ଭୁବନେଶ୍ୱର(ଓଡ଼ିଶା ରିପୋର୍ଟର): ମୁହଁ ଖୋଲିଲେ ଓଲିଉଡ୍ ଅଭିନେତା ବାବୁଶାନ୍ ମହାନ୍ତିଙ୍କ ପତ୍ନୀ ତୃପ୍ତି ଶତପଥୀ। ନିଜ ସମ୍ପର୍କକୁ ନେଇ ବଖାଣିଲେ। ଖାରବେଳନଗର ଥାନାରେ ଏଫଆଇଆର୍ ଦେବା ପରେ ସେ ଗଣମାଧ୍ୟମକୁ କହିଛନ୍ତି, ଦୁଇ ବର୍ଷ ଧରି ଏ ଘଟଣା ଚାଲିଛି। ଏ କଥା ଜଣା ପଡ଼ିବା ପରେ ବୈବାହିକ ଜୀବନକୁ ସଜାଡ଼ିବା ପାଇଁ ମୁଁ ବହୁ ଚାନ୍ସ ଦେଇଛି। ମୁଁ ମୋ’ ଆଡୁ ବହୁବାର ଚେଷ୍ଟା କରିଛି। ଯେଉଁ ଗୁଡ୍ ଫ୍ରେଣ୍ଡ କଥା କୁହାଯାଉଛି, ତାହା ଗୁଡ୍ ଫ୍ରେଣ୍ଡ ନୁହେଁ। ବହୁ ସ୍ଥାନରେ ମୁଁ ସେମାନଙ୍କୁ ଧରିଛି। ୪ ଥର ସେମାନଙ୍କୁ ରେଡ୍ ହେଣ୍ଡେଡ୍ ଧରିଛି। ସିଏ ମୋର ଛୋଟ ବେଳର ସାଙ୍ଗ ହୋଇଥିବାରୁ ମୁଁ ତାଙ୍କୁ ବହୁ ବୁଝାଇଥିଲି। ମୁଁ ସେ ସମ୍ପର୍କକୁ ଫେରି ପାଇବା ପାଇଁ ଆଉ ଥରେ ଚାନ୍ସ ଦେବାକୁ ରେଡ୍ଡି ଅଛି। ମୋର ଛୋଟ ଛୁଆଟିଏ ଅଛି ବୋଲି ତୃପ୍ତି କହିଛନ୍ତି।
ଆଜି ସକାଳେ ବାବୁଶାନ ଓ ତାଙ୍କ ସହ ଅଭିନେତ୍ରୀ ପ୍ରକୃତି ମିଶ୍ରଙ୍କୁ ଗୋଟିଏ ଗାଡ଼ିରେ ଦେଖି ରାସ୍ତାରେ ଚିହିଁକି ଉଠିଥିଲେ ତୃପ୍ତି। ରାସ୍ତା ଉପରେ ସେ ବାବୁସାନଙ୍କ ସାର୍ଟ ଧରି ଝିଙ୍କିବା ସହ ଅଭିନେତ୍ରୀ ପ୍ରକୃତିଙ୍କ ଚୁଟି ଟାଣି ଗୋଡ଼ାଇ ଥିଲେ। ଯାହାର ଭିଡିଓ ଭାଇରାଲ୍ ହୋଇଥିଲା। ଏନେଇ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ପ୍ରକୃତିଙ୍କ ବାପା ତଥା ବିଶିଷ୍ଟ ସଂଗୀତ ନିର୍ଦ୍ଦେଶକ ମନ୍ମଥ ମିଶ୍ର ଓ ତାଙ୍କ ମାଆ ଖାରବେଳନଗର ଥାନାରେ ଏତଲା ଦେଇଥିଲେ। ତୃପ୍ତିଙ୍କ ବାପା ଲଳିତ ଶତପଥୀ ଓ ତାଙ୍କ ଝିଅ ଗୁଣ୍ଡାଙ୍କୁ ଧରି ମୋ’ ଝିଅକୁ ଫିଜିକାଲି ଆସଲ୍ଟ କରିଛନ୍ତି। ଝିଅକୁ ଜୀବନରେ ମାରିଦେବାକୁ ଧମକ ଦେଇଥିବା ଅଭିଯୋଗ କରିଥିଲେ ମନ୍ମଥ ମିଶ୍ର।
ଆଜି ଅପରାହ୍ନରେ ବାବୁଶାନଙ୍କ ମାଆ ଅପରାଜିତା ମହାନ୍ତି ବୋହୂ ରହୁଥିବା ଘରକୁ ଯାଇଥିଲେ। ସେଠାରୁ ବୋହୂକୁ ଧରି ଖାରବେଳନଗର ଥାନା ଯାଇଥିଲେ ଅପରାଜିତା। ତୃପ୍ତି ଓ ଅପରାଜିତାଙ୍କ ସହ ତୃପ୍ତିଙ୍କ ମାଉସୀ ମଧ୍ୟ ଯାଇଥିଲେ। ତୃପ୍ତି ଓ ପ୍ରକୃତିଙ୍କ ଅଭିଯୋଗ ଆଧାରରେ କମିଶନରେଟ୍ ପୁଲିସ ଦୁଇଟି ମାମଲା ରୁଜୁ କରିଛି। ପୁଲିସ ବିଭିନ୍ନ ଦିଗରୁ ତଦନ୍ତ ଚଳାଇଛି।
ସେପଟେ ବୋହୂଙ୍କ ସପକ୍ଷରେ ବାହାରିଛନ୍ତି ଉତ୍ତମ ମହାନ୍ତି। ସେ କହିଛନ୍ତି, ମୋ ବୋହୂ ତୃପ୍ତି ବହୁତ ଭଲ। ବାବୁସାନ ଓ ତୃପ୍ତି ପରସ୍ପରକୁ ବହୁତ ଭଲ ମଧ୍ୟ ପାଆନ୍ତି। ତେବେ ପ୍ରକୃତି ମିଶ୍ର ସହ ସଂପର୍କକୁ ନେଇ ତୃପ୍ତି ପାଖରେ ପ୍ରମାଣ ଥାଇପାରେ। ତୃପ୍ତି ବହୁତ ଭଲ ଛାତ୍ରୀ। ଅଭିନୟ ସହ କୌଣସି ସଂପର୍କ ନାହିଁ। ଚଳଚ୍ଚିତ୍ରର ରୋମାଣ୍ଟିକ ଦୃଶ୍ୟ ଆଦିକୁ ସେ ଭଲ ପାଏ ନାହିଁ ବୋଲି କହିଛନ୍ତି ଉତ୍ତମ ମହାନ୍ତି।