ନୂଆପଡା: ନୂଆପଡ଼ା ଜିଲ୍ଲା କୋମନା ଏସ୍ଓଜି କ୍ୟାମ୍ପରେ ଯୁବକଙ୍କୁ ପିଟିପିଟି ହତ୍ୟା ଘଟଣାକୁ ନେଇ ଜୋର ଧରୁଛି ରାଜନୀତି। ଘଟଣାର ଅନୁଧ୍ୟାନ ପାଇଁ ପିସିସି ସଭାପତିଙ୍କ ନେତୃତ୍ୱରେ କଂଗ୍ରେସର ଏକ ଟିମ୍ ଆଜି ନୂଆପଡ଼ା ଯାଉଛି। ଏହି ଟିମ୍ ଆହତ ଯୁବକ ନୃତ୍ୟନ ନାୟକଙ୍କ ଘରକୁ ଯିବ। ସେହିପରି କଂଗ୍ରେସ ଟିମ୍ ମୃତ ଚିତ୍ତରଂଜନ ସାହୁଙ୍କ ପରିବାରକୁ ଭେଟିବା ସହ ଏସପି ଓ ଜିଲ୍ଲାପାଳଙ୍କ ସହ ଆଲୋଚନା କରିବ। ଏହି ଘଟଣାରେ ଗତକାଲି କୋମନା ପୋଲିସ ୪ ଜଣ ଏସଓଜି ଯବାନଙ୍କୁ ଗିରଫ କରିଥିଲା। ସେମାନେ ହେଲେ ଏସଓଜି ୟୁନିଟ୍-୧୬ର ଟିମ୍ ଲିଡର ଖୁସିରାମ ଭୋଇ, କମାଣ୍ତୋ ଶଶି କୁଜୁର, କମାଣ୍ତୋ ପ୍ରମୋଦ ଜଗଦଲା ଓ କମାଣ୍ତୋ କାମଦେବ ପ୍ରଧାନ। ଗତକାଲି ଏହି ପ୍ରସଙ୍ଗକୁ ନେଇ ବିଧାନସଭାରେ ପ୍ରବଳ ପାଟିତୁଣ୍ଡ ହୋଇଥିଲା। ମୁଖ୍ୟମନ୍ତ୍ରୀ ଗୃହରେ ବିବୃତି ରଖିବା ସହ ଘଟଣାର ଜୁଡିସିଆଲ୍ ମାଜିଷ୍ଟେଟ ତଦନ୍ତ ହେବ ବୋଲି କହିଥିଲେ। ସେହିପରି ମୃତ ଚିତ୍ତରଂଜନଙ୍କ ପରିବାର ଲାଗି ସେ ୧୦ ଲକ୍ଷ ଟଙ୍କାର ସହାୟତା ଘୋଷଣା କରିବା ସହ ଆହତଙ୍କ ସମସ୍ତ ଖର୍ଚ୍ଚ ସରକାର ବହନ କରିବେ ବୋଲି କହିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
