ବିଜେଡିରେ ଅନୁଭବ ଝଡ଼ : ବିଜେଡି ୟୁଥ୍ ପ୍ଲାନ୍‌ରେ ଲାଗିଲା ବ୍ରେକ୍  

ଭୁବନେଶ୍ୱର: ବିଜେଡି ୟୁଥ୍ ପ୍ଲାନ୍‌ରେ ବ୍ରେକ୍ । ବନ୍ଦ ରହିଛି ଦଳର ଯୁବ-ଛାତ୍ର ଜନ ସଂପର୍କ ଅଭିଯାନ।  ଜିଲ୍ଲାର ଯୁବ ଛାତ୍ର ସଙ୍ଗଠନକୁ ଅବହେଳା କରିବା, ଅଭିନେତା ତଥା ସାଂସଦ ଅନୁଭବ ମହାନ୍ତିଙ୍କୁ ଅଧିକ ପ୍ରାଧାନ୍ୟ ଦିଆଯାଉଥିବା ନେଇ ଦଳରେ ଅସନ୍ତୋଷ କାରଣରୁ ଏହି ଅଭିଯାନକୁ ସ୍ଥଗିତ ରଖା ଯାଇଥିବା ଚର୍ଚ୍ଚା ହେଉଛି।  ଦଳ କିନ୍ତୁ ସ୍ପଷ୍ଟ କରିଛି, ବିଜେଡି ଅନେକ କାର୍ଯ୍ୟକ୍ରମ ହାତକୁ ନେଇଛି । ପର୍ଯ୍ୟାୟକ୍ରମେ ଏହି କାର୍ଯ୍ୟକ୍ରମ ବି ଚାଲିବ।

ସୂଚନା ଅନୁଯାୟୀ, ନଭେମ୍ବର ୧୮ରେ ନବରଙ୍ଗରପୁର ଜିଲ୍ଲାର ଝରିଗାଁରେ ଆରମ୍ଭ ହେଲା ବିଜେଡିର ୟୁଥ୍ ଆଟ୍ରାକ୍ସନ କାର୍ଯ୍ୟକ୍ରମ ଯୁବ-ଛାତ୍ର ଜନସଂପର୍କ ଅଭିଯାନ।  ସାଂସଦ ଅନୁଭବ ମହାନ୍ତି ଓ ତାଙ୍କ ଟିମ୍‌ ନେଇ ଚାଲିଲା କାର୍ଯ୍ୟକ୍ରମ। ନବରଙ୍ଗପୁର, କୋରାପୁଟ ଜିଲ୍ଲାରେ କର୍ଯ୍ୟକ୍ରମ ପରେ ହଠାତ୍ ଏହା ବନ୍ଦ ହୋଇଗଲା। କାର୍ଯ୍ୟକ୍ରମ ଯେଉଁ ଢଙ୍ଗରେ ଚାଲିଲା ତା ବିରୋଧରେ ସୁପ୍ରିମୋ ନବୀନ ପଟ୍ଟନାୟକଙ୍କ ପାଖରେ ପହଞ୍ଚିଲା ଅଭିଯୋଗ। ଯୁବ ଓ ଛାତ୍ର ସଙ୍ଗଠନର ଅନେକ କର୍ମକର୍ତ୍ତା ଅସନ୍ତୋଷ ପ୍ରକାଶ କଲେ।  ଛାତ୍ର ଓ ଯୁବକଙ୍କ ନାଁରେ କାର୍ଯ୍ୟକ୍ରମ ହୋଇଥିଲେ ବି ଜିଲ୍ଲା ଓ ରାଜ୍ୟ ସ୍ତରୀୟ ଯୁବନେତାଙ୍କୁ ଡକାଗଲା ନାହିଁ । ଏହାବାଦ୍ ସାଂସଦ ଅନୁଭ ମହାନ୍ତି କାର୍ଯ୍ୟକ୍ରମର ନେତୃତ୍ୱ ନେବାକୁ ବି ଖୋଲାଖୋଲି ବିରୋଧ ହେଲା। ଦଳରେ ସିଦ୍ଧାନ୍ତ ମହାପାତ୍ର, ଅରିନ୍ଦମ ରାୟ ଭଳି ଜଣାଶୁଣା ଅଭିନେତା ଥିଲେ ବି ସେମାନଙ୍କୁ କାହିଁକି ସାମିଲ କରାଯାଉ ନାହିଁ ପ୍ରଶ୍ନ ଉଠିଲା । ତାହା ସହ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବଦଳରେ ଅନୁଭବ ନିଜ ପ୍ରଚାର ଅଧିକ କଲେ ବୋଲି ଅଭିଯୋଗ ଉଠିଲା ଏହାପରେ ଦଳରେ ତାଳି ପକା ଉଦ୍ୟମ ବି ହେଲା । ଏବେ କାର୍ଯ୍ୟକ୍ରମ ସାମୟିକ ଭାବେ ବନ୍ଦ ରଖାଯାଇଛି । ଯୁବ ବିଜେଡି ସଭାପତି କହିଛନ୍ତି ପର୍ଯ୍ୟାୟ କ୍ରମେ ଏହି ଅଭିଯାନ ଚାଲିବ।

ବିଜେଡିର ଯୁବ-ଛାତ୍ର ଜନସଂପର୍କ ଅଭିଯାନ ଆଗକୁ କେମିତି ଚାଲିବ? କେବେଠାରୁ ପୁଣି ଆରମ୍ଭ ହେବ କାଅର୍ଯ୍ୟକ୍ରମ? ଆଗକୁ ଏହି କାର୍ଯ୍ୟକ୍ରମରେ କ’ଣ ରହିବ ଅନୁଭବଙ୍କ ଭୂମିକା? ଅନୁଭବଙ୍କ ବ୍ୟତୀତ ଅନ୍ୟ ଅଭିନେତାଙ୍କୁ ବି ସାମିଲ କରାଯିବ କି ତାକୁ ନେଇ ଚର୍ଚ୍ଚା ଲାଗି ରହିଛି।  ଏନେଇ ଅନୁଭବଙ୍କ ପ୍ରତିକ୍ରିୟା ମିଳି ନ ଥିବାବେଳେ ବିଜେଡି ମୁଖପାତ୍ର ଅରୁଣ ସାହୁ କହିଛନ୍ତି ଦଳରେ କୌଣସି ବିରୋଧାଭାଷ ନାହିଁ। ଯୁବ ଭୋଟରଙ୍କୁ ଆକୃଷ୍ଟ କରିବା ପାଇଁ ଦଳ, ମେଗା କାର୍ଯ୍ୟକ୍ରମ ହାତକୁ ନେଇଛି ସତ  ହେଲେ ଦଳରେ ଥିବା ଅନ୍ତର୍ଦ୍ୱନ୍ଦ୍ୱ ୟୁଥ୍ ପ୍ଲାନ୍‌ଙ୍କୁ ଏକ ପ୍ରକାର ବିଗାଡି ଦେଇଛି ।