇଥିଲା ପ୍ରେସମିଟ୍। ଏପଟେ ରାଜ୍ୟ ସରକାରଙ୍କ ଏଭଳି ନିଷ୍ପତ୍ତିକୁ କିନ୍ତୁ ସହଜରେ ଗ୍ରହଣ କରିପାରି ନାହାନ୍ତି ବିରୋଧୀ । ପୌର ନିର୍ବାଚନ ପୂର୍ବରୁ ଏହା ରାଜ୍ୟ ସରକାରଙ୍କ ପ୍ରହେଳିକା ବୋଲି କହିଛି ବିଜେପି । ସେପଟେ ପିଠା ଯୋଜନା ଭଳି ରାଜ୍ୟ ସରକାରଙ୍କର ଏହି ନିର୍ବାଚନୀ ଚାଲ କୌଣସି କାମରେ ଆସିବ ନାହିଁ ବୋଲି ଖୋଲାଖୋଲି କହିଛି କଂଗ୍ରେସା ତେବେ ବିରୋଧୀ ପ୍ରସଙ୍ଗ ଶୂନ୍ୟ ଥିବାରୁ ଏଭଳି ଅଭିଯୋଗ ଆଣୁଥିବା ପ୍ରତିକ୍ରିୟାରେ କହିଛନ୍ତି ସରକାରୀ ଦଳ ନେତା।
ବାସ୍ତବତା ହେଉଛି ୨୦୧୮ରୁ ରାଜ୍ୟରେ ହେବାକୁ ଥିବା ପୌର ନିର୍ବାଚନ ଏଯାଏଁ ହୋଇପାରିନି । ସୀମା ପୁନଃ ନିର୍ଦ୍ଧାରଣ, ଆସନ ସଂରକ୍ଷଣ ଓ କୋର୍ଟରେ ମାମଲା ଆଦି କାରଣ ପାଇଁ ଘୁଞ୍ଚି ଘୁଞ୍ଚି ଯାଉଛି ନିର୍ବାଚନ ପ୍ରକ୍ରିୟା। ତେଣେ ଅଫିସରଙ୍କ ମାଧ୍ୟମରେ ସରକାର ଶାସନ ଚଳାଇଛନ୍ତି ବୋଲି ବାରମ୍ବାର ଅଭିଯୋଗ ଆଣି ପୌର ନିର୍ବାଚନ ତୁରନ୍ତ କରାଇବାକୁ ବାରମ୍ବାର ଦାବି କରୁଛନ୍ତି ବିରୋଧୀ । ଏପରି ସ୍ଥଳେ ନିର୍ବାଚନ ଯେ କୌଣସି ମୂହୂର୍ତ୍ତରେ ଅବଶ୍ୟମ୍ଭାବୀ ଥିବାରୁ କେବଳ ସରକାରୀ ଦଳ ନୁହେଁ, ବିରୋଧୀ ଦଳ ବି ମାନସିକ ସ୍ତରରେ ପ୍ରସ୍ତୁତି ଆରମ୍ଭ କରିଥିବା କହିଛନ୍ତି ରାଜନୈତିକ ବିଶେଷଜ୍ଞ।
ଯାହାର ପ୍ରମାଣ ଦେଉଛି ଘନ ଘନ ମିଶ୍ରଣ ପର୍ବ ଓ କର୍ମୀ ସମ୍ମିଳନୀ । ଏଣେ ଶାସକ ଦଳର ବଡ଼ ଘୋଷଣା ବି ଏ ଚର୍ଚ୍ଚାକୁ ଆହୁରି ଫର୍ଚ୍ଚା କରିଥିବା କୁହାଯାଉଛି । ତେଣେ ପଞ୍ଚାୟତ ନିର୍ବାଚନ ଠିକ୍ ସମୟରେ ହେବ ଓ ଏଥିପାଇଁ ନିର୍ବାଚନ କମିଶନଙ୍କୁ ଖୁବ୍ ଶୀଘ୍ର ରାଜ୍ୟ ସରକାର ଅବଗତ କରିବେ ବୋଲି ମତ ରଖିଛନ୍ତି ପଞ୍ଚାୟତିରାଜ ମନ୍ତ୍ରୀ। ପୌର ନିର୍ବାଚନ ବାକିଆ ଥିବା ବେଳେ ମୁଣ୍ଡ ଉପରକୁ ଆସିବାକୁ ଯାଉଛି ପଞ୍ଚାୟତ ନିର୍ବାଚନ। ଏହାକୁ ଦୃଷ୍ଟିରେ ରଖି ଆଗକୁ ରାଜନୀତି ଆହୁରି ଜୋରଦାର ହେବା ଅନୁମାନ କରାଯାଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
